କେଜରିଓ୍ବାଲ ସରକାରଙ୍କ ବଡ ଘୋଷଣା, ୨୦୦ ୟୁନିଟ ପର୍ଯ୍ୟନ୍ତ ବିଜୁଳି ମାଗଣା, ୪୦୦ ପର୍ଯ୍ୟନ୍ତ…

ନୂଆଦିଲ୍ଲୀ,୭।୩: ରାଜଧାନୀ ଦିଲ୍ଲୀରେ ଅରବିନ୍ଦ କେଜରିୱାଲ ସରକାର ଆସିବା ପରଠାରୁ ଲୋକଙ୍କୁ ଗତ ୯ ବର୍ଷ ଧରି ବିଦ୍ୟୁତ ବିଲ ଉପରେ ରିହାତି ଦିଆଯାଉଛି। ଭବିଷ୍ୟତରେ ଏହି ରିହାତି ଜାରି ରହିବ କି ନାହିଁ ସେନେଇ ଆଜି ଦିଲ୍ଲୀ କ୍ୟାବିନେଟର ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କ ବ୍ୟତୀତ ମନ୍ତ୍ରୀ ସୌରଭ ଭରଦ୍ବାଜ, ଆତିଶି, ଇମ୍ରାନ ହୁସେନ, କୈଳାଶ ଗେହଲୋଟ, ଗୋପାଳ ରାୟ ଏବଂ ରାଜକୁମାର ଆନନ୍ଦ ଉପସ୍ଥିତ ଥିଲେ। ଭବିଷ୍ୟତରେ ୨୦୦ୟୁନିଟ ପର୍ଯ୍ୟନ୍ତ ମାଗଣା ବଦ୍ୟୁତ୍‌ ମଧ୍ୟ ଜାରି ରହିବ ବୋଲି ବୈଠକରେ ନିଷ୍ପତ୍ତି ନିଆଯାଇଛି। ସମାନ ଧାଡିରେ ଦିଲ୍ଲୀର ଲୋକଙ୍କୁ ପୂର୍ବ ପରି ୪୦୦ୟୁନିଟ ପର୍ଯ୍ୟନ୍ତ ଅଧା ବିଲ ଦେବାକୁ ପଡିବ। ଏହି ପ୍ରସଙ୍ଗରେ ସରକାର ଆଜି ଏକ ଜରୁରୀ ବୈଠକ ଡାକିଥିଲେ।
କେବଳ ଏକ ମାସ ପୂର୍ବରୁ କେଜରିୱାଲ ସରକାର ଦିଲ୍ଲୀର ଲୋକଙ୍କ ପାଇଁ ଏକ ନୂତନ ସୌର ନୀତି ଆଣିଥିଲେ ଯାହା ଅଧୀନରେ ସରକାର ନିଜ ଘରର ଛାତରେ ସୌର ପ୍ୟାନେଲ ଲଗାଉଥିବା ଲୋକଙ୍କୁ ମାଗଣାରେ ବିଦ୍ୟୁତ ଯୋଗାଇବାକୁ ପ୍ରସ୍ତୁତ ହେଉଛନ୍ତି। ସୌର ନୀତି ୨୦୨୪ ବିଷୟରେ ସୂଚନା ଦେବାବେଳେ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ କହିଥିଲେ ଯେ ଶିଳ୍ପ ପରିଚାଳନା କରୁଥିବା ଲୋକମାନେ ମଧ୍ୟ ଏହା ଅଧୀନରେ ଉପକୃତ ହେବେ। ସେମାନଙ୍କର ବାଣିଜି୍ୟକ ୟୁନିଟ ଗୁଡିକରେ ସୌର ପ୍ୟାନେଲ ସ୍ଥାପନ କରି ଲୋକଙ୍କ ବିଦ୍ୟୁତ ବିଲ ଅଧା ହ୍ରାସ କରାଯାଇପାରେ। ଦିଲ୍ଲୀ ମୁଖ୍ୟମନ୍ତ୍ରୀ କହିଛି ଯେ ଯେଉଁମାନେ ନିଜ ଘରର ଛାତରେ ସୌର ପ୍ୟାନେଲ ଲଗାନ୍ତି ସେମାନେ ଯେତେ ୟୁନିଟ ବିଦ୍ୟୁତ୍‌ ଖର୍ଚ୍ଚ କଲେ ମଧ୍ୟ ଶୂନ ବିଲ ଦେବାକୁ ପଡିବ।