ନୂଆଦିଲ୍ଲୀ,୧୯।୧୨: ପଞ୍ଜାବ କଂଗ୍ରେସ ମୁଖ୍ୟ ନବଜୋତ ସିଂ ସିଦ୍ଧୁ ମଦ, ଖଣି ଓ ରାଜ୍ୟରେ ନିଯୁକ୍ତି ଉପରେ ବିତର୍କ ଲାଗି ଦେଇଥିବା ଚ୍ୟାଲେଞ୍ଜକୁ ଗ୍ରହଣ କରିଛନ୍ତି ଆମ ଆଦମି ପାର୍ଟି (ଏଏପି)ର ଜାତୀୟ କନଭେନର ଅରବିନ୍ଦ କେଜ୍ରିଓ୍ବାଲ। ବିତର୍କ ଲାଗି ତାରିଖ, ସମୟ ଓ ସ୍ଥାନ ଧାର୍ଯ୍ୟ କରିବାକୁ କହିଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ। ଏଥିସହ ଏଏପିର ପଞ୍ଜାବ ସଭାପତି ଭାଗଓ୍ବନ୍ତ ମନ୍ନଙ୍କୁ ବିତର୍କ ଲଗି ମନୋନୀତ କରିଛନ୍ତି।
“ବିତର୍କ ଲାଗି ସିଦ୍ଧୁଙ୍କ ଚ୍ୟାଲେଞ୍ଜକୁ ମୁଁ ଗ୍ରହଣ କରୁଛି। ଆଶା କରୁଛି ବିକାଶର ବିଭିନ୍ନ ପ୍ରସଙ୍ଗ ଉପରେ ଏହା ଫଳପ୍ରଦ ହେବ। ସିଦ୍ଧୁ ସ୍ଥାନ ଓ ସମୟ ବାଛନ୍ତୁ” ବୋଲି ଚଣ୍ଡିଗଡ଼ ବିମାନ ବନ୍ଦରରେ କେଜ୍ରିଓ୍ବାଲ ଖବରଦାତାଙ୍କୁ କହିଛନ୍ତି।
ଏଏପି ସୁପ୍ରିମୋ କହିଛନ୍ତି, ପଞ୍ଜାବର ବିକାଶ ଲାଗି କଂଗ୍ରେସ ହାତରେ ୫ ବର୍ଷ ଥିଲା। କିନ୍ତୁ ସେମାନେ ଲୋକଙ୍କୁ ଧୋକା ଦେଲେ। ଡ୍ରାମା ଓ ବାହାନ ଛଡ଼ା କିଛି କଲେ ନାହିଁ। ଅମ୍ରିତସର ସ୍ବର୍ଣ୍ଣ ମନ୍ଦିରରେ ଘଟିଥିବା ଘଟଣା ଉପରେ ସେ କହିଛନ୍ତି, ଏହି ଘଟଣା ଏକ ସୁଚିନ୍ତିତ ଷଡ଼ଯନ୍ତ୍ରର ଅଂଶ ହୋଇପାରେ। କିଛି ଭୁଲ ଶକ୍ତି ପଞ୍ଜାବର ଶାନ୍ତିକୁ ନଷ୍ଟ କରିବାକୁ ଉଦ୍ୟମ କରୁଛନ୍ତି। ଯଦି ପୂର୍ବ ଘଟଣାରେ ଦୋଷୀଙ୍କୁ କଠୋର ଦଣ୍ଡ ଦିଆଯାଇଥାନ୍ତା ତେବେ କେହି ଏଭଳି ଅପରାଧ ଭିୟାଇବାକୁ ସାହସ କରି ନ ଥାନ୍ତେ। ମୁଁ ଆଶା କରୁଛି ପୋଲିସ ଘଟଣାରେ ସମ୍ପୃକ୍ତ ବ୍ୟକ୍ତଙ୍କୁ ଯଥା ଶୀଘ୍ର ଧରିବ।