ମେଲବୋର୍ନ,୧୬।୭(ପି.ଟି): ଆଗାମୀ ଇଂଲଣ୍ଡ ଗସ୍ତ ପାଇଁ ଅଷ୍ଟ୍ରେଲିଆ ଗୁରୁବାର ଏକ ୨୬ ଜଣିଆ ଶକ୍ତିଶାଳୀ ପ୍ରାଥମିକ ଦଳ ଘୋଷଣା କରିଛି। ଏହି ଦଳରେ ଗ୍ଲେନ୍ ମ୍ୟାକ୍ସଓ୍ବେଲ ଓ ଉସ୍ମାନ ଖ୍ବାଜାଙ୍କୁ ସାମିଲ କରାଯାଇଛି। ଆଗକୁ ଆୟୋଜନ ହେବାକୁ ଥିବା ଟି୨୦ ବିଶ୍ୱକପ୍କୁ ଦୃଷ୍ଟିରେ ରଖି ୩ ଜଣ ନବାଗତଙ୍କୁ ମଧ୍ୟ ଏହି ଦଳରେ ସାମିଲ କରାଯାଇଛି।
କୋଭିଡ୍-୧୯ର ପ୍ରକୋପ ଜାରି ରହିଥିବା ବେଳେ ଏହି ଦଳ ଘୋଷଣା କରିବା ଏକ ସକାରାତ୍ମକ ପଦକ୍ଷେପ ବୋଲି କ୍ରିକେଟ ଅଷ୍ଟ୍ରେଲିଆ ତରଫରୁ କୁହାଯାଇଛି। ଇତିମଧ୍ୟରେ ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ୍ ମଧ୍ୟରେ ଟେଷ୍ଟ ସିରିଜ ଆରମ୍ଭ ହୋଇଛି। ଦୀର୍ଘ ଦିନ ପରେ ଅନ୍ତର୍ଜାତୀୟ କ୍ରିକେଟର ପ୍ରତ୍ୟାବର୍ତ୍ତନ ହୋଇଛି।
ତେବେ ଏପର୍ଯ୍ୟନ୍ତ ଏହି ସୀମିତ ଓଭର ଗସ୍ତ ନେଇ ଅନ୍ତିମ ନିଷ୍ପତ୍ତି ନିଆଯାଇନାହିଁ। ଏ ସଂକ୍ରାନ୍ତରେ କ୍ରିକେଟ ଅଷ୍ଟ୍ରେଲିଆ ଓ ଇଂଲଣ୍ଡ ଆଣ୍ଡ୍ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ମଧ୍ୟରେ ଗଠନମୂଳକ ଆଲୋଚନା ଚାଲିଛି। ୩ଟି ଲେଖାଏ ଦିନିକିଆ ଓ ଟି୨୦ ଅନ୍ତର୍ଜାତୀୟ ମ୍ୟାଚ୍କୁ ନେଇ ଆଗାମୀ ସେପ୍ଟେମ୍ବରରେ ଏହି ଗସ୍ତ ନିଶ୍ଚିତ ହେଲା ପରେ ଅନ୍ତିମ ଦଳ ଘୋଷଣା କରାଯିବ। ଏହି ଦଳରେ ନିୟମିତ ଖେଳାଳିମାନଙ୍କ ସମେତ ମ୍ୟାକ୍ସଓ୍ବେଲ ଓ ଉସ୍ମାନ ଖ୍ବାଜାଙ୍କ ଭଳି ଖେଳାଳି ସ୍ଥାନ ପାଇଛନ୍ତି। ମ୍ୟାକ୍ସଓ୍ବେଲ ଗତ ଅକ୍ଟୋବରରୁ ଅଷ୍ଟ୍ରେଲିଆ ପାଇଁ ଖେଳି ନାହାନ୍ତି। ମାନସିକ ସ୍ବାସ୍ଥ୍ୟ କାରଣରୁ ସେ କ୍ରିକେଟରୁ ଦୂରେଇ ରହିଥିଲେ। ସେହିପରି ଦୁର୍ବଳ ଫର୍ମ କାରଣରୁ ଖ୍ବାଜା ଗତ ୫ ବର୍ଷ ମଧ୍ୟରେ ପ୍ରଥମଥର ପାଇଁ ଏପ୍ରିଲ୍ରେ କ୍ରିକେଟ ଅଷ୍ଟ୍ରେଲିଆ ଚୁକ୍ତିରୁ ବାଦ୍ ପଡିଥିଲେ।
