ପାଟନା,୩।୧୦: କେରଳରେ ପ୍ରବଳ ବର୍ଷା କାରଣରୁ ରାଜ୍ୟର ଅନେକ ଅଞ୍ଚଳରେ ବନ୍ୟା ପରିସ୍ଥିତି ଉପୁଜିଛି। ଅନେକ ଅଞ୍ଚଳ ଜଳମଗ୍ନ ରହିଥିବା ବେଳେ ଅନେକ ଲୋକ ରିଲିଫ କ୍ୟାମ୍ପରେ ରହିଛନ୍ତି। ସତର୍କତାମୂଳକ ପଦକ୍ଷେପ ଭାବରେ ପ୍ରଶାସନ ମଙ୍ଗଳବାର ସ୍କୁଲ ଓ କଲେଜଗୁଡ଼ିକୁ ବନ୍ଦ ରଖିଛନ୍ତି। ସୂଚନାଯୋଗ୍ୟ, କେରଳର କୋଟାୟାମ, ବାୟକୋମ ଏବଂ ଚଙ୍ଗାନାସେରି ତାଲୁକାରେ ବନ୍ୟା ପରି ପରିସ୍ଥିତି ଯୋଗୁ ୧୭ ଟି ରିଲିଫ କ୍ୟାମ୍ପ ଗଠନ କରାଯାଇଛି, ଯେଉଁଠାରେ ପ୍ରାୟ ୨୪୬ ଲୋକ ରହିଛନ୍ତି।
କେରଳର ଆଲାପୁଝାଠାରେ ପ୍ରବଳ ବର୍ଷା ହେତୁ ଜିଲା ପ୍ରଶାସନ ଶିକ୍ଷାନୁଷ୍ଠାନଗୁଡ଼ିକୁ ବନ୍ଦ ରଖିବାକୁ ନିର୍ଦ୍ଦେଶ ଦେଇଛନ୍ତି। ଜିଲାର ଚେର୍ଥାଲା ଏବଂ ଚେଙ୍ଗାନୁର ତାଲୁକାରେ ରିଲିଫ କ୍ୟାମ୍ପ ନିର୍ମାଣ କରାଯାଇଛି। ମଙ୍ଗଳବାର କେରଳର ଥିରୁବନନ୍ତପୁରମ, କୋଲମ, ଆଲାପୁଝା, କୋଟୟମ ଏବଂ ପଥାନମାଥ୍ରତା ଜିଲାରେ ମଧ୍ୟ ହାଲୁକା ବର୍ଷା ହୋଇପାରେ ବୋଲି ଭାରତୀୟ ପାଣିପାଗ ବିଭାଗ ପୂର୍ବାନୁମାନ କରିଛି। କେତେକ ସ୍ଥାନରେ ପ୍ରବଳ ବର୍ଷା ଯୋଗୁ ୟେଲୋ ଓ୍ବାର୍ନିଂ ଜାରି କରାଯାଇଛି। ପାଣିପାଗ ବିଭାଗ କହିଛି ଯେ, ଏହି ଜିଲାର କେତେକ ସ୍ଥାନରେ ୬ ସେଣ୍ଟିମିଟରରୁ ୧୧ ସେଣ୍ଟିମିଟର ପର୍ଯ୍ୟନ୍ତ ବର୍ଷା ହୋଇପାରେ।