ଜମ୍ମୁ,୨୯।୧୧: ବିଶ୍ୱକପ୍ ଫାଇନାଲରେ ଅଷ୍ଟ୍ରେଲିଆଠାରୁ ଭାରତର ପରାଜୟକୁ ଦୁର୍ଭାଗ୍ୟର କଥା ବୋଲି କହିଛନ୍ତି ଇଂଲଣ୍ଡର ପୂର୍ବତନ ଅଧିନାୟକ କେଭିନ ପିଟରସେନ। ସେହିଭଳି ନିଜ ଟିମ୍ର ପ୍ରଦର୍ଶନକୁ ସେ ନୈରାଶ୍ୟଜନକ ବୋଲି କହିବାକୁ ପଛାଇ ନାହାନ୍ତି।
ଲିଜେଣ୍ଡ୍ସ ଲିଗ୍ କ୍ରିକେଟ ଖେଳିବାକୁ ଆସିଥିବା ପିଟରସେନ କହିଛନ୍ତି, ‘ଦୁର୍ଭାଗ୍ୟର କଥା ଯେ ଯେତେବେଳେ ଅଷ୍ଟ୍ରେଲିଆର ସାମ୍ନା କୌଣସି ଟିମ୍ କରେ, ଯେମିତିକି ମୁଁ ନିଜ କ୍ୟାରିୟରରେ ଅନେକ ଥର କରିଛି, ସହଜ ହୋଇ ନ ଥାଏ। କାରଣ ଅଷ୍ଟ୍ରେଲିଆ ମଜଭୂତ ପ୍ରତିନ୍ଦ୍ୱନ୍ଦ୍ୱୀ। ସେ ଦଳର ଖେଳାଳିଙ୍କ ପାଖରେ ଫାଇନାଲରେ ବାଜି ପଲଟାଇବାର କ୍ଷମତା ରହିଛି। ଏପରିକି ଦଳ ଅନୁକୂଳରେ ପରିଣାମ ହାସଲ କରିବାର ଶକ୍ତି ରହିଛି। ଭାରତର ଦୁର୍ଭାଗ୍ୟ ଥିଲା ଯେ ବୋଲିଂ ଏବଂ ଫିଲ୍ଡିଂ ଜବରଦସ୍ତ କରିଥିଲା ଅଷ୍ଟ୍ରେଲିଆ। ପରେ ଯେତେବେଳେ ସେମାନେ ବ୍ୟାଟିଂ ପାଇଁ ଆସିଲେ ୨୩୦/୨୪୦ର ବିଜୟ ଲକ୍ଷ୍ୟ କଷ୍ଟସାଧ୍ୟ ନ ଥିଲା।’
ସେହିଭଳି ଇଂଲଣ୍ଡର ପ୍ରଦର୍ଶନକୁ ନେଇ ପିଟରସେନ କହିଛନ୍ତି, ତାହା ନୈରାଶ୍ୟଜନକ ଥିଲା। କେହି ବି ଭାବି ନ ଥିଲେ ଯେ ତାଙ୍କ ଦଳ ଫାଇନାଲରେ ପ୍ରବେଶ କରିବ। ଭାରତ ଯେତେବେଳେ ଗୁଆହାଟୀରେ ଇଂଲଣ୍ଡ ବିପକ୍ଷରେ ଖେଳୁଥିଲା ସେତେବେଳେ ମୁଁ କହିଥିଲି ଯେ ଚଳିତ ବିଶ୍ୱକପ୍ରେ ଏହି ଦୁଇ ଟିମ୍ ଫାଇନାଲ ଖେଳିବେ। ହେଲେ ଇଂଲଣ୍ଡ ଯେଉଁଭଳି ପ୍ରଦର୍ଶନ କଲା, ତାହା ଅବିଶ୍ୱସନୀୟ ଥିଲା ବୋଲି ସେ କହିଛନ୍ତି।