ସାରା ଦେଶରେ କରୋନା ସଂକ୍ରମଣ ଦିନକୁ ଦିନ ବଢ଼ିବାରେ ଲାଗିଛି। ପ୍ରତିଦିନ ହଜାର ହଜାର ସଂଖ୍ୟାରେ ଲୋକ ଏଥିରେ ଆକ୍ରାନ୍ତ ହେଉଥିବା ବେଳେ ଶହ ଶହ ଲୋକଙ୍କ ଜୀବନହାନି ଘଟୁଛି। କରୋନା ସହ ଏହି ଲଢ଼େଇରେ ପ୍ରମୁଖ ଯୋଦ୍ଧା ପାଲଟିଛନ୍ତି ଦେଶର ଡାକ୍ତର ଏବଂ ସ୍ବାସ୍ଥ୍ୟ କର୍ମଚାରୀମାନେ । ନିଜ ଜୀବନକୁ ଖାତିର ନ କରି ସେମାନେ ଲୋକମାନଙ୍କୁ ସେବା ଯୋଗାଇ ଆସୁଛନ୍ତି। ହେଲେ କିଛି ଲୋକ ଏହି କୋଭିଡ ଯୋଦ୍ଧାଙ୍କୁ ଅସମ୍ମାନ କରୁଥିବା ଦେଖିବାକୁ ମିଳୁଛି। କେରଳର ତିରୁଅନନ୍ତପୁରମ୍ରେ ଏଭଳି ଏକ ଘଟଣା ଘଟିଛି। କୋଭିଡ-୧୯ ଚିକିତ୍ସା କରୁଥିବା ମେଡିକାଲ ଟିମ୍ ଉପରେ କିଛି ଲୋକ ଆକ୍ରମଣ କରିଛନ୍ତି। ଏପରିକି ଏହି ସମୟରେ ଜଣେ ବ୍ୟକ୍ତି ଡାକ୍ତରଙ୍କ ମୁହଁରେ କାଶିଥିବା ଜଣାପଡ଼ିଛି।
ଶୁକ୍ରବାର ୨୫ବର୍ଷୀୟ ଜଣେ ଡାକ୍ତର ନିଜ କାରରେ କୋଭିଡର କଣ୍ଟେନ୍ମେଣ୍ଟ ଜୋନରେ ପହଞ୍ଚିଥିଲେ। ସେଠାରେ ସେ ସାମୁଦାୟିକ କେନ୍ଦ୍ର ଯାଇ ନିଜ ଟିମ୍ ସହ ମିଶି ନିକଟସ୍ଥ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚିଥିଲେ। ସେଠାରୁ ତାଙ୍କୁ ପିପିଇ କିଟ୍ ପିନ୍ଧି ସ୍ବାବ୍ ସଂଗ୍ରହ କରିବାର ଥିଲା। ହେଲେ ସ୍ବାସ୍ଥ୍ୟକେନ୍ଦ୍ର ଗେଟ୍ ବନ୍ଦ ଥିଲା। ଏହି ସମୟରେ ୫୦ରୁ ଅଧିକ ଲୋକ ତାଙ୍କୁ ଘେରିଯାଇ ଗଣ୍ଡଗୋଳ କରିଥିଲେ। ଡାକ୍ତରଙ୍କୁ ଏ ବିଷୟରେ ଜଣା ନ ଥିବାରୁ ସେ ଫସି ଯାଇଥିଲେ। ଏହି ସମୟରେ ଡାକ୍ତରଙ୍କ ସହ ଦୁଇଜଣ ନର୍ସ ଏବଂ ଟେକ୍ନିସିଆନ୍ ଥିଲେ।
ଲୋକମାନେ ଗାଡ଼ିକୁ ଘେରି ଯିବାରୁ ଡାକ୍ତର କାଚ ଖୋଲି କଥା ହେବାକୁ ଚେଷ୍ଟା କରିଥିଲେ। ହେଲେ ଜଣେ ବ୍ୟକ୍ତି ଗାଡ଼ି ଭିତରେ ମୁହଁ ଗଳାଇ ଜୋର୍ରେ କାଶିବାକୁ ଆରମ୍ଭ କରିଥିଲା। ଏପରି କରିବା ସମୟରେ ଯଦି ଆମେ କୋଭିଡ ପଜିଟିଭ୍ ତେବେ ତୁମକୁ ହେବା ଉଚିତ ବୋଲି କହିଥିlଲେ। ଏହା ଶୁଣି ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ।
ତେବେ ଉକ୍ତ ଡାକ୍ତରଜଣଙ୍କ ୧୦ ଦିନ ପୂର୍ବରୁ ପ୍ରାକ୍ଟିସ୍ ଆରମ୍ଭ କରିଥିଲେ। ମହାମାରୀ ସମୟ ହେତୁ ତାଙ୍କୁ ଗ୍ରାମୀଣ ଅଞ୍ଚଳରେ ଡ୍ୟୁଟି କରିବାର ଥିଲା। ହେଲେ ଏଭଳି ଘଟଣା ଘଟିବା ପରେ ତାଙ୍କୁ କ୍ୱାରାଣ୍ଟାଇନ୍ରେ ରହିବାକୁ କୁହାଯାଇଛି। ତାଙ୍କର କୋଭିଡ ଟେଷ୍ଟ ମଧ୍ୟ କରାଯିବ। ଯଦି ତାହା ନେଗେଟିଭ୍ ଆସେ ତେବେ ସେ ୭ ଦିନ ପରେ କାର୍ଯ୍ୟରେ ଯୋଗ ଦେଇପାରିବେ ।