ଥିରୁଭାନନ୍ଥପୁରମ୍,୧୦।୧୧: କେରଳ କଳାମଣ୍ଡଳମ୍ ଡିମ୍ଡ-ଟୁ ୟୁନିଭର୍ସିଟି କୁଳାଧିପତି ପଦରୁ ରାଜ୍ୟପାଳ ଅରିଫ୍ ମହମ୍ମଦ ଖାନ୍ଙ୍କୁ ରାଜ୍ୟ ସରକାର ଗୁରୁବାର ହଟାଇ ଦେଇଛନ୍ତି। ରାଜ୍ୟ ବିଶ୍ୱବିଦ୍ୟାଳୟଗୁଡ଼ିକରେ କୁଳପତି ନିଯୁକ୍ତିକୁ ନେଇ କିଛିଦିନ ହେଲା ରାଜ୍ୟପାଳ ଏବଂ ପିନାରାୟୀ ବିଜୟନ ସରକାରଙ୍କ ମଧ୍ୟରେ ବିବାଦ ଲାଗିରହିଥିଲା। ରାଜ୍ୟ ସରକାର ବିଶ୍ୱବିଦ୍ୟାଳୟ ନିୟମରେ ପରିବର୍ତ୍ତନ କରି ରାଜ୍ୟପାଳଙ୍କ ସ୍ଥାନରେ କଳା ଓ ସଂସ୍କୃତି କ୍ଷେତ୍ରର ଜଣେ ଖ୍ୟାତନାମା ବ୍ୟକ୍ତିଙ୍କୁ କୁଳାଧିପତି କରିଥିବା ଘୋଷଣା କରିଛନ୍ତି। ଅଣଭାଜପା ଶାସିତ ରାଜ୍ୟ କେରଳ ସମେତ ତାମିଲନାଡୁ ଓ ତେଲଙ୍ଗାନାରେ ରାଜ୍ୟପାଳ ଏବଂ ସରକାରଙ୍କ ମଧ୍ୟରେ ବିବାଦ ଲାଗିରହିଥିବା ଖବର ପ୍ରକାଶ ପାଇଥିଲା। ତାମିଲନାଡୁ ସରକାର ରାଜ୍ୟପାଳ ଆର୍.ଏନ୍. ରବିଙ୍କ ପ୍ରତ୍ୟାହାର ଚାହୁଁଥିବା ବେଳେ କେରଳ ସରକାର ରାଜ୍ୟପାଳ ଖାନ୍ଙ୍କୁ ବିଶ୍ୱବିଦ୍ୟାଳୟଗୁଡ଼ିକର କୁଳାଧିପତି ପଦରୁ ହଟାଇବା ଲାଗି ସ୍ବତନ୍ତ୍ର ଅଧ୍ୟାଦେଶ ଆଣିବାକୁ ପ୍ରସ୍ତାବ ରଖିଛନ୍ତି। ରାଜ୍ୟପାଳ ରାଜ୍ୟ ବିଶ୍ୱବିଦ୍ୟାଳୟଗୁଡ଼ିକର କୁଳପତି ରହିବା ଆବଶ୍ୟକ ନାହିଁ ବୋଲି ବିଜୟନ ସରକାର କହିଛନ୍ତି। ସେହିପରି ତେଲଙ୍ଗାନା ରାଜ୍ୟପାଳ ତାମିଲିସାଇ ସୌନ୍ଦରାରାଜନ ପଡୋଶୀ ରାଜ୍ୟ ରାଜନୀତିରେ ହସ୍ତକ୍ଷେପ କରୁଥିବା ଅଭିଯୋଗ ହୋଇଛି।