ନୂଆଦିଲ୍ଲୀ,୨୨।୫(ପି.ଟି.): ଖେଲୋ ଇଣ୍ଡିଆ ୟୁଥ୍ ଗେମ୍ସ (କେଆଇଓ୍ବାଇଜି)ର ୧୪ତମ ସଂସ୍କରଣ ଚଳିତ ବର୍ଷ ନଭେମ୍ବରରେ ହରିୟାଣାରେ ଆୟୋଜନ ହେବ। ଏଥିପାଇଁ କେନ୍ଦ୍ର କ୍ରୀଡ଼ା ମନ୍ତ୍ରଣାଳୟ ହରିୟାଣାକୁ ୨୦.୬୭ କୋଟି ଟଙ୍କା ପ୍ରଦାନ କରିଛି। ଶୁକ୍ରବାର ମନ୍ତ୍ରଣାଳୟ ଏହି ଅର୍ଥ ଅନୁମୋଦନ କରିଛି। କେଆଇଓ୍ବାଇଜି ଦେଶରୁ ୧୮ ବର୍ଷରୁ କମ୍ ଜାତୀୟସ୍ତରର ମଲ୍ଟି ସ୍ପୋଟର୍ସ କମ୍ପିଟିଶନ ଭାବେ ଜଣାଶୁଣା। ୨୫ଟି କ୍ରୀଡ଼ାରେ ପ୍ରତିଯୋଗୀମାନେ ଅଂଶଗ୍ରହଣ କରିବେ। ଚଳିତବର୍ଷ ପ୍ରଥମଥର ପାଇଁ ଏହି ମେଗା ଇଭେଣ୍ଟରେ ୫ଟି ଦେଶୀୟ କ୍ରୀଡ଼ାକୁ ସାମିଲ କରାଯାଇଛି।
କ୍ରୀଡ଼ା ମନ୍ତ୍ରଣାଳୟ ଓ ହରିୟାଣା ସରକାରଙ୍କ ଭାଗୀଦାରିର ଅଂଶସ୍ବରୂପ ମନ୍ତ୍ରଣାଳୟ ୨୦.୬୭ କୋଟି ଟଙ୍କା ଏହି ଇଭେଣ୍ଟ ଆୟୋଜନ ପାଇଁ ପ୍ରଦାନ କରିଛି ବୋଲି ମନ୍ତ୍ରଣାଳୟ ତରଫରୁ କୁହାଯାଇଛି। ହରିୟାଣାର କ୍ରୀଡ଼ା ସଂସ୍କୃତି ବେଶ୍ ଉଚ୍ଚକୋଟୀର। କେଆଇଓ୍ବାଇଜି ଆୟୋଜନ ହେଲେ ଏହି ରାଜ୍ୟରେ କ୍ରୀଡ଼ା ପରିବେଶ ଆହୁରି ଦୃଢ଼ହେବ। ପଞ୍ଚକୁଲାରେ ଏହି ମେଗା ଇଭେଣ୍ଟ ଆୟୋଜନ ହେଉଥିବାରୁ ବହୁତ ଖୁସି ବୋଲି କେନ୍ଦ୍ର କ୍ରୀଡ଼ାମନ୍ତ୍ରୀ କିରେଣ ରିଜିଜୁ କହିଛନ୍ତି। ହରିୟାଣାର କ୍ରୀଡ଼ା ଭିତ୍ତିଭୂମି ବହୁତ ଭଲ। ଏବେ ଏହି ଇଭେଣ୍ଟ ପାଇଁ ଆହୁରି ଅଧିକ ଭିତ୍ତିଭୂମିର ନିର୍ମାଣ ହେବ। ଆଥ୍ଲେଟଙ୍କ ପାଇଁ ଏହା ଏକ ସୁନ୍ଦର ଅଭିଜ୍ଞତା ଆଣିଦେବ ବୋଲି ସେ କହିଛନ୍ତି। ହରିୟାଣା ଆଥ୍ଲେଟ ଭାବେ ଜଣାଶୁଣା ଥିବା ହକି ଅଧିନାୟିକା ରାନୀ ରାମପଲ ଓ ରାଜ୍ୟଗୋଷ୍ଠୀ କ୍ରୀଡ଼ା ସ୍ବର୍ଣ୍ଣ ପଦକ ବିଜେତା ଶୁଟର ଅନିଶ ଭନଓ୍ବାଲା କ୍ରୀଡ଼ାର ଆୟୋଜନ ନେଇ ଖୁସି ଜାହିର କରିଛନ୍ତି।
ଖେଲୋ ଇଣ୍ଡିଆ ସ୍କିମ୍ ଦ୍ୱାରା ତୃଣମୂଳସ୍ତରରୁ ଚୟନ ହେଉଥିବା ଆଥ୍ଲେଟଙ୍କୁ ବାର୍ଷିକ ୬.୨୮ ଲକ୍ଷ ଟଙ୍କା ସ୍କଲାରଶିପ ପ୍ରଦାନ କରାଯାଉଛି। ଏଥିରେ ୧୦,୦୦୦ ଟଙ୍କା ନିଜ ପାଇଁ ଖର୍ଚ୍ଚ କରିବା ପାଇଁ ଅଧିକାର ଦିଆଯାଇଛି। କେଆଇଓ୍ବାଇଜିର ପ୍ରଥମ ସଂସ୍କରଣ ୨୦୧୮ରେ ଖେଲୋ ଇଣ୍ଡିଆ ସ୍କୁଲ ଗେମ୍ସ ବ୍ୟାନରରେ ଆୟୋଜିତ ହୋଇଥିଲା। ଏହାପରେ ଏହି ଇଭେଣ୍ଟର ନୂଆ ନାମ ଖେଲୋ ଇଣ୍ଡିଆ ୟୁଥ୍ ଗେମ୍ସ ରଖାଯାଇଥିଲା। ମହାରାଷ୍ଟ୍ର ଓ ଗୁଆହାଟୀ ଯଥାକ୍ରମେ ୨୦୧୯ ଓ ୨୦୨୦ରେ ଏହି ଇଭେଣ୍ଟ ସଫଳତାର ସହ ଆୟୋଜନ କରିଥିଲା।