ବ୍ରହ୍ମପୁର,୧୦।୧୧(ସ୍ବାଧୀନ ଶେଖର ପାଢ଼ୀ ): ରାଜ୍ୟର ସର୍ବ ପୁରାତନ ଶିକ୍ଷାନୁଷ୍ଠାନ ବ୍ରହ୍ମପୁର ଖଲ୍ଲିକୋଟ ବିଶ୍ୱବିଦ୍ୟାଳୟରୁ ଅଗଣିତ ମେଧାବୀ ଆଜି ରାଜ୍ୟ, ଦେଶ ବିଦେଶରେ ନିଜ କାର୍ଯ୍ୟଦକ୍ଷତା ପାଇଁ ସୁନାମ ଅର୍ଜନ କରିଛନ୍ତି। ହେଲେ ପାରିପାର୍ଶ୍ୱିକ ଅବସ୍ଥାକୁ ଦୃଷ୍ଟିଦେଲେ ଏହାର ଶୈକ୍ଷିକ ବାତାବରଣ ଓ ମୌଳିକ ଭିତ୍ତିଭୂମି ଦୋହଲିବାରେ ଲାଗିଛି। ବିଶ୍ୱବିଦ୍ୟାଳୟରେ ଛାତ୍ରୀଙ୍କ ସକାଶେ ନିର୍ମିତ ବାଳିକା ଶୌଚାଳୟ ବ୍ଲକ ଦୀର୍ଘବର୍ଷ ହେଲା ବ୍ୟବହାର ନ ହୋଇ ଭୂତକୋଠି ପାଲଟିଥିବା ଏହାକୁ ସ୍ପଷ୍ଟ କରିଛି। ବିଦ୍ୟାର୍ଥୀଙ୍କ ପାଇଁ ବିଶ୍ୱବିଦ୍ୟାଳୟ ପରିସରରେ ଏମିତି ନବ ନିର୍ମିତ କୋଠା ଅନେକ ଥିଲେ ବି ତାହାର ଠିକ ଉପଯୋଗ ହୋଇପାରୁନାହିଁ। ଏହା ଦ୍ୱାରା ଛାତ୍ରୀମାନେ ବିଭିନ୍ନ ସମସ୍ୟା ଦେଇ ଗତି କରୁଥିବା ବାରମ୍ବାର ଅଭିଯୋଗ କରି ଆସୁଛନ୍ତି।
ବିଶ୍ୱବିଦ୍ୟାଳୟ ମାନ୍ୟତା ପରେ ସଂଘର୍ଷ କରି ଉକ୍ତ ବିଶ୍ୱବିଦ୍ୟାଳୟ ୟୁଜିସି ମାନ୍ୟତା ହାସଲ କରିଛି। କିନ୍ତୁ ବିଶ୍ୱବିଦ୍ୟାଳୟରେ ବିଦ୍ୟାର୍ଥୀଙ୍କ ସମସ୍ୟାର ସମାଧାନ ଦୂରରେ ରହିଛି ଉକ୍ତ ଶିକ୍ଷାନୁଷ୍ଠାନ। କ୍ୟାମ୍ପସ ଭିତରେ ୨୦୧୮ରେ ଛାତ୍ରୀଙ୍କ ପାଇଁ ଏକ ଶୌଚାଳୟ ବ୍ଲକ ନିର୍ମିତ ହୋଇଥିଲା। କିଛି ଦିନ ବ୍ୟବହାର ପରେ ତାହା ଏବେ ଦୀର୍ଘ ବର୍ଷ ହେଲା ବନ୍ଦ ରହିଛି। ଉକ୍ତ ଶିକ୍ଷାନୁଷ୍ଠାନରେ ପ୍ରାୟ ୟୁଜି, ପିଜିକୁ ମିଶାଇ ଦୈନନ୍ଦିନ ପ୍ରାୟ ୫ ହଜାର ଛାତ୍ରୀ ଅଧ୍ୟୟନ କରୁଛନ୍ତି। ପ୍ରତ୍ୟହ ସକାଳୁ ଅପରାହ୍ନ ଯାଏଁ କଳା, ବିଜ୍ଞାନ ଓ ବାଣିଜ୍ୟରେ ବିଭିନ୍ନ କ୍ଲାସକୁ ଯାଆନ୍ତି। କିନ୍ତୁ ଛାତ୍ରୀଙ୍କ ଶୌଚାଳୟ ପାଇଁ ଉପଯୁକ୍ତ ବ୍ୟବସ୍ଥା ନାହିଁ। ବିଶ୍ୱବିଦ୍ୟାଳୟର ଛାତ୍ରୀଙ୍କ ସକାଶେ ମୁଖ୍ୟ କୋଠାରେ ଗୋଟିଏ ଶୌଚାଳୟ ଥିବା ସ୍ଥଳେ ସୋସିଆଲ ସାଇନ୍ସ ବିଭାଗ କୋଠାର ଦୁଇ ମହଲାରେ ୨ଟି ଶୌଚାଳୟ ରହିଛି। କିନ୍ତୁ କେଉଁଠି କବାଟ ତାଡି ହୋଇ ଭାଙ୍ଗିଯାଇଛି ତ ଆଉ କେଉଁଠି ସୁରକ୍ଷା ବ୍ୟବସ୍ଥା ନାହିଁ। ତେଣୁ ପାଠପଢ଼ା ସମୟରେ ଛାତ୍ରୀମାନେ ଶୌଚାଳୟ ଯିବାକୁ ସୁରକ୍ଷିତ ମଣୁନାହାନ୍ତି। ଏ ବାବଦରେ ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କୁ ବାରମ୍ବାର ଅଭିଯୋଗ ପରେ ବି ଏହାର କୌଣସି ସୁଫଳ ମିଳୁନଥିବା ଛାତ୍ରୀମାନେ ଅଭିଯୋଗ କରିଛନ୍ତି। ଏ ସମ୍ପର୍କରେ ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କୁ ପଚାରିବାରୁ ସେ କର୍ମଚାରୀ ଅଭାବ ଏହାର କାରଣ ହୋଇଛି। ଏନେଇ ବିଭାଗକୁ ଚିଠି ଲେଖି ଅବଗତ କରାଯାଇଥିବା ସେ କହିଛନ୍ତି। ସର୍ବପୁରାତନ ବିଶ୍ୱବିଦ୍ୟାଳୟରେ ଏଭଳି ଶୌଚାଳୟର ଅଭାବ ଓ ଛାତ୍ରୀଙ୍କ ସକାଶେ ନିର୍ମିିତ ଶୌଚାଳୟ ବ୍ଲକ ବନ୍ଦ ଥିବାକୁ ନେଇ ସ୍ଥାନୀୟ ଶିକ୍ଷାବିତ ଓ ବୁଦ୍ଧିଜୀବୀ ମହଲରେ ଉଦବେଗ ପ୍ରକାଶ ପାଇଛି।