ଭୁବନେଶ୍ୱର,୨୮।୪(ବ୍ୟୁରୋ): ରାଜଧାନୀ ଇନ୍ଫୋସିଟି ଥାନା ଅଞ୍ଚଳରେ ଜଣେ ଶିଶୁକନ୍ୟାକୁ ବିସ୍କୁଟ ଦେଇ ଅପହରଣ କରାଯିବା ଘଟଣାର ୧୦ଦିନ ପରେ ଖଣ୍ଡଗିରି ଥାନା ଅଞ୍ଚଳରେ ଜଣେ ନାବାଳକଙ୍କୁ ଅପହରଣ କରାଯାଇ ବିକ୍ରି କରାଯାଇଥିବା ଜଣାପଡ଼ିଛି। ପୋଲିସ ମୁଖ୍ୟ ଅଭିଯୁକ୍ତଙ୍କୁ କାବୁ କରି ତାଙ୍କ ସହଯୋଗରେ ନାବାଳକଙ୍କୁ ଖୋର୍ଦ୍ଧା ପୁବୁସାହିରୁ ବୁଧବାର ଉଦ୍ଧାର କରିଛି। ଏଥିସହ ମାଷ୍ଟରମାଇଣ୍ଡଙ୍କ ସହ ବିକ୍ରି ଯୋଜନାରେ ସମ୍ପୃକ୍ତ ଥିବା ଜଣେ ମଧ୍ୟସ୍ଥ ଓ ଜଣେ ମହିଳାଙ୍କୁ ଗିରଫ କରିଛି। ସେମାନେ ହେଲେ ନୟାଗଡ଼ ଜିଲା ଓଡ଼ଗାଁ ଥାନା ଅନ୍ତର୍ଗତ ଅଖାରିଆ ଅଞ୍ଚଳର ମୁଖ୍ୟ ଅଭିଯୁକ୍ତ ଗୀତାଞ୍ଜଳି ଦାସ(୩୪), ସରୋଜିନୀ ମହାପାତ୍ର(୫୦) ଓ ମଧ୍ୟସ୍ଥ ଗୋବର୍ଦ୍ଧନ ସାହୁ(୪୨)। ଗୁରୁବାର ୩ ଅଭିଯୁକ୍ତଙ୍କୁ କୋର୍ଟଚାଲାଣ କରାଯିବ ବୋଲି ଖଣ୍ଡଗିରି ଥାନାଧିକାରୀ ପଦ୍ମନାଭ ପ୍ରଧାନ କହିଛନ୍ତି।
ମିଳିଥିବା ସୂଚନା ଅନୁସାରେ, ଅଭିଯୁକ୍ତ ଗୀତାଞ୍ଜଳି ଜାଗମରା ଗ୍ରାମରେ ପରିବାର ସହ ରୁହନ୍ତି। ଓଡ଼ଗାଁ ଅଞ୍ଚଳର ମଧ୍ୟସ୍ଥ ଗୋବର୍ଦ୍ଧନ ଓ ସରୋଜିନୀ ନାମ୍ନୀ ମହିଳାଙ୍କ ସହ ପିଲା ବିକ୍ରି ପାଇଁ ୧ ଲକ୍ଷ ଟଙ୍କା ଡିଲ୍ କରିଥିଲେ। ଏଥିପାଇଁ ସେ ମାସେ ପୂର୍ବରୁ ୪୦ ହଜାର ଟଙ୍କା ଅଗ୍ରିମ ଆଣିଥିଲେ। ବୁଧବାର ସାରେ ଗୀତାଞ୍ଜଳି ଘରପାଖରେ ୩ ଜଣ ପିଲାଙ୍କୁ ବହି କିଣେଇବା ସହ ଚକଲେଟ୍ ଦେବାକୁ କହି ଡାକିଥିଲେ। ହେଲେ ୩ ଜଣ ପିଲାଙ୍କ ମଧ୍ୟରୁ ପଡ଼ୋଶୀ ମାମା ଜେନାଙ୍କ ୧୦ ବର୍ଷର ପୁଅ ତାଙ୍କ ସହ ଯାଇଥିଲେ। ସେପଟେ ପୂର୍ବ ଯୋଜନା ଅନୁଯାୟୀ ଗୋବର୍ଦ୍ଧନ ଓ ସରୋଜିନୀଙ୍କୁ ଡାକି ଦେଇଥିଲେ। ସେମାନେ ଏକ କାର୍ ଯୋଗେ ଭୁବନେଶ୍ୱର ଆସି ଗୀତାଞ୍ଜଳିଙ୍କ ପାଖରେ ପହଞ୍ଚତ୍ଥିଲେ। ସେମାନେ ନାବାଳକଙ୍କୁ କିଛି ନିଶାଦ୍ରବ୍ୟ ଦେବାରୁ ସେ ଶୋଇ ପଡ଼ିଥିଲେ। ପରେ ସେମାନେ ନାବାଳକଙ୍କୁ ନେଇ ରାତିରେ ଓଡ଼ଗାଁ ଚାଲିଯାଇଥିଲେ। ସେଠାରୁ ଗୀତାଞ୍ଜଳି ଭୁବନେଶ୍ୱର ଚାଲି ଆସିଥିଲେ। ଏପଟେ ମା’ ମାମା ତାଙ୍କ ପୁଅଙ୍କୁ ନ ପାଇ ପାଖ ପିଲାଙ୍କୁ ନ ପାଇ ଥାନାରେ ଅଭିଯୋଗ କରିଥିଲେ। ପୋଲିସ ଏକ ମାମଲା(ନଂ.୨୧୪/୨୨) ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ପୋଲିସ ଗୀତାଞ୍ଜଳିଙ୍କୁ ଅଟକ ରଖି ପଚରାଉଚରା କରିଥିଲେ ସୁଦ୍ଧା ସେ ପ୍ରଥମେ କିଛି କହି ନ ଥିଲେ। ପରେ ସବୁ କଥା ମାନି ଥିଲେ। ତାଙ୍କଠାରୁ ସବୁ କଥା ଜାଣିବା ପରେ ଅନ୍ୟ ୨ ଅଭିଯୁକ୍ତଙ୍କ ଧରିବାକୁ ଯୋଜନା କରିଥିଲା। ଗୀତାଞ୍ଜଳିଙ୍କ ମାଧ୍ୟମରେ ୨ ଅଭିଯୁକ୍ତ ଗୋବର୍ଦ୍ଧନ ଓ ସରୋଜିନୀଙ୍କୁ ପୁବୁସାହି ନିକଟରୁ ଏକ ବସ୍ରୁ କାବୁ କରାଯିବା ସହ ନାବାଳକଙ୍କୁ ଉଦ୍ଧାର କରାଯାଇଥିଲା।
