ତେନ୍ତୁଳିଖୁଣ୍ଟି, ୧୦।୧୦(ଡି.ଏନ୍.ଏ.): ଖେଳିବା ଦୌଡ଼ିବା ବୟସରେ କଥା କହି ପାରୁନାହାନ୍ତି କି ଠିକ୍ଭାବେ ଠିଆ ହୋଇ ପାରୁ ନାହାନ୍ତି। ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ବ୍ଲକ ମଞ୍ଚାଗାଁ ପଞ୍ଚାୟତ ବାରିଆଘାଟ ଗ୍ରାମର ଦୈତାରି ମୁଦୁଲିଙ୍କ ପୁଅ କେଶବ ରୋଗ କାରଣରୁ ଏଭଳି କଷ୍ଟ ପାଉଛନ୍ତି। ୬ ବର୍ଷର କେଶବ ସେରେବ୍ରାଲ ପାଲ୍ସୀ ରୋଗରେ ଆକ୍ରାନ୍ତ। ବାପା ଦୈତାରିଙ୍କ ପାଖରେ ଅର୍ଥ ନ ଥିବାରୁ ପୁଅ କେଶବଙ୍କ ଚିକତ୍ସା କରାଇ ପାରୁ ନାହାନ୍ତି। ତେଣୁ ସରାକାରୀ ସହାୟତା ଯୋଗାଇଦେବାକୁ ସେ ଅନୁରୋଧ କରିଛନ୍ତି।
ବୟସ ବଢ଼ିବା ସହ କେଶବଙ୍କ ରୋଗ ଏବଂ ଅସୁସ୍ଥତା ବଢ଼ିବାରେ ଲାଗିଛି। ମା’, ବାପା ମଧ୍ୟ ପୁଅ ଚିନ୍ତାରେ ଭାଙ୍ଗି ପଡ଼ିଲେଣି। ୬ ବର୍ଷ ହେଲା ପୁଅର ଚିକିତ୍ସା ପାଇଁ ସଂଘର୍ଷ କରୁଥିବାବେଳେ ସରକାରଙ୍କ ପକ୍ଷରୁ କୌଣସି ସୁବିଧା ପାଇପାରି ନ ଥିବା ଦୈତାରି କହିଛନ୍ତି। ସେରେବ୍ରାଲ ପାଲ୍ସୀ ରୋଗୀ ବୋଲି କେବଳ ୪୦ ପ୍ରତିଶତ ଭିନ୍ନକ୍ଷମ ପ୍ରମାଣପତ୍ରଟିଏ ମିଳିଛି। ରୋଗ ଜଣାପଡ଼ିବା ପରେ ତେନ୍ତୁଳିଖୁଣ୍ଟି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ କେଶବଙ୍କ ଚିକିତ୍ସା କରାଯାଇଥିଲା। ଏହାପରେ ତାଙ୍କୁ ନବରଙ୍ଗପୁର ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ସ୍ବାସ୍ଥ୍ୟାବସ୍ଥାରେ ସୁଧାର ନ ଆସିବାରୁ ତାଙ୍କୁ କୋରାପୁଟ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ସେଠାରେ କିଛି ଦିନ ରହିବା ପରେ ଘରକୁ ଫେରି ଆସିଛନ୍ତି। ହେଲେ ପୁଅର ସ୍ବାସ୍ଥାବସ୍ଥାରେ ସୁଧାର ଆସିନାହିଁ। ପୁଅର ସ୍ବାସ୍ଥ୍ୟାବସ୍ଥା ବିଷୟରେ ତେନ୍ତୁଳିଖୁଣ୍ଟି ବ୍ଲକ ଅଫିସ ସମେତ ଅନେକ ଲୋକଙ୍କୁ ଜଣାଇଥିଲେ ମଧ୍ୟ ସହାୟତା ମିଳିପାରିନି। ପାଖରେ ଅର୍ଥ ନ ଥିବାରୁ ଭଲ ଡାକ୍ତରଖାନାକୁ ନେବାରେ ସମର୍ଥ ହୋଇପାରୁ ନାହାନ୍ତି। ରୋଜଗାର ଟଙ୍କାରେ ୫ ପ୍ରାଣୀ କୁଟୁମ୍ବ ଚଳିବା କଷ୍ଟକର ହେଉଛି ବୋଲି ଦୈତାରି କହିଛନ୍ତି। ଏଥିସହ ପୁଅର ଚିକିତ୍ସା ପାଇଁ ସହାୟତା ଯୋଗାଇଦେବାକୁ ଦୈତରି ପ୍ରଶାସନ ଓ ସରକାରଙ୍କୁ ନିବେଦନ କରିଛନ୍ତି।