ଲାହୋର, ୧୦।୧୦: ପାକିସ୍ତାନର ଯୁବ ବ୍ୟାଟ୍ସମ୍ୟାନ ଖୁସ୍ଦିଲ୍ ଶାହ ଟି୨୦ କ୍ରିକେଟ୍ରେ ନିଜ ଦେଶ ପକ୍ଷରୁ ଦ୍ରୁତତ୍ତମ ଶତକ ହାସଲ କରିବାର ରେକର୍ଡ କରିଛନ୍ତି। ୨୫ ବର୍ଷୀୟ ଖୁସ୍ଦିଲ ମାତ୍ର ୩୫ ବଲରୁ ଶତକ ହାସଲ କରି ରେକର୍ଡ ବୁକ୍ରେ ନିଜ ନାମକୁ ଲିପିବଦ୍ଧ କରିଛନ୍ତି। ଏଥିପୂର୍ବରୁ ପାକିସ୍ତାନ ବ୍ୟାଟ୍ସମ୍ୟାନ ଭାବେ ଟି୨୦ କ୍ରିକେଟ୍ରେ ଦ୍ରୁତତ୍ତମ ଶତକ ଅହମ୍ମଦ ଶେହଜାଦ୍ଙ୍କ ନାମରେ ଥିଲା। ୨୦୧୨ରେ ଶେହଜାଦ ମାତ୍ର ୪୦ ବଲରୁ ଶତକ ହାସଲ କରିଥିଲେ। କିନ୍ତୁ ୮ ବର୍ଷ ପରେ ଖୁସ୍ଦିଲ ଏହି ରେକର୍ଡକୁ ଭାଙ୍ଗି ଦେଇଛନ୍ତି।
ଘରୋଇ ଟି୨୦ ଟୁର୍ନାମେଣ୍ଟରେ ସିନ୍ଧ ଓ ଦକ୍ଷିଣ ପଞ୍ଜାବ ମଧ୍ୟରେ ଅନୁଷ୍ଠିତ ଏକ ମ୍ୟାଚ୍ ଅବସରରେ ଖୁସଦିଲ ଏହି ବିସ୍ଫୋରକ ଶତକୀୟ ଇନିଂସ ଖେଳିଥିଲେ। ପ୍ରଥମେ ବ୍ୟାଟିଂ କରି ସିନ୍ଧ ୨୧୬ ରନ କରିଥିଲା। ଜବାବରେ ଖୁସ୍ଦିଲଙ୍କ ଶତକ ବଳରେ ଦକ୍ଷିଣ ପଞ୍ଜାବ ଏହି କଷ୍ଟସାଧ୍ୟ ଲକ୍ଷ୍ୟ ହାସଲ କରିନେଇଥିଲା। ସେ ମାତ୍ର ୩୫ ବଲରେ ଶତକ ପୂରଣ କରିଥିଲେ। ଏହି ଶତକୀୟ ଇନିଂସ ଅବସରରେ ଖୁସ୍ଦିଲ ୯ ଛକା ଓ ୮ ଛକା ମାରିଥିଲେ। ଫଳରେ ବାଉଣ୍ଡରୀରୁ ସେ ୮୬ ରନ୍ ସଂଗ୍ରହ କରିଥିଲେ। ଏଠାରେ ପ୍ରକାଶଯୋଗ୍ୟ, ଓଭରଅଲ୍ (ସମସ୍ତ ଅନ୍ତର୍ଜାତୀୟ ଓ ଲିଗ୍ ମ୍ୟାଚ୍) ଟି୨୦ କ୍ରିକେଟ୍ରେ ଦ୍ରୁତତ୍ତମ ଶତକ କ୍ରିସ୍ ଗେଲ୍ଙ୍କ ନାମରେ ରହିଛି। ୨୦୧୩ ଆଇପିଏଲ୍ରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ପକ୍ଷରୁ ପ୍ରତିନିଧିତ୍ୱ କରି ଗେଲ୍ ୩୦ ବଲରେ ପୁଣେ ବିପକ୍ଷରେ ଶତକ ହାସଲ କରିଥିଲେ।