ଭଣ୍ଡାରିପୋଖରୀ,୨୭।୭(ଡି.ଏନ୍.ଏ.): କରୋନା ଲାଗି ଲକ୍ଡାଉନ୍ ଜାରି ରହିଥିବା ବେଳେ ଚଳିତ ବର୍ଷ କାଉଡ଼ିଆଙ୍କୁ ଶୈବ ପୀଠ ମନା ହୋଇଥିଲା। ଏ ନେଇ ଶ୍ରାବଣ ମାସ ତୃତୀୟ ସୋମବାର ହୋଇଥିଲେ ସୁଦ୍ଧା କୌଣସି ଶୈବ ପୀଠରେ ଭକ୍ତଙ୍କ ଭିଡ଼ ଜମି ନଥିଲା। ତେବେ କାଁ ଭଁା ଗାଁ ଗହଳିରେ ଏହି ନିୟମକୁ ଅବମାନନା କରାଯାଉଛି। ବ୍ରତ ଭାଙ୍ଗିଯିବ ବୋଲି ମାନସିକଧାରୀ ଲୁଚିଛପି ମହାଦେବଙ୍କୁ ଜଳଲାଗି କରୁଛନ୍ତି। ତେବେ ସୋମବାର କେନାଲରେ ବୁଡ଼ି ଜଣେ କାଉଡ଼ଇଙ୍କ ମୃତ୍ୟୁ ଘଟିଛି ।ଏଭଳି ଅଭାବନୀୟ ଘଟଣା ଘଟିଛି ଭଦ୍ରକ ଜିଲା ଭଣ୍ଡାରିପୋଖରୀ ଥାନା ନଗୁଁଆ ପଞ୍ଚାୟତରେ।
ରାଜେନ୍ଦ୍ର ବେହେରାଙ୍କ ପୁଅ ବିଜୟ (୨୨) ପୂର୍ବାହ୍ନରେ ୩ ନଂ. ହାଇଲେବଲ କେନାଲରୁ ପାଣି ଉଠାଉଥିବା ବେଳେ ଭାସି ଯାଇ ତାଙ୍କର ମୃତ୍ୟୁ ଘଟିଛି। ବିଜୟ ସୋମବାର ସାଙ୍ଗମାନଙ୍କ କେନାଲରୁ ଜଳ ଆଣି ଗ୍ରାମ ଶିବ ମନ୍ଦିରରେ ଢାଳିଥାନ୍ତେ। ମାତ୍ର କେନାଲରେ ଗାଧୋଉଥିବା ବେଳେ ବିଜୟଙ୍କ ଗୋଡ଼ ଖସି ଯାଇଥିଲା। ସାଙ୍ଗମାନେ ଖୋଜାଖୋଜି କରିଥିଲେ ସୁଦ୍ଧା ନ ପାଇ ଅଗ୍ନିଶମ ବିଭାଗକୁ ଖବର ଦେଇଥିଲେ। କିଛି ସମୟପରେ ଅଗ୍ନିଶମ କର୍ମଚାରୀ ଖୋଜାଖୋଜି କରି ତାଙ୍କୁ ଉଦ୍ଧାର କରିଥିଲେ। ପରେ ବିଜୟଙ୍କୁ ଭଣ୍ଡାରିପୋଖରୀ ଡାକ୍ତରଖାନା ଚିକିତ୍ସା ପାଇଁ ନିଆଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି। ସ୍ଥାନୀୟ ପୋଲିସ ଡାକ୍ତରଖାନାରେ ପହଞ୍ଚି ମୃତଦେହ ଉଦ୍ଧାର କରି ଏକ ଅପମୃତ୍ୟୁ ମାମଲା ରୁଜୁ କରି ବ୍ୟବଚ୍ଛେଦ ପାଇଁ ଭଦ୍ରକ ପଠାଇଛି।