ଥିରୁଭାନନ୍ତପୁରମ୍,୨୩।୯: ରାଷ୍ଟ୍ରୀୟ ଏଜେନ୍ସି ଏନ୍ଆଇଏ ଏବଂ ଇଡି ଚଢ଼ାଉ ପ୍ରତିବାଦରେ ପପୁଲାର ଫ୍ରଣ୍ଟ ଅଫ୍ ଇଣ୍ଡିଆ (ପିଏଫ୍ଆଇ) ପକ୍ଷରୁ ଗୁରୁବାର ସାରା କେରଳରେ ବିକ୍ଷୋଭ ପ୍ରଦର୍ଶନ କରାଯାଇଥିଲା। ଏପରିକି କେନ୍ଦ୍ରୀୟ ଏଜେନ୍ସିଗୁଡ଼ିକର କାର୍ଯ୍ୟକୁ ବିରୋଧ କରି ସଂଗଠନ ପକ୍ଷରୁ କେରଳରେ ଶୁକ୍ରବାର ସକାଳ ୬ରୁ ସନ୍ଧ୍ୟା ୬ଟା ପର୍ଯ୍ୟନ୍ତ ୧୨ ଘଣ୍ଟିଆ ହରତାଳ ଡାକରା ଦିଆଯାଇଛି। ଏହି ପରିପ୍ରେକ୍ଷୀରେ କେରଳର ଅନେକ ସ୍ଥାନରେ ହିଂସା ପରିସ୍ଥିତି ସୃଷ୍ଟି ହୋଇଛି। ପିଏଫ୍ଆଇ କର୍ମୀମାନେ ବିଭିନ୍ନ ଛକରେ ବିକ୍ଷୋଭ ପ୍ରଦର୍ଶନ କରିବା ସହ ଭଙ୍ଗାରୁଜା କରିଥିବା ଜଣାପଡିଛି।
ଏପରି କି ପିଏଫ୍ଆଇ କର୍ମୀ ଏବଂ ସମର୍ଥକମାନେ କୋଚି ସମେତ ବିଭିନ୍ନ ସ୍ଥାନରେ ପ୍ରତିବାଦ ସଭାର ଆୟୋଜନ କରିଥିଲେ। ହେଲେ କୌଣସି ଅଘଟଣକୁ ରୋକିବା ପାଇଁ ବିଭିନ୍ନ ସ୍ଥାନରେ ପୋଲିସ ଫୋର୍ସ ମୁତୟନ କରାଯାଇଛି। ଏପରିକି ସରକାରୀ, ବେସରକାରୀ ସମ୍ପତ୍ତିର କ୍ଷତି ରୋକିବା ପାଇଁ ପର୍ଯ୍ୟାପ୍ତ ପଦକ୍ଷେପ ନେବାକୁ କେରଳ ହାଇକୋର୍ଟ ପୋଲିସକୁ ନିର୍ଦ୍ଦେଶ ଦେଇଛନ୍ତି।
ଇତିମଧ୍ୟରେ କୋଲାମ ଜିଲାରେ ପିଏଫଆଇ ସମର୍ଥକମାନେ ଦୁଇ ପୋଲିସ କର୍ମଚାରଙ୍କ ଉପରେ ଆକ୍ରମଣ କରିଥିବା ପୋଲିସ କହିଛି।
ଏଥିସହ କିଛି ସମର୍ଥକ ଘରୋଇ ଯାନ ଉପରେ ଆକ୍ରମଣ କରିଥିବା ଜଣାପଡିଛି। ଆନ୍ଦୋଳନକାରୀମାନେ ବିମାନ ବନ୍ଦରକୁ ଯାଉଥିବା ଏକ କାର ଉପରେ ଆକ୍ରମଣ କରିଛନ୍ତି। ହିଂସାକାଣ୍ଡକୁ ଦୃଷ୍ଟିରେ ରଖି କୋଟାୟାମ ଜିଲାର ଏରାଟୁପେଟାଠାରେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ପୋଲିସ ୫ ପିଏଫଆଇ କର୍ମଚାରୀଙ୍କୁ ଅଟକ ରଖିଛି। ପିଏଫଆଇ କାର୍ଯ୍ୟକର୍ତ୍ତା ଆଲୁଭାର କେଏସ୍ଆର୍ଟିସି ବସ୍ ଡିପୋରେ ପସି ବସ୍ଗୁଡିକୁ ଅଟକାଇବା ସହ ପଥର ମାଡ଼ କରି କାଚ ଭାଙ୍ଗି ଦେଇଛନ୍ତି।