ବ୍ରହ୍ମପୁର ଅଫିସ,୧୯।୧୦: ରେଶମ ସହରରେ କାଳୀପୂଜା ଲାଗି ଜୋର୍ଦାର ପ୍ରସ୍ତୁତି ଚାଲିଛି। ଆସନ୍ତା ୨୪ ତାରିଖରେ ମା’ କାଳୀଙ୍କ ପୂଜା ଆରମ୍ଭ ହେବ। ସହରରେ ମୁଖ୍ୟତଃ ଖୋଡ଼ାସିଂର କାଳୀପୂଜା ଜିଲା ପ୍ରସିଦ୍ଧ। ପୂର୍ବରୁ ଖୋଡ଼ାସିଂ ମୁଖ୍ୟ ରାସ୍ତାରେ ପୂଜା ହେଉଥିଲା। ୨୦୧୯ ଠାରୁ ଶ୍ୟାମାକାଳୀ ପୂଜା କମିଟି ପକ୍ଷରୁ ଖୋଡ଼ାସିଂ ପେଟ୍ରୋଲ ପମ୍ପ ସମ୍ମୁଖ ଖୋଲା ପଡ଼ିଆରେ ପୂଜା ଆୟୋଜନ ହୋଇଆସୁଛି। ତେବେ ମହାମାରୀ କରୋନା ଯୋଗୁ ଗତ ୨ ବର୍ଷ ପୂଜା ହୋଇ ନ ଥିବାରୁ ଚଳିତବର୍ଷ ଆଡମ୍ବରପୂର୍ଣ୍ଣ ପୂଜା ଲାଗି ପ୍ରସ୍ତୁତି ଚାଲିଛି। ପୂଜା କମିଟି ପକ୍ଷରୁ ଚଳିତଥର ପ୍ରାୟ ୩୦ ଲକ୍ଷ ଟଙ୍କାର ବଜେଟ ଧାର୍ଯ୍ୟ କରାଯାଇଛି। ଏଠାର ପୂଜା ପେଣ୍ଡାଲର ତୋରଣ ମୁଖ୍ୟ ଆକର୍ଷଣର କେନ୍ଦ୍ରବିନ୍ଦୁ ପାଲଟିବ ବୋଲି ଚର୍ଚ୍ଚା ହେଉଛି। ବହୁଚର୍ଚ୍ଚିତ ସିନେମା ବାହୁବଳୀର ମହେଷ୍ମତୀ ରାଜମହଲ ଭଳି ତୋରଣ ପ୍ରସ୍ତୁତ କରାଯାଉଛି। ୧୨୦ ଫୁଟ ଓସାର ଓ ୮୦ ଫୁଟ ଲମ୍ବ ବିଶିଷ୍ଟ ତୋରଣ ପ୍ରସ୍ତୁତ ହେଉଛି। ସେହିପରି ୧୪ ଫୁଟ ଉଚ୍ଚତା ଓ ୮ ଫୁଟ ଓସାର ବିଶିଷ୍ଟ ମା’କାଳୀଙ୍କ ମୃଣ୍ମୟୀ ପ୍ରତିମା ତିଆରି ଚାଲିଛି।
ଆସନ୍ତା ୨୩ରେ ଅଙ୍କୁରାରୋପଣ, ଦୀକ୍ଷା ଗ୍ରହଣ ସହ କଳସଯାତ୍ରା ହୋଇ ମା’ଙ୍କୁ ଆବାହନ କରାଯିବ ବୋଲି ପୁଜା କମିଟି ସମ୍ପାଦକ ଭିକି ସେଠୀ କହିଛନ୍ତି। ୨୪ ଦୀପାବଳୀଠାରୁ ମୁଖ୍ୟ ପୁଜକ ସୁରେନ୍ଦ୍ର ନାଥ ଶତପଥୀ ଓ ୫ ସହଯୋଗୀଙ୍କ ଦ୍ୱାରା ବ୍ରହ୍ମାବରଣ, ଶାଲା ସଂସ୍କାର, ସୂର୍ଯ୍ୟପୁଜା ଓ ଯଜ୍ଞ ଆରମ୍ଭ ହେବ। ନିୟମିତ ଚଣ୍ଡୀପାଠ, ଦେବୀପୂଜା ହେବ। ନଭେମ୍ବର ୬ରେ ମା’ଙ୍କ ମୃଣ୍ମୟୀ ପ୍ରତିମା ଓ ଘଟ ବିସର୍ଜନ ହେବ। ସେହିପରି ପ୍ରତିବର୍ଷ ଭଳି ଚଳିତଥର ଶିଳ୍ପାଞ୍ଚଳ, ଗେଟବଜାର, ବଡ଼ବଜାର, ଗୋଇଲୁଣ୍ଡି ଠାରେ ମଧ୍ୟ କାଳୀପୂଜା ହେବ।
