ନୂଆଦିଲ୍ଲୀ,୩୧।୭: କେନ୍ଦ୍ର ସରକାର ବୁଧବାର ନୂଆ ଶିକ୍ଷାନୀତିକୁ ମଞ୍ଜୁରୀ ପ୍ରଦାନ କରିଛନ୍ତି। ଏହାକୁ କିଛି ରାଜନୈତିକ ଦଳ ସମର୍ଥନ କରୁଥିବା ବେଳେ କେତେକ ଏହାକୁ ବିରୋଧ ମଧ୍ୟ କରୁଛନ୍ତି। ଇତିମଧ୍ୟରେ ଫିଲ୍ମ ଅଭିନେତ୍ରୀ ତଥା କଂଗ୍ରେସ ନେତ୍ରୀ ଖୁସବୁ ସୁନ୍ଦର ମୋଦି ସରକାରଙ୍କ ନୂଆ ଶିକ୍ଷାନୀତିକୁ ସ୍ବାଗତ କରିଛନ୍ତି। ଏହାପରେ ସେ ଟୁଇଟ୍ କରି ରାହୁଲ ଗାନ୍ଧୀଙ୍କୁ କ୍ଷମା ମାଗିଛନ୍ତି। ସୂଚନାଯୋଗ୍ୟ, ଶିକ୍ଷାନୀତିକୁ ନେଇ ଖୁସବୁ ୪ଟି ଟୁଇଟ୍ କରିଛନ୍ତି। ଏଥିରେ ସେ ଉଲ୍ଲେଖ କରିଛନ୍ତି ଯେ ନୂଆ ଶିକ୍ଷାନୀତକୁ ମୁଁ ସ୍ବାଗତ କରୁଛି। ଏଥିପାଇଁ ମୁଁ ଦଳରୁ ବାହାରକୁ ଚାଲି ଯାଇଥିବାରୁ ରାହୁଲ ଗାନ୍ଧୀଙ୍କୁ କ୍ଷମା ପ୍ରାର୍ଥନା କରୁଛି। ସେ କହିଛନ୍ତି ମୁଁ ମୂର୍ତ୍ତି ବା ରୋବୋ ଭଳି ମୁଣ୍ଡ ହଲାଇବା ଠିକ୍ ନ ଭାବି ତଥ୍ୟ ଉପରେ ବିଶ୍ୱାସ କରିଛି। ସବୁକଥାରେ ଆମେ ଆମ ନେତାଙ୍କ ସହ ସହମତ ହୋଇ ପାରୁନୁ କିନ୍ତୁ ନାଗରିକ ଭାବେ ସାହସର ସହ ନିଜର ରାୟ ଦେଇପାରୁଛୁ। ରାଜନୀତିର ଅର୍ଥ ନୁହେଁ ହୋହଲ୍ଲା କରିବା ବରଂ ମିଳିମିଶି କାମ କରିବାକୁ ରାଜନୀତି କୁହାଯାଏ ବୋଲି ଖୁସବୁ କହିଛନ୍ତି।