ପାଟକୁରା,୩ା୧୧ (ଡି.ଏନ.ଏ.): ଦୀପାବଳିରେ ପିତୃପୁରୁଷଙ୍କ ପାଇଁ ପରିବାର ଲୋକେ କାଉଁରିଆ କାଠି ଜାଳି ବଡ଼ବଡୁଆ ଡାକିଥା’ନ୍ତି। କିନ୍ତୁ ଏବେ ଏହି କାଉଁରିଆ କାଠିର ଅଭାବ ପରିଲକ୍ଷିତ ହେଉଛି। ପୂର୍ବରୁ ଲାଭଜନକ ଫସଲ ଭାବେ ନଳିତା ଚାଷକୁ ଚାଷୀମାନେ ଆପଣାଇ ନେଇଥିଲେ। ନଳିତା ଚାଷୀ ଝୋଟକୁ ବିକ୍ରି କରି ବେଶ୍ ଦି’ ପଇସା ପାଉଥିଲେ। ପଡ଼ୋଶୀମାନଙ୍କୁ ଦୀପାବଳିରେ ବଡ଼ବଡୁଆ ଡାକିବାକୁ କାଉଁରିଆ କାଠି ବାଣ୍ଟୁଥିଲେ। ଗରଦପୁର ବ୍ଲକ ଅଞ୍ଚଳରେ ଝୋଟ କାରିଗରମାନେ ଚାଷୀଙ୍କଠାରୁ ଝୋଟ ନେଇ ଲଙ୍ଗଳ ଦଉଡ଼ି, ବଳଦଙ୍କ ପାଇଁ ତୁଣ୍ଡି, ଶିକା, ଆସନ, କାର୍ପେଟ ଇତ୍ୟାଦି ତିଆରି କରି ବିକ୍ରୟ କରୁଥିଲେ। ଏଠାରୁ ଉତ୍ପାଦିତ ଝୋଟକୁ ଶିଳ୍ପରେ ବ୍ୟବହାର କରାଯାଉଥିଲା। ଝୋଟରେ ତିଆରି ବିଭିନ୍ନ ସାମଗ୍ରୀର ବିକଳ୍ପ ଭାବେ ପ୍ଲାଷ୍ଟିକ୍ ସାମଗ୍ରୀ ଆସିଲା। ଫଳରେ ଉପଭୋକ୍ତା ଝୋଟଜାତ ସାମଗ୍ରୀ ଉପରୁ ମୁହଁ ହଟାଇନେଲେ। ଏହାର ପ୍ରଭାବ ଝୋଟ ଶିଳ୍ପ ଉପରେ ପଡ଼ିବାରୁ ଚାଷୀମାନେ ନଳିତା ଚାଷ ଉପରୁ ମୁହଁ ଆଡ଼େଇ ନେଲେ। ସରକାରୀ ପ୍ରୋତ୍ସାହନ ନ ମିଳିବାରୁ ଚାଷୀ ଅଧିକ କ୍ଷତିଗ୍ରସ୍ତ ହେଲେ। ଝୋଟଜାତ ସାମଗ୍ରୀ ଜୈବିକ ହୋଇଥିବାରୁ ଏହାର ବର୍ଜ୍ୟବସ୍ତୁ ମାଟିରେ ମିଶି ଯାଉଥିଲା। କିନ୍ତୁ ପ୍ଲାଷ୍ଟିକ୍ ମାଟିରେ ନ ମିଶିବାରୁ ପରିବେଶ ପ୍ରଦୂଷିତ ହେଉଛି। ଏଣୁ ଝୋଟଚାଷ ପାଇଁ ସରକାରୀ ପ୍ରୋତ୍ସାହନ ଦେବାକୁ ପରିବେଶବିତ୍ ଓ ଚାଷୀମାନେ କହିଛନ୍ତି।
ଗରଦପୁର ବ୍ଲକ ଅଧୀନ ବେଡାରୀ ପଞ୍ଚାୟତ ହରିଦାସପୁର ଗାଁର ଅକ୍ଷୟ କୁମାର ଦାସ ନଳିତା ଚାଷ କରନ୍ତି। ଏଥିପାଇଁ ଚଳିତବର୍ଷ ଖୋଲା ବଜାରରୁ ୨ କିଗ୍ରା ନଳିତା ମଞ୍ଜି ଆଣି ୫୦ ଡେସିମିଲ ଜମିରେ ଚାଷ କରିଛନ୍ତି। ଚାଷ ପାଇଁ ୩୭ଶହ ଟଙ୍କା ସେ ଖର୍ଚ୍ଚ କରିଛନ୍ତି। ନଳିତା କାଟିବା ଓ ବାଡ଼େଇବା ପାଇଁ ୧୦ ହଜାର ଟଙ୍କା ମଜୁରି ଦେଇଛନ୍ତି। ଯାହା କିଛି ଝୋଟ ହେବ ସେଥିରେ ପରିବାରର ଗୁଜରାଣ ମେଣ୍ଟିଯିବ। ସେ ପଡ଼ୋଶୀଙ୍କୁ ଦୀପାବଳି ପାଇଁ କାଉଁରିଆ କାଠି ବାଣ୍ଟିପାରିବେ। ଗାଁର କରୁଣାକର ରାଉତ, ଚିନ୍ମୟ ରାଉତ, ଶିଶିର ଦାସ ପ୍ରମୁଖ ନଳିତା ଚାଷୀମାନେ ସରକାରୀ ପ୍ରୋତ୍ସାହନ ପାଇଁ ଦାବି କରିଛନ୍ତି। ଏହା ହେଲେ ନଳିତା ଚାଷ ପ୍ରତି ଚାଷୀଙ୍କ ଆଗ୍ରହ ବଢ଼ିବ ବୋଲି କହିଛନ୍ତି।