ବିବାହ ଜୀବନର ଏକ ଅବିସ୍ମରଣୀୟ ମୁହୂର୍ତ୍ତ। ତେଣୁ ଏହାକୁ ଅଭୁଲା କରିବା ଲାଗି ଅନେକେ ଅଜବ ପନ୍ଥା ଆପଣେଇବାକୁ ପଛାଇ ନ ଥାଆନ୍ତି। ଯାହାର ଅନେକ ନଜିର ଦେଖିବାକୁ ମିଳିଛି। ସେମିତି ଏକ ଅଜବ ବିବାହ ସିଙ୍ଗାପୁରରେ ହୋଇଥିଲା। ଏହି ବିବାହ ପ୍ରସିଦ୍ଧ ଚିକେନ ରେଷ୍ଟୁରାଣ୍ଟ ଚେନ୍ କେଏଫସି ଉପରେ ଆଧାରିତ ଥିଲା। ସିଙ୍ଗାପୁରର ମହିଳା ଲାଇଙ୍ଗ ଲେ ଓ୍ବଙ୍ଗ କେଏଫ୍ସି ପାଇଁ ପାଗଳ ଥିଲେ। ତେଣୁ ସେ ସବୁବେଳେ ଚାହୁଁଥିଲେ ତାଙ୍କ ବିବାହ କେଏଫ୍ସି ଥିମ୍ରେ ହେଉ। ଏହାବାଦ୍ ଏଭଳି ବିବାହ ପଛର ଆଉ ଏକ କାରଣ ଥିଲା ଯେ, ସେ ତାଙ୍କ ଭାବି ସ୍ବାମୀଙ୍କୁ କେଏଫ୍ସିରେ ହିଁ ପ୍ରଥମେ ଭେଟିଥିଲେ। ତେଣୁ ଏଇ ବିବାହ କିଭଳି କେଏଫ୍ସି ଥିମ୍ରେ ହେବ ସେଥିପାଇଁ ସେ କେଏଫ୍ସିକୁ ଇ-ମେଲ୍ କରିଥିଲେ। କେଏଫ୍ସି ଅନୁମତି ମଧ୍ୟ ଦେଇଥିଲା। ଓ୍ବଙ୍ଗ ହ୍ବିଲଚେୟାର୍ ଉପରେ ନିର୍ଭରଶୀଳ। ତାଙ୍କର ଏଭଳି ବିବାହ ଯୋଜନା ସମ୍ପର୍କରେ ସ୍ଥାନୀୟ କେଏଫ୍ସି ଆଉଟଲେଟ୍ ଜାଣିବା ପରେ ଓ୍ବଙ୍ଗଙ୍କ ଖାଦ୍ୟଠୁ ଆରମ୍ଭ କରି ଡେକୋରେସନ୍ ପର୍ଯ୍ୟନ୍ତ ୫୦% ରିହାତି କରିଥିଲେ। ବିବାହ ସ୍ଥଳକୁ ପୁରାପୁରି କେଏଫସି ଥିମରେ ସଜାଯାଇଥିଲା। ତା’ସହ ଓ୍ବଙ୍ଗଙ୍କ ହାତରେ ଫୁଲର ବୁକେ ନ ଦିଆଯାଇ ଦିଆଯାଇଥିଲା ଚିକେନ ଲେଗ୍ପିସ୍ର ବୁକେ। ଭେନ୍ୟୁରେ ଚିକେନ୍ ବର୍ଗର ଆକାରର ବିନ୍ବ୍ୟାଗ ବି ରଖାଯାଇଥିଲା। ମେନ୍ୟୁରେ ତ କେଏଫ୍ସିର ଭଲ ଭଲ ଡିଶ୍ ଥିଲା। ଏଭଳି ଅଜବ ବିବାହ ଦେଖି ଅତିଥିମାନେ ଆଶ୍ଚର୍ଯ୍ୟ ହେବା ସହ ବିବାହକୁ ମନଭରି ଉପଭୋଗ କରିଥିଲେ।