କାମ୍ବୋଡିଆ,୪।୯: ଏକଛତ୍ରବାଦୀ ଶାସକ ଖେମର ରୁଜଙ୍କ ଶାସନ କାଳରେ କାମ୍ବୋଡିଆର ୧୬ ହଜାର ସାଧାରଣ ନାଗରିକଙ୍କୁ ନିର୍ଯାତନା ଦେଇ ହତ୍ୟା କରିଥିବା ପୂର୍ବତନ ଜେଲର କିଆଙ୍ଗ ଗୁୟେକ ଇୟାଭ ୭୭ ବର୍ଷ ବୟସରେ ମୃତ୍ୟୁବରଣ କରିଛନ୍ତି। ଆଜୀବନ କାରାଦଣ୍ଡରେ ଦଣ୍ଡିତ ହୋଇଥିବା କିଆଙ୍ଗଙ୍କୁ ନିଶ୍ୱାସପ୍ରଶ୍ୱାସ ନେବାରେ ଅସୁବିଧା ହେବାରୁ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ୧୯୭୦ରେ କିଆଙ୍ଗ କାମ୍ବୋଡିଆର ଏକଛତ୍ରବାଦୀ ଶାସକ ଖେମର ରୁଜଙ୍କ ମୁଖ୍ୟ ଜେଲର ଥିଲେ। ସେ ଏକଛତ୍ରବାଦୀ ଶାସକଙ୍କ ବିରୁଦ୍ଧରେ ସ୍ବର ଉତ୍ତୋଳନ କରୁଥିବା ପ୍ରତ୍ୟେକ କଏଦୀଙ୍କୁ ନିର୍ଯାତନା ଦେଉଥିଲେ ଏବଂ ହତ୍ୟା କରୁଥିଲେ। ୧୬ ହଜାର ଲୋକଙ୍କ ହତ୍ୟା ଏବଂ ଏକଛତ୍ରବାଦୀ ଶାସକ ଖେମର ରୁଜଙ୍କୁ ସମର୍ଥନ କରୁଥିବାରୁ କିଆଙ୍ଗଙ୍କୁ ଯୁଦ୍ଧ ଅପରାଧୀ ଘୋଷିତ କରାଯାଇଥିଲା। ୧୯୭୦ରେ ଲୋକମାନେ ଖେମର ରୁଜ ବିରୁଦ୍ଧରେ ବିଦ୍ରୋହ କରିଥିଲେ। କିଆଙ୍ଗ ଏକଛତ୍ରବାଦୀ ଶାସନର ଆଦେଶରେ କ୍ରୁରତାର ସମସ୍ତ ସୀମା ଅତିକ୍ରମ କରିଥିଲେ। ଏହି ଯୁଦ୍ଧରେ ପ୍ରାୟ ୧୭ ଲକ୍ଷ ଲୋକ ପ୍ରାଣ ହରାଇଥିଲେ। ବିଦ୍ରୋହୀଙ୍କ ଦମନ ପାଇଁ ଅଧିକାଂଶ ଲୋକଙ୍କୁ ନିର୍ଯାତନା ଦିଆଯାଉଥିଲା। ଏହି ମୃତ୍ୟୁ ସଂଖ୍ୟା କାମ୍ବୋଡିଆର ମୋଟ ଜନସଂଖ୍ୟାର ପ୍ରାୟ ୨୫ ପ୍ରତିଶତ ଥିଲା। ୨୦୦୯ ମସିହାରେ ହୋଇଥିବା ଶୁଣାଣି ପରେ ମିଳିତ ଜାତିସଂଘ ସମର୍ଥିତ ଟ୍ରିବ୍ୟୁନାଲ ଦ୍ୱାରା କିଆଙ୍ଗଙ୍କୁ ଜେଲଦଣ୍ଡ ଦିଆଯାଇଥିଲା। କାରାଗାରରେ ନିଶ୍ୱାସଙ୍ପ୍ରଶ୍ୱାସ ନେବା ପରେ ତାଙ୍କୁ କାମ୍ବୋଡିଆ ସୋଭିଏତ୍ ଫ୍ରେଣ୍ଡସିପ ହସ୍ପିଟାଲରେ ଭର୍ତ୍ତି କରାଯାଇଥିଲା, ସେଠାରେ ତାଙ୍କର ମୃତ୍ୟୁ ହୋଇଥିଲା। ୨୦୦୯ରେ କାରାଦଣ୍ଡରେ ଦଣ୍ଡିତ ହେବା ପରେ କିଆଙ୍ଗଙ୍କୁ ୨୦୧୩ରେ କାଣ୍ଡାଲ ପ୍ରାଦେଶିକ ଜେଲକୁ ସ୍ଥାନାନ୍ତର କରାଯାଇଥିଲା। ସେଠାରେ ତାଙ୍କ ସ୍ବାସ୍ଥ୍ୟ ଅବସ୍ଥା ବିଗିଡି ଯାଇଥିଲା।