ହାଇଦ୍ରାବାଦ,୧ା୫: ସମ୍ବିଧାନ ପ୍ରଣେତା ବାବା ଭୀମରାଓ ଆମ୍ବେଡ୍କରଙ୍କ ନାମାନୁସାରେ ତେଲଙ୍ଗାନାର ନୂଆ ସଚିବାଳୟର ନାମକରଣ କରାଯାଇଛି। ଜନ ପ୍ରତିନିଧିମାନେ ଓ ସମ୍ପୂର୍ଣ୍ଣ ସରକାରୀ ବ୍ୟବସ୍ଥା ଭାରତୀୟ ସମ୍ବିଧାନର ସ୍ଥପତି ଅମ୍ବେଡକରଙ୍କ ଆଦର୍ଶକୁ ହୃଦୟଙ୍ଗମ କରିବା ଦିଗରେ କାର୍ଯ୍ୟ କରିବା ଉଚିତ ବୋଲି ରବିବାର ନବନିର୍ମିତ ସଚିବାଳୟକୁ ଲୋକାପର୍ଣ କରିବା ଅବସରରେ ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ କହିଛନ୍ତି।
ଏକର ବିସ୍ତୃତ ଭୂମିରେ ନିର୍ମିତ ଏହି ସଚିବାଳୟ କମ୍ପ୍ଲେକ୍ସର ଉଚ୍ଚତା ହେଉଛି ୨୬୫ ମିଟର। ମୋଟ ୧୦,୫୧,୬୭୬ ବର୍ଗ ଫୁଟ୍ ଜାଗାରେ ନିର୍ମାଣ କାର୍ଯ୍ୟ ହୋଇଛି। ଏହାର ଉଦ୍ଘାଟନୀ ସଭାରେ ଭାରତ ରାଷ୍ଟ୍ର ସମିତି (ବିଆର୍ଏସ୍) ମୁଖ୍ୟ ତଥା ମୁଖ୍ୟମନ୍ତ୍ରୀ କେସିଆର୍ କହିଛନ୍ତି, ସେ ଏହି ଭବ୍ୟ ସଚିବାଳୟ କମ୍ପ୍ଲେକ୍ସକୁ ଲୋକାର୍ପିତ କରି ନିଜକୁ ଧନ୍ୟ ମଣୁଛନ୍ତି। ଆମ୍ବେଡ୍କରଙ୍କ ଆଦର୍ଶକୁ ଆଗକୁ ବଢ଼ାଇବା ପାଇଁ ସଚିବାଳୟକୁ ନିୟମିତ ଆସୁଥିବା ସମସ୍ତ ମନ୍ତ୍ରୀ ଓ କର୍ମଚାରୀ ତାଙ୍କ ନାମ ଏବଂ ସନ୍ଦେଶକୁ ହୃଦୟଙ୍ଗମ କରି ଜନସେବାରେ ନିଜକୁ ନିୟୋଜିତ କରିବା ଉଚିତ। ତେଲଙ୍ଗାନା ନାମରେ ସ୍ବତନ୍ତ୍ର ରାଜ୍ୟ ଗଠନ ସକାଶେ ସେ ଗାନ୍ଧିଜୀଙ୍କ ଆଦର୍ଶକୁ ଅନୁସରଣ କରିଥିଲେ। ଆମ୍ବେଡ୍କରଙ୍କ ଦୂରଦୃଷ୍ଟି ଯୋଗୁ ସମ୍ବିଧାନର ଅନୁଚ୍ଛେଦ ୩ ଅନୁସାରେ ନୂଆ ରାଜ୍ୟ ଗଠନ ସମ୍ଭବ ହୋଇପାରିଥିଲା। ଏହି ଅବସରରେ କେସିଆର୍ ବିରୋଧୀଙ୍କୁ ଟାର୍ଗେଟ କରି କହିଥିଲେ, ନୂଆ ସଚିବାଳୟ ପ୍ରତିଷ୍ଠା ହେବାର ତାତ୍ପର୍ଯ୍ୟ ନୁହେଁ ଯେ, ପୁରୁଣା କୋଠାକୁ ଭାଙ୍ଗିଦେବା। ରାଜ୍ୟକୁ କମ୍ ସମୟ ମଧ୍ୟରେ ବିଭିନ୍ନ କ୍ଷେତ୍ରରେ ବିକାଶ ପାଇଁ ଅନେକ ଲକ୍ଷ କୋଟି ଟଙ୍କାର ନିବେଶ ଆସିପାରିଛି। ଏହା ଏକ ବଡ଼ ସଫଳତା ବୋଲି କେସିଆର୍ କହିଛନ୍ତି। ଏହି ଅବସରରେ ରାଜ୍ୟର ସମସ୍ତ ମନ୍ତ୍ରୀ ଏବଂ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।