ନୂଆଦିଲ୍ଲୀ,୨୧।୧୨(ପି.ଟି.): ହରିୟାଣାରେ ୨୦୨୧ରେ ଆୟୋଜନ ହେବାକୁ ଯାଉଥିବା ଖେଲେ ଇଣ୍ଡିଆ ୟୁଥ୍ ଗେମ୍ସରେ ୪ଟି ସ୍ବଦେଶୀ ଖେଳ ସାମିଲ ହେବ। ଏ ନେଇ କେନ୍ଦ୍ର କ୍ରୀଡ଼ାମନ୍ତ୍ରଣାଳୟ ଅନୁମୋଦନ ଦେଇଛି। ଗଟ୍କା, କାଲାରିପାୟାଟ୍ଟୁ, ଥାଙ୍ଗ୍-ଟା ଓ ମାଲ୍ଲାଖମ୍ବାକୁ ଏହି ୟୁଥ୍ ଗେମ୍ସରେ ସାମିଲ କରାଯିବାକୁ ନିଷ୍ପତ୍ତି ନିଆଯାଇଛି।
ସ୍ବଦେଶୀ କ୍ରୀଡ଼ାର ଏକ ବଳିଷ୍ଠ ପରମ୍ପରା ତଥା ଐତିହ୍ୟ ଭାରତରେ ରହିଛି। ତେଣୁ ମନ୍ତ୍ରଣାଳୟ ଏହି କ୍ରୀଡ଼ାଗୁଡିକର ପ୍ରଚାର ଓ ପ୍ରସାର, ଏହାର ଲୋକପ୍ରିୟତା ବୃଦ୍ଧି କରିବାକୁ ନିଷ୍ପତ୍ତି ନେଇଛି ବୋଲି କେନ୍ଦ୍ର କ୍ରୀଡ଼ାମନ୍ତ୍ରୀ କିରେନ ରିଜିଜୁ କହିଛନ୍ତି। ଏହି ପାରମ୍ପରିକ କ୍ରୀଡ଼ାର ଉନ୍ନତି ପାଇଁ ଖେଲୋ ଇଣ୍ଡିଆ ଗେମ୍ସ ହିଁ ଶ୍ରେଷ୍ଠ ପ୍ଲାଟ୍ଫର୍ମ। ତେଣୁ ୨୦୨୧ ସଂସ୍କରଣରେ ଏହି ୪ କ୍ରୀଡ଼ା ସାମିଲ ହେବା ଏକପ୍ରକାର ନିଶ୍ଚିତ ବୋଲ ସେ କହିଛନ୍ତି। ଯୋଗାସନ ମଧ୍ୟ ସମସ୍ତଙ୍କ ଦୃଷ୍ଟିଆକର୍ଷଣ କରିବ ବୋଲି ଆଶା କରାଯାଉଛି। ଆଗାମୀ କିଛି ବର୍ଷରେ ଖେଲୋ ଗେମ୍ସରେ ଆହୁରି କେତୋଟି ସ୍ବଦେଶୀ କ୍ରୀଡ଼ା ସାମିଲ କରିବୁ ବୋଲି ସେ କହିଛନ୍ତି। ସାମିଲ ହୋଇଥିବା ୪ଟି କ୍ରୀଡ଼ାର ଦେଶର ବିଭିନ୍ନ ଅଞ୍ଚଳରେ ବେଶ୍ ଲୋକପ୍ରିୟତା ରହିଛି।
କାଲାରିପାୟାଟ୍ଟୁ କେରଳରେ ବେଶ୍ ଲୋକପ୍ରିୟ। ବଲିଉଡ୍ ଅଭିନେତା ବିଦ୍ୟୁତ୍ ଜାମଓ୍ବାଲ ଏହି ଖେଳକୁ ନେଇ ଭଲ ଅଭ୍ୟାସ କରନ୍ତି। ସେହିପରି ମାଲ୍ଲାଖମ୍ବା ମଧ୍ୟପ୍ରଦେଶ ଓ ମହାରାଷ୍ଟ୍ରରେ ଖେଳାଯାଇଥାଏ। ଗଟ୍କା ପଞ୍ଜାବରୁ ଆସିଛି। ଏହା ପାରମ୍ପରିକ ଯୁଦ୍ଧ କରିବାର ଶୈଳୀକୁ ସୂଚାଇଥାଏ। ନିହାଙ୍ଗ ଶିଖ୍ ଓ୍ବାରିୟର୍ସ ଆତ୍ମରକ୍ଷା ଓ କ୍ରୀଡ଼ା ପାଇଁ ଏହାର ପ୍ରୟୋଗ କରିଥାନ୍ତି। ସେହିପରି ଥାଙ୍ଗ-ଟା ମଣିପୁରର ଏକ ମାର୍ଶାଲ ଆର୍ଟ ଓ ଏହା ସେଠାରେ ବେଶ୍ ଲୋକପ୍ରିୟ। ତେଣୁ ଏହି କ୍ରୀଡ଼ା ପାଇଁ ଦେଶରୁ ଶହଶହ ସଂଖ୍ୟାର ଆଥଲେଟ୍ ଅଂଶଗ୍ରହଣ କରିବେ ବୋଲି ଆଶା କରାଯାଉଛି। ଏହି ୪ଟି କ୍ରୀଡ଼ାର ଜାତୀୟ ଆସୋସିଏଶନ ରହିଛି। ମନ୍ତ୍ରଣାଳୟର ଏହି ନିଷ୍ପତ୍ତିକୁ ଆସୋସିଏଶନଗୁଡିକ ତରଫରୁ ସ୍ବାଗତ କରାଯାଇଛି।
