ଢେଙ୍କାନାଳ ଅଫିସ, ୨୯ା୧୧-ଡ୍ରଗ୍ସ ସେବନକୁ ବିରୋଧ କରିବାରୁ ଢେଙ୍କାନାଳ ପୌରାଞ୍ଚଳ ୨୧ନଂ. ଓ୍ବାର୍ଡ ଅଧୀନ ରେଳଷ୍ଟେଶନ ନିକଟରେ ଥିବା ସଞ୍ଜୟ କୁଷ୍ଠ ରୋଗୀ କଲୋନୀରେ ଶନିବାର ଅପରାହ୍ନରେ ଅସାମାଜିକ ଘଟାଇଥିଲେ ଉନ୍ମତ୍ତକାଣ୍ଡ। ଅଭିଯୁକ୍ତମାନେ ୩ ରାଉଣ୍ଡ ଫାଙ୍କା ଗୁଳିଚାଳନା କରିବା ସହିତ ପ୍ରକାଶ ନାୟକ ନାମକ ଜଣେ ଯୁବକଙ୍କୁ ମରଣାନ୍ତକ ଆକ୍ରମଣ କରିଥିଲେ। ଘଟଣାକୁ ୨୪ ଘଣ୍ଟା ବିତିଯାଇଥିଲେ ମଧ୍ୟ ଦୁର୍ବୃତ୍ତଙ୍କ ପାଖରେ ପହଞ୍ଚତ୍ପାରିନି ପୋଲିସ। ଅନ୍ୟପଟେ ପ୍ରତ୍ୟକ୍ଷଦର୍ଶୀଙ୍କ ଅଭିଯୋଗ ସତ୍ତ୍ୱେ ଫାଙ୍କା ଗୁଳିଚାଳନାକୁ ପୋଲିସ ପକ୍ଷରୁ ଖଣ୍ଡନ କରାଯାଇଥିଲା। ହେଲେ ରବିବାର କଲୋନୀ ପରିସରରୁ ୯ ଏମ୍ଏମ୍ର ଏକ ଖୋକା ମିଳିଛି। ତଥାପି ପୋଲିସ ଏହାକୁ ମାନୁନାହିଁ। ଏପରି କି ସୂଚନା ମିଳିବା ସତ୍ତ୍ୱେ ଘଟଣାସ୍ଥଳରେ ତଦନ୍ତ କରାଯାଇନାହିଁ କି ଫୁଟା ଗୁଳି ଜବତ ହୋଇନି। ଦୁର୍ବୃତ୍ତଙ୍କ ଏଭଳି କାଣ୍ଡ ପରେ କଲୋନୀବାସୀ ଆତଙ୍କିତ ଅବସ୍ଥାରେ ରହିଥିବାବେଳେ ପୋଲିସ ଏହାକୁ ଅତ୍ୟନ୍ତ ହାଲୁକା ଭାବରେ ନେବା ସ୍ଥାନୀୟ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ସୃଷ୍ଟି କରିଛି।
ନରଣପୁର ଗ୍ରାମର କେତେଜଣ ଯୁବକ ୫ଦିନ ତଳେ ସଞ୍ଜୟ କୁଷ୍ଠରୋଗୀ କଲୋନୀରେ ପଶି ଡ୍ରଗ୍ସ ସେବନ କରୁଥିବାବେଳେ ଏହାକୁ ସ୍ଥାନୀୟ ଅଞ୍ଚଳବାସୀ ବିରୋଧ କରିଥିଲେ। ଶନିବାର ଅପରାହ୍ନ ପ୍ରାୟ ସାଢ଼େ ୪ଟାରେ ନରଣପୁରର ପ୍ରାୟ ୨୦ଜଣ ଯୁବକ କଲୋନୀକୁ ଆସି ୩ରାଉଣ୍ଡ ଫାଙ୍କା ଗୁଳିଚାଳନା କରିଥିଲେ। ଘଟଣାଦିନ ଡ୍ରଗ୍ସ ସେବନକୁ ବିରୋଧ କରିଥିବା ପ୍ରକାଶଙ୍କ ମୁଣ୍ଡକୁ ଆକ୍ରମଣ କରିଥିଲେ। ଏଥିରେ ସେ ଗୁରୁତର ହୋଇଛନ୍ତି। ଅଭିଯୁକ୍ତମାନେ ଘଟଣା ଘଟାଇ ଫେରାର ହୋଇଯାଇଥିବାବେଳେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ଦାବିରେ କଲୋନୀବାସୀ ଟାଉନ ଥାନାର ଦ୍ୱାରସ୍ଥ ହୋଇଥିଲେ। ଇତିମଧ୍ୟରେ ରବିବାର କଲୋନୀ ପରିସରରୁ ୯ ଏମ୍ଏମ୍ର ଏକ ଖୋକା ମିଳିଛି। ଏ ନେଇ ସୂଚନା ଥିବା ସତ୍ତ୍ୱେ ପୋଲିସ ଘଟଣାସ୍ଥଳରେ ତଦନ୍ତ କରିନାହିଁ। ଯଦି ଫୁଟା ଗୁଳି ମିଳିଛି, ତା’ହେଲେ କାହିଁକି ଅଞ୍ଚଳବାସୀ ପୋଲିସ ପାଖକୁ ଆଣୁନାହାନ୍ତି ବୋଲି ଅଧିକାରୀ ଓଲଟା ପ୍ରଶ୍ନ କରୁଛନ୍ତି। ଫଳରେ ପୋଲିସ ତଦନ୍ତକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
ଏ ସଂକ୍ରାନ୍ତରେ ଟାଉନ ଥାନାଧିକାରୀ ସୌଭାଗ୍ୟ କୁମାର ସ୍ବାଇଁ କୁହନ୍ତି, ପୋଲିସ ପକ୍ଷରୁ ଗଠିତ ୫ ଟିମ୍ ଅଭିଯୁକ୍ତଙ୍କୁ ଧରିବାକୁ ଚଢ଼ାଉ ଜାରି ରଖିଛନ୍ତି। ଖୁବଶୀଘ୍ର ଅଭିଯୁକ୍ତଙ୍କୁ ଗିରଫ କରାଯିବ। ସେହିପରି ଫୁଟା ଗୁଳି ମିଳିଥିବା ସମ୍ପର୍କରେ ଦୃଷ୍ଟି ଆକର୍ଷଣ କରିବାରୁ ସେ ପାଲଟା ଯୁକ୍ତି ବାଢ଼ିଥିଲେ। ଯଦି ଫୁଟାଗୁଳି ମିଳିଛି, ତେବେ ଅଞ୍ଚଳବାସୀ କାହିଁକି ପୋଲିସ ପାଖରେ ପହଞ୍ଚାଉନାହାନ୍ତି ବୋଲି ସେ କହିଥିଲେ। ଥାନାଧିକାରୀଙ୍କ ଏଭଳି ଅବାନ୍ତର ଯୁକ୍ତି ଚର୍ଚ୍ଚାର ବିଷୟ ପାଲଟିଥିବାବେଳେ ଏଭଳି ସ୍ପର୍ଶକାତର ଘଟଣାର ତଦନ୍ତ ଠିକ୍ ଢଙ୍ଗରେ କରିବାକୁ ସାଧାରଣରେ ଦାବି ହୋଇଛି।