ଥିରୁଅନନ୍ତପୁରମ୍, ୧୨।୧: ମହାମାରୀ କରୋନାଠାରୁ ରକ୍ଷା ପାଇବା ପାଇଁ ବିଗତ ଏକ ବର୍ଷ ହେବ ସମସ୍ତ ଦେଶ ଏବଂ ରାଜ୍ୟ ସରକାର ଲୋକଙ୍କୁ ସହାୟତା ଯୋଗାଇ ଆସୁଛନ୍ତି। ଏହି ଭାଇରସ ଯୋଗୁ ସମସ୍ତେ ବହୁତ କଷ୍ଟ ସହିଛନ୍ତି। କିନ୍ତୁ ସିନେମା କ୍ଷେତ୍ରରେ ସମଗ୍ର ଦେଶ ବର୍ତ୍ତମାନ ପର୍ଯ୍ୟନ୍ତ ସମସ୍ୟାର ସମ୍ମୁଖୀନ ହେଉଛି। ସିନେମାର ସ୍ଥିତିକୁ ଦୃଷ୍ଟିରେ ରଖି କେରଳ ସରକାର ଏକ ନିଷ୍ପତ୍ତି ନେଇଛି। ଯାହା ପ୍ରକୃତରେ ପ୍ରଶଂସନୀୟ।
କେରଳ ସରକାର ଜାନୁୟାରୀରୁ ମାର୍ଚ୍ଚ ୨୦୨୧ ମଧ୍ୟରେ ସିନେମା ହଲ୍ରୁ(ପ୍ରେକ୍ଷାଳୟରୁ) କର ନ ନେବାକୁ ନିଷ୍ପତ୍ତି ନେଇଛି। ଏଥିସହ ସିନେମାଘରକୁ ବିଦ୍ୟୁତ ବିଲ୍ରେ ୫୦ ପ୍ରତିଶତ ରିଲିଫ ମଧ୍ୟ ଦିଆଯାଇଛି। ଦେଶର ଅନ୍ୟ ରାଜ୍ୟଗୁଡ଼ିକର ସରକାର ଏ ନେଇ କୌଣସି ସୁବିଧା ବା ଛାଡ଼ ଦେଇ ନ ଥିବା ଜଣାପଡ଼ିଛି।
କିଛି ଦିନ ପୂର୍ବରୁ ତାମିଲନାଡୁ ସରକାର ପ୍ରେକ୍ଷାଳୟକୁ ନିଜ ରାଜ୍ୟରେ ୧୦୦ ପ୍ରତିଶତ ଖୋଲିବାକୁ ଅନୁମତି ଦେଇଥିଲେ। କିନ୍ତୁ କେନ୍ଦ୍ର ସରକାରଙ୍କ ଆପତ୍ତି କାରଣରୁ ନିଷ୍ପତ୍ତି ପ୍ରତ୍ୟାହାର କରିବାକୁ ପଡିଥିଲା। ୫ ଜାନୟାରୀରୁ ଏକାସାଙ୍ଗରେ ଚଳଚ୍ଚିତ୍ର ଦେଖିବା ପାଇଁ ୫୦ ପ୍ରତିଶତ ଲୋକଙ୍କ ଅନୁମତି କ୍ରମେ କେରଳରେ ପ୍ରେକ୍ଷାଳୟ ଖୋଲାଯାଇଛି।