ନିଶ୍ଚିନ୍ତକୋଇଲି,୨୬।୧୧(ଅଶୋକ କୁମାର ମହାପାତ୍ର)ବେକାର ଯୁବତୀ ଯୁବକମାନଙ୍କୁ ଆତ୍ମନିର୍ଭରଶୀଳ କରାଇବା ଓ ସେମାନଙ୍କର ଆର୍ଥତ୍କ ପରିସ୍ଥିତିକୁ ସୁଦୃଢ କରାଇବା ଉଦ୍ଦେଶ୍ୟରେ ମାହାଙ୍ଗା ନିର୍ବାଚନ ମଣ୍ଡଳୀ ଅଧୀନ କେନ୍ଦୁପାଟଣାଠାରେ ଏକ ଡେଏରି ପ୍ରତିଷ୍ଠା କରିବାକୁ ସରକାର ଯୋଜନା କରିଥିଲେ। ୨୦୧୯ ଫେବୃୟାରୀ ୧୭ରେ ଏହାର ଶିଳାନ୍ୟାସ କରାଯାଇଥିଲା। ଏଥପାଇଁ ସରକାର ୧୨କୋଟି ୪୯ ଲକ୍ଷ ଟଙ୍କା ଅର୍ଥ ମଞ୍ଜୁର କରିଥିଲେ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ତକତ୍ାଳୀନ କଟକ ଜିଲାପାଳ ଅରବିନ୍ଦ ଅଗ୍ରୱାଲ ତକତ୍ାଳୀନ କଟକ ଜିଲା ପରିଷଦ ଅଧ୍ୟକ୍ଷା ଜ୍ୟୋତିରେଖା ନାୟକ, ବିଜେଡି ଏମ୍ପି ଅନୁଭବ ମହାନ୍ତି, ନରେନ୍ଦ୍ର ସ୍ବାଇଁଙ୍କ ସମେତ କଟକ ଜିଲାର ବିଧାୟକମାନେ ଏହି କାର୍ଯ୍ୟକ୍ରମରେ ଯୋଗଦେଇଥିଲେ।
ମାତ୍ର ଠିକାଦାରଙ୍କ ମନମୁଖି କାମ ଓ ଅତ୍ୟନ୍ତ ମନ୍ଥର ଗତିରେ ନିର୍ମାଣ କାର୍ଯ୍ୟ ଚାଲିଥିବା କାରଣରୁ ଅବଧି ଶେଷ ହେବାର ୩ ବର୍ଷ ପରେ ମଧ୍ୟ ପ୍ରକଳ୍ପ ନିର୍ମାଣ କାର୍ଯ୍ୟ ପୂର୍ଣ୍ଣାଙ୍ଗ ହୋଇପାରିନାହିଁ। କେନ୍ଦ୍ର ସରକାର ଟେଣ୍ଡର ମାଧ୍ୟମରେ ଏହି ପକ୍ରଳ୍ପ ପାଇଁ ଠିକାଦାର ଚୟନ କରିଥିଲେ। ମାତ୍ର ସମ୍ପୃକ୍ତ ଠିକାଦାର ଅଟକଳ ଅନୁଯାୟୀ କାର୍ଯ୍ୟ କରି ନ ଥିବା ବେଳେ ନିର୍ମାଣ କାର୍ଯ୍ୟରେ ନିମ୍ନମାନର ସାମଗ୍ରୀ ବ୍ୟବହାର କରାଯାଇଥିବା ଅଭିଯୋଗ ହୋଇଛି। ଫଳରେ ଏହାର ସ୍ଥାୟିତ୍ୱ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଅପରପକ୍ଷେ ଏହି ପ୍ରକଳ୍ପର ନିର୍ମାଣ କାର୍ଯ୍ୟ ୨ ବର୍ଷ ମଧ୍ୟରେ ଶେଷ ହେବା କଥା। ଇତିମଧ୍ୟରେ ୫ ବର୍ଷ ବିତିଯାଇଥିଲାବେଳେ କେବେଳ ଗୃହ ନିର୍ମାଣ କାର୍ଯ୍ୟ ପୂର୍ଣ୍ଣାଙ୍ଗ ହୋଇସାରିଛି। ଏପର୍ଯ୍ୟନ୍ତ ପ୍ରକଳ୍ପରେ କୌଣସି ଯନ୍ତ୍ରାଂଶ ଲଗାଯାଇ ପାରିନାହିଁ। ଫଳରେ ନିର୍ମାଣ କାର୍ଯ୍ୟର ପୂର୍ଣ୍ଣାଙ୍ଗ ନେଇ ଅନିଶ୍ଚିତତା ପ୍ରକାଶ ପାଇଛି। ଏହି ପ୍ରକଳ୍ପ ପୂର୍ଣ୍ଣାଙ୍ଗ ହୋଇଥିଲେ ଏଠାରେ ୩୦୦ରୁ ୪ଶହ ବେକାର ଯୁବତୀଯୁବକଙ୍କୁ ଆମତ୍ ନିଯୁକ୍ତି ଦିଆଯାଇ ପାରିଥାନ୍ତା। ମାତ୍ର ବିଳମ୍ବ କାରଣରୁ ଏହି ଆଶା ପାଣି ଫୋଟକା ପରି ମିଳାଇ ଯାଇଛି।
ସୂଚନାଯୋଗ୍ୟ, ଏହି ପ୍ରକଳ୍ପ ନିର୍ମାଣ ନିମନ୍ତେ କେନ୍ଦୁପାଟଣା ନିୟନ୍ତ୍ରିତ ବଜାର କମିଟି ପ୍ରାୟ ୫ ଏକର ଜମି ଯୋଗାଇ ଦେଇଥିଲେ। ଏହି ପ୍ରକଳ୍ପରେ ଦୁଗ୍ଧ ପ୍ୟାକେଟ ପ୍ରସ୍ତୁତ ହେବା ସହ ଆଇସକ୍ରିମ ମଧ୍ୟ ପ୍ରସ୍ତୁତ ହୋଇ ଅନ୍ୟତ୍ର ବିକ୍ରୟ ପାଇଁ ପଠାଯିବାକୁ ଯୋଜନା କରାଯାଇଥିଲା। ତେବେ କୋଭିଡ୍ ମହାମାରୀ ସମୟରେ ନିର୍ମାଣ କାର୍ଯ୍ୟରେ ବ୍ୟାଘାତ ସୃଷ୍ଟି ହୋଇଥିଲା। ଏହି ସମୟରେ ପ୍ରକଳ୍ପରେ ବିନିଯୋଗ ହେବାକୁ ଥିବା ଯନ୍ତ୍ରାଂଶର ମୂଲ୍ୟ ଅହେତୁକ ବୃଦ୍ଧି ପାଇଥିଲା। ମୂଲ୍ୟବୃଦ୍ଧି ଯୋଗୁ ଏପର୍ଯ୍ୟନ୍ତ ପ୍ରକଳ୍ପ ପାଇଁ କୌଣସି ଯନ୍ତ୍ରାଂଶ କିଣାଯାଇ ପାରି ନଥିବା ବେଳେ ପୂର୍ଣ୍ଣାଙ୍ଗ ପାଇଁ ଆହୁରି ୫କୋଟି ଟଙ୍କାର ଆବଶ୍ୟକ ଥିବା ବିଶେଷ ସୂତ୍ରରୁ ଜଣାପଡିଛି। ଅପରପକ୍ଷରେ କେନ୍ଦ୍ର ଓ ରାଜ୍ୟ ସରକାରଙ୍କ ମଧ୍ୟରେ ଆନ୍ତରିକତା ଅଭାବ ଯୋଗୁ ପ୍ରକଳ୍ପ କାର୍ଯ୍ୟ ଶେଷ ହୋଇ ପାରୁନାହିଁ ବୋଲି ସାଧାରଣରେ ଅଭିଯୋଗ ହୋଇଛି।
ଏସମ୍ପର୍କରେ ବିଭାଗୀୟ ସହକାରୀ ଅଧିକାରୀ ସୁଧାଂଶୁ ଶେଖର ପଣ୍ଡାଙ୍କୁ ବାରମ୍ବାର କଲ୍ କରାଯାଇଥିଲେ ମଧ୍ୟ ସେ ନ ଉଠାଇବାରୁ ମତାମତ ମିଳିପାରିନାହିଁ।