ନୂଆଦିଲ୍ଲୀ,୬।୧୧: ମନିଲଣ୍ଡରିଂ ମାମଲାରେ ତିହାର ଜେଲରେ ସଜା କାଟୁଥିବା କନ୍ମ୍ୟାନ୍ ସୁକେଶ ଚନ୍ଦ୍ରଶେଖର ଶନିବାର ଆଉ ଏକ ଚିଠି ଗଣମାଧ୍ୟମରେ ପ୍ରକାଶ କରିଛନ୍ତି। ରାଜ୍ୟ ସଭା ଆସନର ପ୍ରଲୋଭନ ଦେଖାଇ ଆମ୍ ଆଦ୍ମୀ ପାର୍ଟି ମୁଖ୍ୟ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ତାଙ୍କଠାରୁ ୫୦ କୋଟି ଟଙ୍କା ନେଇଥିବା ଉକ୍ତ ଚିଠିରେ ସୁକେଶ ଉଲ୍ଲେଖ କରିଛନ୍ତି। ଏଥିସହ ୨୦୧୬ରେ କର୍ନାଟକ ଓ ତାମିଲନାଡୁରେ ଏଏପି ପାର୍ଟି ଫଣ୍ଡିଂ ପାଇଁ ୨୦-୩୦ ଜଣ ଲୋକଙ୍କୁ ଏକାଠି କରି ୫୦୦ କୋଟି ଟଙ୍କା ଦେବା ଲାଗି କେଜ୍ରିଓ୍ବାଲ ସୁକେଶଙ୍କୁ କହିଥିବା ଜଣାପଡ଼ିଛି। ୫୦ କୋଟି ଟଙ୍କା ନେବା ପରେ କେଜ୍ରିଓ୍ବାଲ ସୁକେଶଙ୍କ ସହ ଏକ ଡିନର ପାର୍ଟିରେ ଯୋଗ ଦେଇଥିଲେ।
ତେବେ ସୁକେଶଙ୍କ ଚିଠିକୁ ନେଇ ଏଏପି ମୁଖପାତ୍ର ସୌରଭ ଭରଦ୍ୱାଜ କହିଛନ୍ତି, ଗୁଜରାଟ ଓ ଦିଲ୍ଲୀ ପୌର ନିର୍ବାଚନ ଫଳକୁ ନେଇ ଭାଜପା ଖୁବ୍ ଚିନ୍ତିତ। ସେଥିପାଇଁ ଦଳ କନ୍ମ୍ୟାନ୍ ସୁକେଶ ଚନ୍ଦ୍ରଶେଖରକୁ ନିଜ ଷ୍ଟାର କ୍ୟାମ୍ପେନର ସଜାଇଛି। ଏହାପୂର୍ବରୁ ଦିଲ୍ଲୀ ଗୃହମନ୍ତ୍ରୀ ସତ୍ୟେନ୍ଦ୍ର ଜୈନ ସୁକେଶଙ୍କୁ ଜେଲରେ ସୁରକ୍ଷା ଦେବା ଲାଗି ଅର୍ଥ ଦାବି କରିଥିଲେ ବୋଲି ସେ ଦିଲ୍ଲୀ ଉପରାଜ୍ୟପାଳଙ୍କ ଉଦ୍ଦେଶ୍ୟରେ ଏକ ଚିଠି ଲେଖିଥିଲେ। ଅନ୍ୟପକ୍ଷେ ଜେଲ ଭିତରେ ସ୍ବତନ୍ତ୍ର ସୁବିଧା ଯୋଗାଇବା ସକାଶେ ସୁକେଶ ଜେଲ ଅଫିସରମାନଙ୍କୁ ଲାଞ୍ଚ ଦେବା ନେଇ ଅଭିଯୋଗ ତାଙ୍କ ନାମରେ ରହିଛି।
