ଭୁବନେଶ୍ୱର,୪।୨(ବ୍ୟୁରୋ): ଚନ୍ଦ୍ରଶେଖରପୁର ଥାନା ଅନ୍ତର୍ଗତ ଏମ୍ବାସି ବାର୍ ଭଙ୍ଗାରୁଜା ଏବଂ କର୍ମଚାରୀଙ୍କୁ ଆକ୍ରମଣ ଘଟଣାରେ ଫେରାର ଥିବା ଅନ୍ୟଜଣେ ଅଭିଯୁକ୍ତ ତଥା କେବିଏନ ଗ୍ୟାଙ୍ଗର ମୁଖ୍ୟଙ୍କୁ ମାସକ ପରେ ଧରିଛି ପୋଲିସ। ସେ ହେଲେ ଏୟାରପୋର୍ଟ ଥାନା ଅଞ୍ଚଳରେ ରହୁଥିବା କେନ୍ଦ୍ରାପଡାର ବୁବୁ ଜେନା ଓରଫ ଦେବୀ ପ୍ରସାଦ ଜେନା। ତାଙ୍କଠାରୁ ଗୋଟିଏ କାର୍ ଜବତ ହୋଇଛି। କିନ୍ତୁ ଘଟଣାର ମୁଖ୍ୟ ଅଭିଯୁକ୍ତ ତଥା ଏକ ନିର୍ଦ୍ଦିଷ୍ଟ ଦଳର ଛାତ୍ର ନେତା ସଞ୍ଜୀବ ସ୍ବାଇଁ ଏବେ ବି ଫେରାର ରହିଥିବା ଜଣାପଡିଛି। ସେହିପର ଏହି ଘଟଣାରେ ପୂର୍ବରୁ ୩୪ଜଣ ଗିରଫ ହୋଇ ସାରିଛନ୍ତି। ଅଭିଯୁକ୍ତ ବୁବୁଙ୍କ ନାଁରେ ଖଣ୍ଡଗିରି ଥାନାରେ ସର୍ବାଧିକ ୧୦ଟି ଅପରାଧିକ ମାମଲା ରହିଥିବାବେଳେ ନୟାପଲ୍ଲୀ ଥାନାରେ ୫ଟି ଏବଂ କେନ୍ଦ୍ରାପଡ଼ା ଜିଲା ଅନ୍ତର୍ଗତ ରାଜନଗର ଥାନାରେ ଗୋଟିଏ ଆପରାଧିକ ମାମଲା ରହିଥିବା ତଦନ୍ତରୁ ଜଣାପଡିଛି। ଅଭିଯୁକ୍ତ ଜଣକ କ୍ରମାଗତ ଭାବେ ବିଭିନ୍ନ ଆପରାଧିକ ମାମଲାରେ ସମ୍ପୃକ୍ତ ରହୁଥିବାରୁ ତାଙ୍କ ବିରୋଧରେ ସିଆର୍ପିସି -୧୧୦ ଧାରା ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯିବା ଲାଗି ପଦକ୍ଷେପ ନିଆଯାଉଛି।
ସୂଚନାନୁଯାୟୀ, ଜାନୁୟାରୀ ୭ ବିଳମ୍ବିତ ରାତିରେ ଲକ୍ଷ୍ମୀସାଗର ଥାନା ଅଞ୍ଚଳର ଛାତ୍ରନେତା ସଞ୍ଜୀବ ସାଙ୍ଗଙ୍କ ସହ ଦେବକୁଣ୍ଡ ଅଭିମୁଖେ ପିକ୍ନିକ୍ ଯିବାକୁ ବାହାରିଥିଲେ। ଯିବାପୂର୍ବରୁ ମଦ ପିଇବାକୁ ଘଟଣାଦିନ ଏମ୍ବାସି ବାରକୁ ସଞ୍ଜୀବ ଯାଇଥିବାବେଳେ ସେଠାରେ ସିକ୍ୟୁରିଟି ଗାର୍ଡ ଗେଟ ନ ଖୋଲିବାରୁ ଉଭୟଙ୍କ ମଧ୍ୟରେ ଯୁକ୍ତି ତର୍କ ଆରମ୍ଭ ହୋଇଥିଲା। ଏହାପରେ ସଞ୍ଜୀବ ବରମୁଣ୍ଡା ବସଖଷ୍ଟାଣ୍ଡରେ ଅପେକ୍ଷା କରିଥିବା ତାଙ୍କର ସାଙ୍ଗମାନଙ୍କୁ ଫୋନ କରି ଡ଼ାକିଥିଲେ। ପିକନିକ ପାଇଁ ବାହାରିଥିବା ସମସ୍ତେ ଏକାଠି ହୋଇ ବସ ସହାୟତାରେ ଘଟଣା ସ୍ଥଳରେ ପହଞ୍ଚତ୍ ବାର୍ କର୍ମଚାରୀଙ୍କୁ ଅଶ୍ରାବ୍ୟ ଭାଷାରେ ଗାଳିଗୁଲଜ କରିବା ସହିତ ମୁନିଆ ପଥର ସାହାଯ୍ୟରେ ମରଣାନ୍ତକ ଆକ୍ରମଣ କରିଥିଲେ। ଏହାସହ ବାର୍ର ସମସ୍ତ ଆସବାବପତ୍ର ସବୁକୁ ବାଡ଼େଇ ଭାଙ୍ଗି ଦେଇଥିଲେ। ଏନେଇ ବାରର ମ୍ୟାନେଜର ଚନ୍ଦ୍ରଶେଖରପୁର ଥାନାରେ ଅଭିଯୋଗ କରିଥିଲେ।