ପାଟଣା,୨।୫(ବୀର କିଶୋର ଦାଶ):କେନ୍ଦୁଝର ଜିଲା ପାଟଣା ବ୍ଲକ ବାଉଁଶୁଳି ଏବଂ ଏହାର ଆଖପାଖ ଅଞ୍ଚଳରେ କାଳ ବୈଶାଖୀ ତାଣ୍ଡବ ରଚିଛି। କାଳ ବୈଶାଖୀ ପ୍ରଭାବରେ ପ୍ରବଳ ବର୍ଷା ସହ ଝଡ଼ ତୋଫାନ ଯୋଗୁ ବିଦ୍ୟୁତ ଖୁଣ୍ଟଗୁଡିକ ଉପୁଡି ପଡିବା ସହ ବାଉଁଶୁଳି ଗୁଜୁରୀ ସାହିରେ ୩ ଘରର ଛପର ଉଡି ଯାଇଥିବାବେଳେ ରେଙ୍ଗାଳବେଡା ବାରଡାଙ୍ଗୁଆ ରେ ମଧ୍ୟ ଅନେକ ଘର କ୍ଷତିଗ୍ରସ୍ତ ହୋଇଛି। ବାଉଁଶୁଳି ଉଖୁଣ୍ଡା ରାସ୍ତାରେ ଗଛ ପଡି ରାସ୍ତା ଅବରୋଧ ହୋଇ ଯାତାୟାତ ବାଧାପ୍ରାପ୍ତ ହୋଇଛି। ଏଥି ସହ ୪୯ ନମ୍ବର ଜାତୀୟ ରାଜପଥ ରେଙ୍ଗାଳବେଡା ନିକଟରେ ବିଦ୍ୟୁତ ଖୁଣ୍ଟ ଭାଙ୍ଗି ବୋଲେରୋ ଉପରେ ପଡିଛି। ବୋଲେରୋ କ୍ଷତିଗ୍ରସ୍ତ ହୋଇଛି।
ଅନୁରୂପ ଭାବେ ୪୯ ନମ୍ବର ଜାତୀୟ ରାଜ୍ୟପଥ ରେଙ୍ଗାଳବେଡା ନିକଟରେ ଗଛ ଡାଳ ପଡି ରାଜପଥ ଅବରୋଧ ହୋଇଛି। ରେଙ୍ଗାଳବେଡା ଗ୍ରାମ୍ୟ ଜଙ୍ଗଲରେ ତମ୍ବୁ ମାରି ରହିଥିବା ଯାଯାବରଙ୍କ ଉପରେ ଗଛ ଡାଳ ଖସି ପଡି ଯିବାରୁ ୨ ଣ ମହିଳା ଗୁରୁତର ହୋଇଛନ୍ତି । ଅଙ୍ଗିକଳା ଗ୍ରାମରେ ଘର କାନ୍ଥ ପଡି ଜଣେ ବ୍ୟକ୍ତି ଗୁରୁତର ହୋଇଛନ୍ତି। ବର୍ଷା ଯୋଗୁ ଘରର କାନ୍ଥ ପଡିଯିବାରୁ ସେ ଚାପି ହୋଇ ରହିଥିଲେ। ଘଟଣା ସ୍ଥଳରେ ତୁରୁମୁଙ୍ଗା ଥାନା ଅଧିକାରୀ ଧର୍ମେନ୍ଦ୍ର ଶାନ୍ତି ଏବଂ ଅନ୍ୟ କର୍ମଚାରୀ ପହଞ୍ଚି ତାଙ୍କୁ ଉଦ୍ଧାର କରି ୧୦୮ଆମ୍ବୁଲାନ୍ସ ସହାୟତାରେ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରିଛନ୍ତି। ବର୍ଷା ପବନ ଯୋଗୁ ଅଞ୍ଚଳରେ ବିଦ୍ୟୁତ ଖୁଣ୍ଟ ଉପୁଡି ପଡିବାରୁ ଅଞ୍ଚଳରେ ବିଦ୍ୟୁତ ସେବା ବିଛିନ୍ନ ହୋଇଛି।