ଲଣ୍ଡନ/ନୂଆଦିଲ୍ଲୀ,୧ା୧୦: ବ୍ରିଟେନ୍ରେ ଅବସ୍ଥାପିତ ଭାରତୀୟ ଉଚ୍ଚାୟୁକ୍ତ ବିକ୍ରମ ଦୋରାଇସ୍ବାମୀ ସ୍କଟ୍ଲାଣ୍ଡ ଗସ୍ତରେ ଥିବାବେଳେ ତାଙ୍କୁ ସେଠାରେ ଏକ ଗୁରୁଦ୍ୱାରା ପ୍ରବେଶକୁ ଖଲିସ୍ତାନୀ ସପକ୍ଷବାଦୀତତ୍ତ୍ୱ ଅବରୋଧ କରିଛନ୍ତି। ଏନେଇ ଭାରତ ବ୍ରିଟେନ ବହିର୍ବ୍ୟାପାର କାର୍ଯ୍ୟାଳୟରେ ଉଦ୍ବେଗ ଜଣାଇଛିି। ଦୋରାଇସ୍ବାମୀ ଶୁକ୍ରବାର ଗ୍ଲାସ୍ଗୋସ୍ଥିତ ଗୁରୁଦ୍ୱାରାକୁ ଯିବାକୁ ଚାହୁଁଥିବାବେଳେ କେତେଜଣ ଖଲିସ୍ତାନୀ ଉଗ୍ରପନ୍ଥୀ ତାଙ୍କୁ ଅଟକାଇଥିଲେ। ଭାରତୀୟ ଉଚ୍ଚାୟୁକ୍ତ ସେମାନଙ୍କ ସହ ଯୁକ୍ତିତର୍କ ନ କରି ଫେରିଯିବାକୁ ନିଷ୍ପତ୍ତି ନେଇଥିଲେ ବୋଲି ସରକାରୀ ସୂତ୍ରରୁ କୁହାଯାଇଛି। ଆଲବର୍ଟ ଡ୍ରାଇଭ୍ଠାରେ ଥିବା ଗ୍ଲାସ୍ଗୋ ଗୁରୁଦ୍ୱାରାରେ ଦୋରାଇସ୍ବାମୀ ପ୍ରବେଶ କରୁଥବାବେଳେ ତାଙ୍କୁ ଜଣେ ଖଲିସ୍ତାନୀ ସପକ୍ଷବାଦୀ କର୍ମୀ ଅଟକାଉଥିବା ‘ଶିଖ୍ ୟୁଥ୍ ୟୁକେ’ର ଇଷ୍ଟାଗ୍ରାମ୍ ଚ୍ୟାନେଲରେ ପୋଷ୍ଟ ହୋଇଥିବା ଭିଡିଓରୁ ଦେଖିବାକୁ ମିଳିଛି। ସେମାନେ କାନାଡା ଓ ଅନ୍ୟତ୍ର ଶିଖ୍ମାନଙ୍କୁ ଆଘାତ ଦେଇଥିବାର ସେଠାରେ ଅନ୍ୟ ଜଣେ ବିକ୍ଷୋଭକାରୀ କହୁଥିବା ଶୁଣାଯାଇଛି। ସବୁଠି ଭାରତୀୟ ରାଷ୍ଟ୍ରଦୂତମାନଙ୍କୁ ଏଭଳି ବିରୋଧ କରାଯିବା ଆବଶ୍ୟକ ବୋଲି ସେ କହୁଛନ୍ତି। କୌଣସି ଭାରତୀୟ କୂଟନୀତିଜ୍ଞ କିମ୍ବା ସରକାରୀ ଅଧିକାରୀ ଗୁରୁଦ୍ୱାରା ଆସିଲେ ଏହିଭଳି ବ୍ୟବହାର କରାଯିବ ବୋଲି ଅନ୍ୟ ଜଣେ କହୁଥିବା ଭିଡିଓରୁ ଶୁଣିବାକୁ ମିଳିଛି।
ଖଲିସ୍ତାନୀ ଆତଙ୍କବାଦୀ ହରଦୀପ୍ ସିଂ ନିଜ୍ଜର ହତ୍ୟାକାଣ୍ଡରେ ଭାରତ ସମ୍ପୃକ୍ତ ଥିବା କାନାଡା ପ୍ରଧାନମନ୍ତ୍ରୀ ଜଷ୍ଟିସ୍ ଟ୍ରୁଡୋ ଅଭିଯୋଗ କରିବା ପରେ ଦୁଇଦେଶ ମଧ୍ୟରେ କୂଟନୈତିକ ସମ୍ପର୍କରେ ତିକ୍ତତା ସୃଷ୍ଟି ହୋଇଛି। ଅଭିଯୋଗକୁ ଭାରତ ମନଗଢ଼ା ଏବଂ ଉଦ୍ଦେଶ୍ୟମୂଳକ କହି ଖଣ୍ଡନ କରିଥିବାବେଳେ ଅଭିଯୋଗ ସମ୍ପର୍କରେ କାନାଡା ଏପର୍ଯ୍ୟନ୍ତ କୌଣସି ପ୍ରମାଣ ଦେଖାଇ ପାରିନାହିଁ। ଏପରିସ୍ଥଳେ ବ୍ରିଟେନ୍ରେ ଭାରତୀୟ ଉଚ୍ଚାୟୁକ୍ତଙ୍କୁ ଗୁରୁଦ୍ୱାରାରେ ପ୍ରବେଶ କରାଇ ନ ଦେବାକୁ ନେଇ ନୂଆଦିଲ୍ଲୀ ଉଦ୍ବେଗ ପ୍ରକାଶ କରିଛି। ଏଭଳି ଘଟଣାକୁ ଭାଜପା ନିନ୍ଦା କରିଛି। ଗୁରୁଦ୍ୱାରା ସବୁ ଧର୍ମ ପାଇଁ। ଭାରତୀୟ କୂଟନୀତିଜ୍ଞଙ୍କୁ ଗୁରୁଦ୍ୱାରା ପ୍ରବେଶ କରାଇ ନ ଦେବା ନିନ୍ଦନୀୟ ବୋଲି ଶିରୋମଣି ଗୁରୁଦ୍ୱାରା ପ୍ରବନ୍ଧକ କମିଟି କହିଛି। ଏହା ପୂର୍ବରୁ ମଧ୍ୟ କାନାଡାରେ ଏକାଧିକ ଥର ଭାରତୀୟ ମିଶନକୁ ଟାର୍ଗେଟ କରାଯାଇଥିଲା। ସେହିପରି ମାର୍ଚ୍ଚ ୧୯ରେ ଆମେରିକାର ସାନ୍ଫ୍ରାନ୍ସିସ୍କୋସ୍ଥିତ ଭାରତୀୟ କନ୍ସୁଲେଟକୁ ଖଲିସ୍ତାନୀ ବିକ୍ଷୋଭକାରୀ ପ୍ରବେଶ କରି ଭଙ୍ଗାରୁଜା କରିଥିଲେ। ଜୁନ୍ ୧୨ରେ ଅଷ୍ଟ୍ରେଲିଆରେ ପ୍ରବାସୀ ଭାରତୀୟଙ୍କୁ କାର୍ ରାଲି ବେଳେ ଖଲିସ୍ତାନୀ ସମର୍ଥକମାନେ ଖଣ୍ଡାରେ ଆକ୍ରମଣ କରିଥିଲେ। ଜୁଲାଇ ୮ରେ ଖଲିସ୍ତାନୀ ବିକ୍ଷୋଭକାରୀ ଲଣ୍ଡନସ୍ଥିତ ଭାରତୀୟ ଦୂତାବାସରେ ଲାଗିଥିବା ତ୍ରିରଙ୍ଗାକୁ ଖୋଲିବା ସହ ଅଧିକାରୀମାନଙ୍କୁ ଦୁର୍ବ୍ୟବହାର କରିଥିଲେ।