ପ୍ରକୃତିର ଗନ୍ତାଘର ମାଲକାନଗିରି ଜିଲା। ଏଠାକାର ପରିବେଶ ସବୁବେଳେ ପର୍ଯ୍ୟଟକଙ୍କୁ ଆକୃଷ୍ଟ କରେ। ଜିଲାର ଅନ୍ୟତମ ପ୍ରାକୃତିକ ସୌନ୍ଦର୍ଯ୍ୟପୂର୍ଣ୍ଣ ସ୍ଥାନ ଖଡ଼ିକାଝଡ଼ି ଜଳପ୍ରପାତ। କୋରୁକୋଣ୍ଡା ବ୍ଲକ ବାଲିମେଳା ଛକଠାରୁ ଅଳ୍ପ ଦୂରରେ ରହିଛି ଏହି ସ୍ଥାନ। ବାଲିମେଳା ଛକରୁ ଟନେଲ କ୍ୟାମ୍ପକୁ ଯୋଗାଯୋଗ କରୁଥିବା ମୁଖ୍ୟରାସ୍ତା ପାର୍ଶ୍ୱରେ ଥିବା ଏହି ସ୍ଥାନ ଉପରେ ଏଯାଏ ପ୍ରଶାସନର ନଜର ପଡିନି। ଶୀତଋତୁରେ ଏଠାରେ ବଣଭୋଜି ପାଇଁ ଭିଡ଼ ଜମେ। ଜିଲା ଏବଂ ବାହାରୁ ଲୋକେ ଆସିଥାନ୍ତି। ବଣଭୋଜି କରିବା ସହ ଏଠାକାର ପ୍ରାକୃତିକ ସୌନ୍ଦର୍ଯ୍ୟ ଉପଭୋଗ କରିଥାନ୍ତି। ଜଳପ୍ରପାତ ଅଞ୍ଚଳ ପଥୁରିଆ ହୋଇଥିବାରୁ ସତର୍କତାର ସହ ସେଠାକୁ ଯିବାକୁ ପଡେ। ପଥର ମଧ୍ୟରେ ଜଳପ୍ରପାତର କୁଳୁକୁଳୁ ସ୍ବର ଏହାର ପରିବେଶକୁ ବେଶ୍ ଆକର୍ଷଣୀୟ କରିଥାଏ। ଏଠାରେ ବଣଭୋଜି ପାଇଁ ବନ ବିଭାଗ ୪ ବର୍ଷ ତଳେ କେତେକ ସିମେଣ୍ଟ ପିଣ୍ଡି ନିର୍ମାଣ ସହ ଚାଳଛପର କୁଡ଼ିଆ କରିଥିଲା। ମାତ୍ର ଗତ ହୁଡ୍ହୁଡ୍ ବାତ୍ୟାରେ ସେସବୁ କ୍ଷତିଗ୍ରସ୍ତ ହୋଇଥିଲା। ଏହା ପରେ ବିଭାଗ ଏଠାରେ ପର୍ଯ୍ୟଟକଙ୍କ ପାଇଁ କିଛି ବିକାଶମୂଳକ କାର୍ଯ୍ୟ କରିନାହିଁ। ଫଳରେ ଏଠାକୁ ଆସୁଥିବା ପର୍ଯ୍ୟଟକମାନେ ବିଭିନ୍ନ ସମସ୍ୟାର ସମ୍ମୁଖୀନ ହୋଇଥାନ୍ତି। ଜଳପ୍ରପାତ ଅଞ୍ଚଳର ଉନ୍ନତି ଲାଗି ଅର୍ଥ ଆସୁଥିଲେ ମଧ୍ୟ ତାହା ବିଭାଗ ଖର୍ଚ୍ଚ ନ କରି ପକାଇ ରଖିଛି। ଜିଲା ପ୍ରଶାସନ ଏହାର ଉନ୍ନତି ପ୍ରତି ପଦକ୍ଷେପ ନେଲେ ଉକ୍ତ ସ୍ଥାନର ବିକାଶ ହୋଇପାରିବ ବୋଲି ମତ ପ୍ରକାଶ ପାଉଛି।
କେମିତି ଯିବେ
ମାଲକାନଗିରି ଜିଲା ସଦର ମହକୁମାରୁ ଏହି ପର୍ଯ୍ୟଟନ ସ୍ଥଳି ୩୨କି.ମି. ଦୂର। ବାଲିମେଳା ଛକରୁ ନାକାମାମୁଡିକୁ ସଂଯୋଗ କରୁଥିବା ରାସ୍ତାରେ ୨ କି.ମି. ଗଲେ ପଡିବ ଖଡ଼ିକାଝଡ଼ି ଜଳପ୍ରପାତ। ଏଠାରେ ବସ୍, ଚାରିଚକିଆ ଯାନ, ମୋଟର ସାଇକେଲ ରହିବା ପାଇଁ ବ୍ୟବସ୍ଥା ରହିଛି।