ଭୁବନେଶ୍ୱର (ବ୍ୟୁରୋ)/ବାରଙ୍ଗ,୧୨ା୭ (ଡି.ଏନ୍.ଏ.):ରାଜଧାନୀରୁ ଅପହୃତ ଜଣେ ଯୁବକଙ୍କୁ କମିଶନରେଟ ପୋଲିସ ରବିବାର ଖୋର୍ଦ୍ଧାରୁ ଉଦ୍ଧାର କରିଛି। ଏଥିସହ ଦୁଇ ଅପହରଣକାରୀ ଓ ଅପହୃତ ଯୁବକଙ୍କୁ ଗିରଫ କରି ପୂରା ଘଟଣାର ରହସ୍ୟ ଉନ୍ମୋଚନ କରିଛି। ଗିରଫ ଦୁଇ ଅପହରଣକାରୀ ହେଲେ ପୁରୀ ଜିଲା ବଳଙ୍ଗା ଅଞ୍ଚଳର ପ୍ରମୋଦ କୁମାର ମହାନ୍ତି(୩୨) ଓ ନୟାଗଡ଼ ଜିଲାର ସନ୍ତୋଷ ପଟ୍ଟନାୟକ ଓରଫ କାଳିଆ (୩୨)। ସେହିଭଳି ଉଦ୍ଧାର ପରେ ଠକେଇ ଅଭିଯୋଗରେ ଗିରଫ ହୋଇଥିବା ଅପହୃତ ଜଣକ ହେଲେ ଖୋର୍ଦ୍ଧା ବେଗୁନିଆର ସଦାନନ୍ଦ ବେହେରା। ସଦାନନ୍ଦ ପୋଲିସ ଚାକିରି କରାଇଦେବା ଆଳରେ ଲକ୍ଷାଧିକ ଟଙ୍କା ଠକିଥିବାବେଳେ ଟଙ୍କା ଫେରିପାଇବାକୁ ସେମାନେ ଅପହରଣ କରିଥିବା ଡିସିପି ଉମାଶଙ୍କର ଦାଶ ସୂଚନା ଦେଇଛନ୍ତି। ଏନେଇ ଚନ୍ଦକା ଥାନା ପୋଲିସ ପୃଥକ ଦୁଇଟି ମାମଲା ରୁଜୁ କରି ସମସ୍ତ ୩ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଛି।
ପୋଲିସ ସୂଚନା ଅନୁଯାୟୀ, ଶୁକ୍ରବାର ସକାଳେ ସଦାନନ୍ଦ ଚନ୍ଦକା ଥାନା ଅଞ୍ଚଳର ଏକ ବଜାରରୁ ସ୍କୁଟିରେ ଫେରୁଥିଲେ। ଏହି ସମୟରେ ପ୍ରମୋଦ ଓ ସନ୍ତୋଷ ଏକ କାର୍ରେ ଆସି ତାଙ୍କ ସ୍କୁଟିକୁ ପଛରୁ ଧକ୍କା ଦେଇଥିଲେ। ସଦାନନ୍ଦ ପଡ଼ିଯିବା ପରେ ସେମାନେ ତାଙ୍କୁ କାର୍ରେ ଅପହରଣ କରିନେଇ ଖୋର୍ଦ୍ଧାରେ ମୁଣ୍ଡ ଜାମିନ ରଖିଥିଲେ। ପରେ ସଦାନନ୍ଦଙ୍କ ସ୍ତ୍ରୀଙ୍କୁ ଫୋନ୍ କରି ସାଢେ ୩ଲକ୍ଷ ଟଙ୍କା ମାଗିବା ସହ ନ ମିଳିଲେ ସ୍ବାମୀଙ୍କ କଥା ଭୁଲିଯିବାକୁ ଧମକ ଦେଇଥିଲେ। ଏନେଇ ସଦାନନ୍ଦଙ୍କ ସ୍ତ୍ରୀ ଚନ୍ଦକା ଥାନାରେ ଅଭିଯୋଗ କରିଥିଲେ। ଡିସିପିଙ୍କ ନିର୍ଦ୍ଦେଶକ୍ରମେ ଚନ୍ଦକା ଥାନା ପୋଲିସ ଓ ସ୍ପେଶାଲ୍ ସ୍କ୍ବାଡ୍କୁ ନେଇ ଏକ ଟିମ୍ ଗଠନ କରାଯାଇଥିଲା। ଏହି ଟିମ୍ ଅପହରଣକାରୀଙ୍କ ଫୋନ୍କୁ ଟ୍ରାକ୍ କରି ଖୋର୍ଦ୍ଧାର ଏକ ଫାର୍ମ ହାଉସରେ ଚଢାଉ କରି ସଦାନନ୍ଦଙ୍କୁ ଉଦ୍ଧାର କରିବା ସହ ପ୍ରମୋଦ ଓ ସନ୍ତୋଷଙ୍କୁ ଗିରଫ କରିଥିଲା। ତେବେ ଅପହରଣକାରୀଙ୍କୁ ଗିରଫ ପରେ ଆଉଏକ ଘଟଣା ସାମ୍ନାକୁ ଆସିଥିଲା। ସଦାନନ୍ଦ ପାତ୍ରପଡ଼ା ଅଞ୍ଚଳରେ ରହୁଥିବାବେଳେ ସନ୍ତୋଷଙ୍କ ମାମୁଙ୍କ ସହ ତାଙ୍କର ପରିଚୟ ହୋଇଥିଲା। ସଦାନନ୍ଦ ନିଜକୁ ଜଣେ ଅବସରପ୍ରାପ୍ତ ଶିକ୍ଷକ ପରିଚୟ ଦେବା ସହ ତାଙ୍କର ବଡ଼ ବଡ଼ ଅଫିସ୍ରେ ହାତ ରହିଥିବା କହିଥିଲେ। ଏପରିକି କେତେଜଣଙ୍କୁ ବ୍ଲକ ସ୍ତରରେ ଚାକିରି କରାଇ ଦେଇଥିବା କହି ପ୍ରଥମେ ବିଶ୍ୱାସ ଜନ୍ମାଇଥିଲେ। ପରବର୍ତ୍ତୀ ସମୟରେ ପୋଲିସ ବିଭାଗରେ ଭଣଜା ସନ୍ତୋଷ ଓ ତାଙ୍କ ସାଙ୍ଗ ପ୍ରମୋଦଙ୍କୁ ଚାକିରି କରାଇଦେବେ କହି ସାଢେ ୫ଲକ୍ଷ ଟଙ୍କା ନେଇଥିଲେ। ହେଲେ ସେ ଚାକିରି କରାଇ ପାରି ନ ଥିଲେ କି ଟଙ୍କା ଫେରାଇ ନ ଥିଲେ। ତେଣୁ ଟଙ୍କା ଫେରିପାଇବା ପାଇଁ ସେମାନେ ସଦାନନ୍ଦଙ୍କୁ ଅପହରଣ କରିଥିଲେ ବୋଲି ଅଭିଯୁକ୍ତ ଦ୍ୱୟ ପୋଲିସ ଆଗରେ କହିଥିଲେ। ସେମାନଙ୍କ ବୟାନ ଆଧାରରେ ସଦାନନ୍ଦଙ୍କୁ ପଚରାଉଚରା କରି ସତ୍ୟାସତ୍ୟ ଜଣାପଡିବା ପରେ ତାଙ୍କ ବିରୋଧରେ ଠକେଇ ମାମଲା ରୁଜୁ କରାଯାଇ କୋର୍ଟ ଚାଲାଣ କରାଯାଇଛି। ତେବେ ସଦାନନ୍ଦ ଆହୁରି ଅନେକ ଲୋକଙ୍କୁ ଠକିଥିବା ନେଇ ସୂଚନା ମିଳିଥିବାରୁ ଅଧିକ ତଦନ୍ତ ଚାଲିଥିବା ଏସିପି ପ୍ରକାଶ ଚନ୍ଦ୍ର ପାଲ୍ କହିଛନ୍ତି।