ନୂଆଦିଲ୍ଲୀ,୭।୯: ମହାରାଷ୍ଟ୍ରର ପୂର୍ବତନ ଆଇଏଏସ ପ୍ରଶିକ୍ଷକ ପୂଜା ଖେଡକରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ନ୍ୟୁଜ ଏଜେନ୍ସି ପିଟିଆଇର ରିପୋର୍ଟ ଅନୁଯାୟୀ କେନ୍ଦ୍ର ସରକାର ପୂଜା ଖେଡକରଙ୍କୁ ତୁରନ୍ତ ପ୍ରଶାସନିକ ସେବାରୁ ବରଖାସ୍ତ କରିଛନ୍ତି। ଆଇଏଏସ (ପ୍ରୋବେସନ) ନିୟମ, ୧୯୯୫ ଅନୁଯାୟୀ ପୂଜା ଖେଡକରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଏହାପୂର୍ବରୁ ସଂଘ ଲୋକ ସେବା ଆୟୋଗ (ୟୁପିଏସସି) ଏବଂ ଦିଲ୍ଲୀ ପୋଲିସ ପୂର୍ବତନ ଆଇଏଏସ ପୂଜା ଖେଡକରଙ୍କ ଜାମିନ ଆବେଦନକୁ ବିରୋଧ କରିଥିଲେ।
ୟୁପିଏସସି ଏବଂ ଦିଲ୍ଲୀ ପୋଲିସ କୋର୍ଟଙ୍କୁ କହିଛନ୍ତି ଯେ ସେ କେବଳ ଆୟୋଗ ନୁହେଁ ଜନସାଧାରଣଙ୍କୁ ମଧ୍ୟ ପ୍ରତାରଣା କରିଛନ୍ତି କାରଣ ସେ ୨୦୨୦ ପର୍ଯ୍ୟନ୍ତ ସମସ୍ତ ଉଦ୍ୟମ ଶେଷ କରିବା ପରେ ୨୦୨୧ରେ ସିଭିଲ ସର୍ଭିସ ପରୀକ୍ଷା (CSE) ରେ ବସିବାକୁ ଅଯୋଗ୍ୟ ହୋଇଥିଲେ। ଠକେଇ ଓ ଭୁଲ ଉପାୟରେ ଓବିସି ଏବଂ ଅକ୍ଷମ କୋଟାର ସୁବିଧା ସୁଯୋଗ ନେବା ଅଭିଯୋଗରେ ପୂଜା ଖେଡକର ବର୍ତ୍ତମାନ ମଧ୍ୟବର୍ତ୍ତୀକାଳୀନ ଜାମିନରେ ଅଛନ୍ତି।
ପୂଜା ଖେଡକରଙ୍କୁ ଓବିସି ସଂରକ୍ଷଣ ଏବଂ ଭିନ୍ନକ୍ଷମ କୋଟା ସହାୟତାରେ କେନ୍ଦ୍ର ଲୋକସେବା ଆୟୋଗ ପରୀକ୍ଷା ଦେଇଥିବା ଅଭିଯୋଗ ହୋଇଛି। ଅଭିଯୋଗ ହୋଇଛି ଯେ ସେ ଏ ବାବଦରେ ସମସ୍ତ ଡକ୍ୟୁମେଣ୍ଟ ପ୍ରସ୍ତୁତ କରିଛନ୍ତି। ଠକେଇ ଦ୍ୱାରା ସିଭିଲ ସର୍ଭିସ ପରୀକ୍ଷାରେ ଉତ୍ତୀର୍ଣ୍ଣ ହୋଇଥିବାରୁ ପୂଜା ଖେଡକରଙ୍କ ବିରୋଧରେ ଦିଲ୍ଲୀ ପୋଲିସ ଏକ ମାମଲା ରୁଜୁ କରିଥିଲା। ଏହାପୂର୍ବରୁ ପୂଜା ଖେଡକରଙ୍କ ଦ୍ୱାରା ଦାଖଲ ହୋଇଥିବା ସମସ୍ତ ଦଲିଲର ଯାଞ୍ଚ କରାଯିବା ଉଚିତ ବୋଲି କୋର୍ଟ ଗୁରୁତ୍ୱାରୋପ କରିଛନ୍ତି। ୟୁପିଏସସି ଜୁଲାଇ ୩୧ରେ ତାଙ୍କ ପ୍ରାର୍ଥୀପତ୍ର ବାତିଲ କରି ଭବିଷ୍ୟତର ପରୀକ୍ଷାରେ ଯୋଗଦେବାକୁ ବାରଣ କରିଥିଲା।