ନ୍ୟୁୟର୍କ,୨୮ା୩ : ଖଲିସ୍ତାନୀ ନେତା ଅମ୍ରିତ୍ପାଲ ସିଂଙ୍କ ସମର୍ଥନରେ ବହୁସଂଖ୍ୟାରେ ଖଲିସ୍ତାନୀ ସମର୍ଥକ ନ୍ୟୁୟର୍କର ଟାଇମ୍ସ ସ୍କୋୟାରରେ ବିକ୍ଷୋଭ ପ୍ରଦର୍ଶନ କରିଛନ୍ତି। କଡ଼ା ସୁରକ୍ଷା ମଧ୍ୟରେ ସେମାନେ ରିଚ୍ମଣ୍ଡ ହିଲ୍ରେ ଥିବା ବାବା ମାଖନ ଶାହା ଲୁବାନା ଶିଖ୍ ସେଣ୍ଟରରୁ କାର ରାଲି ବାହାର କରି ମାନ୍ହାଟ୍ଟନ ସହର କେନ୍ଦ୍ରସ୍ଥଳରେ ଥିବା ଟାଇମ୍ସ ସ୍କୋୟାର ପର୍ଯ୍ୟନ୍ତ ଯାଇଥିଲେ। କାର୍ଗୁଡ଼ିକରେ ଖଲିସ୍ତାନୀ ପତାକା ଲାଗିଥିବାବେଳେ ଏଲ୍ଇଡି ମୋବାଇଲ ବିଲ୍ବୋର୍ଡ ଟ୍ରକ୍ଗୁଡ଼ିକରେ ଅମ୍ରିତ୍ପାଲଙ୍କ ଫଟୋ ପ୍ରଦର୍ଶିତ ହୋଇଥିଲା। ବହୁସଂଖ୍ୟାରେ ମହିଳା, ପୁରୁଷ ଓ ପିଲାମାନେ ହାତରେ ‘ଅମ୍ରିତ୍ପାଲଙ୍କୁ ମୁକ୍ତ କର’ ପ୍ଲାକାର୍ଡ ଏବଂ ତାଙ୍କ ଫଟୋ ଧରି ଭାରତ ବିରୋଧୀ ସ୍ଲୋଗାନ ଦେଇଥିଲେ।