କେନ୍ଦୁଝର, ୨୯ା୮(ସ୍ବ.ପ୍ର.): କେନ୍ଦୁଝର ସହରର ବିଭିନ୍ନ ସାହି ଗଳିରେ ଚା’ ଦୋକାନ ଖୋଲିଛି। କିନ୍ତୁ ସିନେମା ହଲ ନିକଟରେରେ ଥିବା ବିଦେଶୀ ନାୟକ(୭୧)ଙ୍କ ଦୋକାନରୁ ଚା’ପିଇବାର ମଜା ଅଲଗା। ଏଥିପାଇଁ ସକାଳ ଓ ସନ୍ଧ୍ୟାରେ ଭିଡ ଜମିଥାଏ। ଚାକିରିଆ ଲୋକଙ୍କ ଠାରୁ ଆରମ୍ଭ କରି ସାଧାରଣ ଲୋକଙ୍କ ପସନ୍ଦ ତାଙ୍କ ହାତ ତିଆରି ନାଲି ଚା’। ମାତ୍ର ୫ ଟଙ୍କା ବିଭିନ୍ନ ପ୍ରକାରର ମସଲାରେ ତିଆରି ନାଲି ଚା’ପିଇବା ପାଇଁ ବିଭିନ୍ନ ସ୍ଥାନରୁ ଲୋକ ଆସିଥାନ୍ତି ା
୫୦ ବର୍ଷ ହେଲା ଉକ୍ତ ସ୍ଥାନରେ ପ୍ରଥମେ ଜଳଖିଆ ଓ ପରେ ଚା’ ଦୋକାନ କରି ଲୋକଙ୍କୁ ସେବା ଯୋଗାଇ ଆସୁଛନ୍ତି। ଘରେ କହିଲେ ତାଙ୍କ ସ୍ତ୍ରୀ ପ୍ରମିଳା ନାୟକ ଅଛନ୍ତି। ସେ ତାଙ୍କର ଦୁଇ ଶିଶୁ ପୁତ୍ରଙ୍କୁ ହରାଇବା ପରେ ସ୍ବାମୀ ସ୍ତ୍ରୀ ଦୁଇଜଣ ଗୌରତୋଟାସାହିରେ ରହିଆସୁଛନ୍ତି। ବିଦେଶୀ ବାର୍ଦ୍ଧକ୍ୟ ଭତ୍ତା ପାଉଥିଲେ ହେଁ ତାଙ୍କ ସ୍ତ୍ରୀଙ୍କୁ ଏଯାଏ ଭତ୍ତା ମିଳିନାହିଁ। ଏଣୁ ଏହି ବୟସରେ ମଧ୍ୟ ଦୁଇ ପଇସା ରୋଜଗାର କରିବା ସହ ଲୋକଙ୍କ ସହିତ ସମୟ କଟାଉଛନ୍ତି। ତାଙ୍କର ସରଳ ଓ ଶାନ୍ତ ବ୍ୟବହାର ସମସ୍ତଙ୍କୁ ଆକୃଷ୍ଟ କରିଥାଏ। ଏଣୁ ତାଙ୍କ ହାତରୁ କପେ ଚା’ ପିଇବା ପାଇଁ ସକାଳ ସନ୍ଧ୍ୟାରେ ଧନୀଗରୀବ, ପିଲା ଓ ବୁଢା, ଚାକିରିଆ ହେଉବା ଅବସରନେଇଥିବା ଲୋକ ସମସ୍ତେ ଚାଲିଚାଲି ବା ଗାଡ଼ିରେ ଆସିଥାନ୍ତି। ଦିନେ ଦୋକାନ ବନ୍ଦ ହେଲେ ଲୋକ ମାନେ ଆସି ନିରାଶ ହୋଇ ଫେରିଯାଆନ୍ତି ା ଏଠାରେ ଅନେକ ଚା’ ପିଇବା ସହ ଗପସପ କରିଥାନ୍ତି। ବିଦେଶୀ ଲୋକଙ୍କ ଆବଶ୍ୟକ ମୁତାବକ ନାଲି ତଥା କ୍ଷୀର ଚା’ ପ୍ରସ୍ତୁତ କରି ଦେଇଥାନ୍ତି ା ଆଗରୁ ସେଭଳି କେହି ନାଲି ଚା’ ପିଇବାକୁ ପସନ୍ଦ କରୁ ନ ଥିଲେ। କିନ୍ତୁ କରୋନା ମହାମାରୀ ବ୍ୟାପିବା ପରେ ଗତ ବର୍ଷରୁ ନାଲି ଚା’ର ଚାହିଦା ବଢିଯାଇଛି ା ନାଲି ଚା’ର ଡିମାଣ୍ଡ ବଢ଼ିଯାଇଛି। ବୟସ ହୋଇଗଲାଣି ା ଏଣୁ ଆଉ କିଛି ବ୍ୟବସାୟ କରିବାକୁ ଆଗ୍ରହ ନାହିଁ ା କିନ୍ତୁ ବଳବୟସ ଥିବା ପର୍ଯ୍ୟନ୍ତ ଲୋକଙ୍କୁ ଚା’ ପିଆଇବି ବୋଲି ସେ କୁହନ୍ତି ା