ଥିରୁଭାନନ୍ତମପୁରମ,୧୩।୯: କେରଳର ପୂର୍ବତନ ମନ୍ତ୍ରୀ ତଥା ଜନତା ଦଳର ବରିଷ୍ଠ ନେତା ପ୍ରଫେସର ଏନ୍ଏମ୍ ଜୋସେଫଙ୍କ ପରଲୋକ ଘଟିଛି। ୭୯ବର୍ଷ ବୟସରେ ସେ ଶେଷ ନିଃଶ୍ୱାସ ତ୍ୟାଗ କରିଛନ୍ତି। ମଙ୍ଗଳବାର ସକାଳେ ପାଲା ମେରିୟନ୍ ମେଡିକାଲ ସେଣ୍ଟରରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି। ବୁଧବାର ରୀତିନୀତିରେ ତାଙ୍କର ଶେଷକୃତ୍ୟ ଅନୁଷ୍ଠିତ ହେବ। ମଙ୍ଗଳବାର ଅପରାହ୍ନ ୪ଟାରେ ତାଙ୍କ ମୃତଦେହ ପାଲା କଡାପଟ୍ଟୁର ସ୍ଥିତ ବାସଭବନକୁ ଅଣାଯିବ। ଏନେଇ ଜୋସେଫଙ୍କ ପରିବାରଲୋକଙ୍କ ପକ୍ଷରୁ ସୂଚନା ଦିଆଯାଇଛି। ଅନ୍ୟପଟେ ଜୋସେଫଙ୍କ ବିୟୋଗରେ କେରଳର ମୁଖ୍ୟମନ୍ତ୍ରୀ ପିନରାଇ ବିଜୟନ ଶୋକବ୍ୟକ୍ତ କରିଛନ୍ତି। ଏଥିସହ ତାଙ୍କ ପରିବାର ଲୋକଙ୍କୁ ମୁଖ୍ୟମନ୍ତ୍ରୀ ସମବେଦନା ଜଣାଇଛନ୍ତି। ସୂଚନାଯୋଗ୍ୟ, ୧୯୪୩ ଅକ୍ଟୋବର ୧୮ରେ ଜୋସେଫ ଜନ୍ମଗ୍ରହଣ କରିଥିଲେ। ସେ ଯୁବ କଂଗେସରୁ ନିଜର ରାଜନୈତିକ କ୍ୟାରିଅର ଆରମ୍ଭ କରିଥିଲେ। ପରେ ସେ ଯୁବ କଂଗ୍ରେସ ରାଜ୍ୟ ଉପାଧ୍ୟକ୍ଷ ହୋଇଥିଲେ। ୧୯୭୭ରେ ଜୋସେଫ ଜନତା ଦଳରେ ଯୋଗଦେଇଥିଲେ। ୧୯୮୭ରୁ ୧୯୯୧ ପର୍ଯ୍ୟନ୍ତ ଏକେ ନାୟନରଙ୍କ ସରକାରରେ ସେ ଜଙ୍ଗଲବିଭାଗର ମନ୍ତ୍ରୀ ଥିଲେ। ଏତଦ୍ ବ୍ୟତୀତ ପାଲାର ସେଣ୍ଟ ଥୋମାସ୍ କଲେଜରେ ସେ ଅର୍ଥନୀତିର ପ୍ରଫେସର ମଧ୍ୟ ରହିଥିଲେ। ସେହିପରି ଜୋସେଫ କେରଳରେ ଜନତା ଦଳର ଅଧ୍ୟକ୍ଷ ତଥା ରାଷ୍ଟ୍ରୀୟ ଅଧ୍ୟକ୍ଷ ମଧ୍ୟ ରହିଥିଲେ।
