କେସିଙ୍ଗା,୪।୪(ଡି.ଏନ୍.ଏ.): କଳାହାଣ୍ଡି ଜିଲା କେସିଙ୍ଗା ପଞ୍ଚାୟତ ସମିତିର ଭାଇସଚେୟାର ମେନ(ଉପାଧ୍ୟକ୍ଷ) ନିର୍ବାଚନ ଶେଷ ହୋଇଛି। ଉପାଧ୍ୟକ୍ଷ ଭାବେ ଦେଓଗାଁ ପଞ୍ଚାୟତ ସମିତି ସଭ୍ୟା ରାଜଲଷ୍ମୀ ପଟ୍ଟନାୟକ ନିର୍ବାଚିତ ହୋଇଛନ୍ତି। ହେଲେ ବ୍ଳକ କାର୍ଯ୍ୟାଳୟରେ ତାଙ୍କୁ ବସିବା ପାଇଁ ପ୍ରକୋଷ୍ଠ ଦିଆଯାଉ ନ ଥିବା ସୋମବାର ଜିଲାପାଳଙ୍କ ନିକଟରେ ରାଜଲକ୍ଷ୍ମୀ ଅଭିଯୋଗ କରିଛନ୍ତି।
ସୂଚନାଯୋଗ୍ୟ, ରାଜ୍ୟ ସରକାର ମହିଳାଙ୍କୁ ସମ୍ମାନ ଓ ସୁରକ୍ଷା ଦେବା କଥା କହି ଡିଣ୍ଡିମ ପିଟୁ ଥିବା ବେଳେ କେସିଙ୍ଗା ବ୍ଲକ ଅଧ୍ୟକ୍ଷ ଚନ୍ଦନ ସେନାପତି ଉପାଧ୍ୟକ୍ଷଙ୍କୁ ପ୍ରକୋଷ୍ଠ ଦେବା ପାଇଁ ମନା କରୁଛନ୍ତି। ଏନେଇ ଦୁଇ ଦୁଇ ଥର ଜିଲାପାଳଙ୍କ ନିକଟରେ ଅଭିଯୋଗ ହେବା ଘଟଣା କେସିଙ୍ଗା ସହରରେ ଚର୍ଚ୍ଚାର ବିଷୟ ହୋଇଛି।
ଅଧ୍ୟକ୍ଷ ଓ ଉପାଧ୍ୟକ୍ଷା ବ୍ଲକର ଦୁଇଟି ଗୁରୁତ୍ୱପୂର୍ଣ୍ଣ ପଦବୀ। ହେଲେ ଉପାଧ୍ୟକଙ୍କୁ ବସିବା ପାଇଁ ପ୍ରକୋଷ୍ଠ ନ ମିଳିବା ପରିତାପର ବିଷୟ ବୋଲି ଉପାଧ୍ୟକ୍ଷାଙ୍କ କିଛି ସମର୍ଥକ କହିଛନ୍ତି। ଏପରିକି ବ୍ଳକ ଅଧ୍ୟକ୍ଷ ଉପାଧ୍ୟକ୍ଷାଙ୍କ ପାଇଁ ପ୍ରକୋଷ୍ଠ ଦେବାକୁ ମନା କରୁଛନ୍ତି। ଆଗରୁ ଉପାଧ୍ୟକ୍ଷାଙ୍କ ପାଇଁ ରହିଥିବା ପ୍ରକୋଷ୍ଠକୁ ନବ ନିର୍ବାଚିତ ଅଧ୍ୟକ୍ଷ ଜୋରଜବରଦସ୍ତ ମାଡି ବସିଛନ୍ତି। ଏପରି କି ବିଡିଓ ଅନ୍ୟ ଏକ ପ୍ରକୋଷ୍ଠ ଦେବାକୁ ଚାହୁଁଥିଲେ ମଧ୍ୟ ଅଧ୍ୟକ୍ଷ ବାରଣ କରୁଥିବା ଅଭିଯୋଗ ହୋଇଛି। ଜିଲାର ୧୨ଟି ବ୍ଲକରେ ଉପାଧ୍ୟକ୍ଷା ପ୍ରକୋଷ୍ଠ ରହି ଥିବା ବେଳେ କେସିଙ୍ଗା ବ୍ଲକର ନୀତି ଅଲଗା କି ବୋଲି ରାଜଲକ୍ଷ୍ମୀ ପ୍ରଶ୍ନ ଉଠାଇଛନ୍ତି। ଏନେଇ ରାଜଲକ୍ଷ୍ମୀ ନିଜ ସମର୍ଥକଙ୍କ ସହ ୧୫ ଜଣ ସମିତି ସଭ୍ୟଙ୍କୁ ଧରି ଜିଲାପାଳଙ୍କ ନିକଟରେ ଘଟଣା ସମ୍ପର୍କରେ ଅଭିଯୋଗ କରିଛନ୍ତି।
କଳାହାଣ୍ଡି ଜିଲାପାଳ ଡ.ପରାଗ ହର୍ଷଦ ଗାଭାଲି ଅଭିଯୋଗକୁ ଗ୍ରହଣ କରି ଉପାଧ୍ୟକ୍ଷାଙ୍କ ପାଇଁ ବ୍ଲକ ପରିସରରେ ସ୍ବତନ୍ତ୍ର ପ୍ରକୋଷ୍ଠ ଯୋଗାଇ ଦିଆଯିବ ବୋଲି ପ୍ରତିଶ୍ରୁତି ଦେଇଥିଲେ। ପରେ ଉପାଧ୍ୟକ୍ଷ ଏବଂ ସମର୍ଥକ ଫେରି ଆସିଛନ୍ତି।
ଏ ସଂକ୍ରାନ୍ତରେ କେସିଙ୍ଗା ବ୍ଲକ ଅଧ୍ୟକ୍ଷ ଚନ୍ଦନ ସେନାପତିଙ୍କୁ ପଚାରିବାରୁ ବ୍ଳକ କାର୍ଯ୍ୟାଳୟରେ ରୁମ୍ କମ୍ ଥିବାରୁ ମୋ ରୁମ୍ରେ ଚେୟାର ପକାଇ ବସିବା ପାଇ କହିଥିବା ପ୍ରକାଶ କରିଛନ୍ତି। ଏ ନେଇ କେସିଙ୍ଗା ବିଡିଓ ପ୍ରଫୁଲ୍ଲ କୁମାର ଅଦୁଙ୍କୁ ପଚାରିବାରୁ ବ୍ଲକ ଅଧ୍ୟକ୍ଷ ରୁମ ଦେବା ପାଇଁ ମନା କରୁଛନ୍ତି। ଏପରି କି ସେ ରାଜନୀତି ଚାପ ସୃଷ୍ଟି କରୁଥିବା ସେ ପ୍ରକାଶ କରିଛନ୍ତି।