କୋଦଳା,୧୦।୧୦(ଅମିତ କୁମାର ପଟ୍ଟନାୟକ): କୋଦଳା ଥାନା ଅଧୀନରେ ଗତ ଶୁକ୍ରବାର କବିସୂର୍ଯ୍ୟନଗର ଥାନା କେ. ଝରିଡ଼ା ଗ୍ରାମର ଦିପୁ ପାତ୍ର(୩୨)ଙ୍କୁ ଅପହରଣ ପରେ ହତ୍ୟା କରାଯାଇଥିଲା। ଏହି ଘଟଣାରେ ସୋମବାର ପୋଲିସ ୪ ଜଣଙ୍କୁ ଗିରଫ କରିଥିବା ବେଳେ ଜଣେ ନାବାଳକଙ୍କୁ ବ୍ରହ୍ମପୁର ସୁଦ୍ଧାର ଗୃହକୁ ପଠାଇଛି। ଗିରଫ ଅଭିଯୁକ୍ତମାନେ ହେଲେ କୋଦଳା ଥାନା ଅନ୍ତର୍ଗତ ଜେ ଛଚିନା ଗ୍ରାମର ସଂଗ୍ରାମ ପରିଡା, ଲିଟୁ ନାହାକ, ଭ୍ରମର ପାଣ୍ଡୀ, ଏବଂ ସଞ୍ଜୟ ରାଉତ।
ସୂଚନା ଅନୁସାରେ, ସୁରଟରେ ମଦବେପାର କରିବାକୁ ନେଇ ଦୁଇ ଗୋଷ୍ଠୀ ମଧ୍ୟରେ ବାରମ୍ବାର ଗଣ୍ଡଗୋଳ ହେଉଥିବା ସହ ଗତ ଅଗଷ୍ଟ ୨୮ତାରିଖରେ ସୁରଟସ୍ଥିତ କତାରଗାଁ ଥାନାରେ ମାମଲା ରୁଜୁ ହୋଇଥିଲା। ଯାହାକୁ ନେଇ ଗୋଟିଏ ଗୋଷ୍ଠୀ ପକ୍ଷରୁ ଅନ୍ୟ ଗୋଷ୍ଠୀର ଦିପୁ ପାତ୍ର କୋଦଳା କୋର୍ଟରୁ ଫେରୁଥିବା ବେଳେ ଅପହରଣ କରି ହତ୍ୟା କରିଥିଲେ। ଏ ନେଇ ଅପହରଣ ମାମଲା ନଂ.୪୮୨/୨୩କୁ ହତ୍ୟା ମାମଲା ରୂପାନ୍ତର କରି ଅଭିଯୁକ୍ତମାନଙ୍କୁ ଗିରଫ କରାଯାଇଥିବା ବେଳେ ଅନ୍ୟମାନଙ୍କୁ ଶୀଘ୍ର ଧରାଯିବ ବୋଲି ସୂଚନା ମିଳିଛି। ଏହାସହ ହତ୍ୟାକାଣ୍ଡରେ ବ୍ୟବହୃତ କାଠ ଖଣ୍ଡକୁ ପୋଲିସ ଜବତ କରିଛି। ରବିବାର କୋଦଳା ଥାନା ବେରୁଆଁବାଡ଼ି -ସାତନଳ ରାସ୍ତାର ଏକ ବୁଦାମୂଳରେ ଦିପୁଙ୍କ କ୍ଷତାକ୍ତ ଶରୀର ମିଳିବା ପରେ ଗଞ୍ଜାମ ଏସପି ଏନେଇ ଗଞ୍ଜାମ ଏସପି ଜଗମୋହନ ମିନାଙ୍କ ନିର୍ଦ୍ଦେଶକ୍ରମେ ପୁରୁଷୋତ୍ତମପୁର ଏସଡିପିଓ ରଜନୀକାନ୍ତ ସାମଲଙ୍କ ନେତୃତ୍ୱରେ କୋଦଳା ଥାନା ଅଧିକାରୀ ଉମାକାନ୍ତ ସାହୁ, ବେଗୁନିଆପଡା ଥାନା ଅଧିକାରୀ ମଞ୍ଜରୀ ନାୟକ ଏବଂ ପୋଲସରା ଥାନା ଅଧିକାରୀ କୌଶିକ ମାଝୀ ଏକ ମିଳିତ ଟିମ କରି ବିଭିନ୍ନ ସ୍ଥାନରେ ଚଢ଼ାଉ କରି ଅଭିଯୁକ୍ତ ମାନଙ୍କୁ ଗିରଫ କରିଥିଲେ।