ଭୁବନେଶ୍ୱର, ୧୧।୩(ବ୍ୟୁରୋ): ଏମ୍ସ ଭୁବନେଶ୍ୱରରେ ବୃକକ୍ ପ୍ରତିରୋପଣ (ରେନାଲ୍ ଟ୍ରାନ୍ସପ୍ଲାଣ୍ଟ୍) ହେବ। ରାଜ୍ୟ ସରକାରଙ୍କଠାରୁ ଏନେଇ ଅନୁମତି ମିଳିସାରିଥିବାବେଳେ ଏମ୍ସ ପକ୍ଷରୁ ଭିତ୍ତିଭୂମି ସମ୍ବନ୍ଧୀୟ ସମସ୍ତ ପ୍ରକ୍ରିୟା ଶେଷ ହୋଇଛି। ଆବଶ୍ୟକ ଅନ୍ୟାନ୍ୟ ପ୍ରକ୍ରିୟା ସରିବା ପରେ ବହୁ ପ୍ରତୀକ୍ଷିତ ବୃକକ୍ ପ୍ରତିରୋପଣ ସେବା ଆରମ୍ଭ ହେବ ବୋଲି ଏମ୍ସ ଭୁବନେଶ୍ୱରର ମେଡିକାଲ ଅଧୀକ୍ଷକ ଡା. ଏସ୍. ଏନ୍. ମହାନ୍ତି ପ୍ରକାଶ କରିଛନ୍ତି। ଗୁରୁବାର ଏମ୍ସ ପରିସରରେ ବିଶ୍ୱ କିଡ୍ନୀ ଦିବସ ପାଳନ ଅବସରରେ ସେ ଏନେଇ ସୂଚନା ଦେବା ସହିତ ଏହି ସେବା ଦ୍ୱାରା ରାଜ୍ୟ ତଥା ବାହାରୁ ଆସୁଥିବା ଅନେକ କିଡ୍ନୀ ରୋଗୀ ଉପକୃତ ହେବେ ବୋଲି ଆଶା ପ୍ରକାଶ କରିଛନ୍ତି।
ସେହିପରି ନେଫ୍ରୋଲୋଜି ବିଭାଗ ମୁଖ୍ୟ ତଥା ସହକାରୀ ପ୍ରଫେସର ଡା. ସନ୍ଦୀପ କୁମାର ପଣ୍ଡା କହିଛନ୍ତି, ଏମ୍ସ ଭୁବନେଶ୍ୱର ୨୦୧୯ରୁ ଡାଏଲିସିସ୍ ସେବା ଯୋଗାଇ ଆସୁଛି। ଏଥିସହିତ ବିଭିନ୍ନ କିଡ୍ନୀ ରୋଗ ପାଇଁ ପ୍ଲାଜ୍ମାଫେରେସିସ୍, ସିଆର୍ଆର୍ଟି, ରେନାଲ୍ ବାୟୋପ୍ସି ଭଳି ସେବା ଉପଲବ୍ଧ ରହିଛି। ଓଡ଼ିଶାରେ କ୍ରମାଗତ ଭାବେ କ୍ରନିକ୍ ବୃକକ୍ ରୋଗୀଙ୍କ ସଂଖ୍ୟା ବୃଦ୍ଧି ପାଉଛି। ତଥ୍ୟାନୁସାରେ ରାଜ୍ୟର ମୋଟ ଜନସଂଖ୍ୟାର ପ୍ରାୟ ୧୦-୧୪ ପ୍ରତିଶତ କିଡ୍ନୀଜନିତ ରୋଗରେ ପୀଡିତ। ଏପରିକି ରାଜ୍ୟରେ କିଛି ଅଞ୍ଚଳରେ ଏହା ପ୍ରାୟ ୨୦ ପ୍ରତିଶତ ରହିଛି ଓ ଏ ସମସ୍ତ ଅଞ୍ଚଳକୁ ସିକେଡି ହଟ୍ସ୍ପଟ୍ ଭାବେ ବିବେଚିତ କରାଯାଉଛି। ଏହା ଚିନ୍ତାଜନକ ବୋଲି ଡା. ପଣ୍ଡା ମତବ୍ୟକ୍ତ କରିଛନ୍ତି। ଆହୁରି ମଧ୍ୟ ସେ କହିଛନ୍ତି, ସାମ୍ପ୍ରତିକ ପରିସ୍ଥିତିରେ ବିଶ୍ବବ୍ୟାପୀ ଡାଇବେଟିସ୍ ମେଲିଟସ୍ ହେଉଛି ଉଚ୍ଚ ରକ୍ତଚାପ ପରେ ବୃକକ୍ ବିଫଳତାର ମୁଖ୍ୟ କାରଣ। କିନ୍ତୁ ନିକଟ ଅତୀତରେ ଅଧିକରୁ ଅଧିକ ଯୁବକ ଅଣ-ମଧୁମେହ ରୋଗୀ ଏବଂ ଉଚ୍ଚ ରକ୍ତଚାପ ରୋଗୀ କିଡ୍ନୀ ରୋଗରେ ଆକ୍ରାନ୍ତ ହେଉଥିବା ପରିଲକ୍ଷିତ ହେଉଥିବା ଡା. ପଣ୍ଡା ସୂଚନା ଦେଇଛନ୍ତି। ସେହିପରି ଏହି କାର୍ଯ୍ୟକ୍ରମରେ ଜେନେରାଲ ମେଡିସିନ୍ ବିଭାଗର ଅତିରିକ୍ତ ପ୍ରଫେସର ଡା. ଅନୁପମ ଦେ, ୟୁରୋଲୋଜିର ସହକାରୀ ପ୍ରଫେସର ଡା. ମନୋଜ ଦାସ, ଶିଶୁରୋଗ ବିଭାଗର ଆସୋସିଏଟ୍ ପ୍ରଫେସର ଡା. ଅମିତ ଶତପଥୀ, ମେଡିସିନ୍ ବିଭାଗର ସହକାରୀ ପ୍ରଫେସର ଡା. ଦେବାନନ୍ଦ, ନେଫ୍ରୋଲୋଜିର ସହକାରୀ ପ୍ରଫେସର ଡା. ପ୍ରୀତି ମୀନା ପ୍ରମୁଖ କିଡ୍ନୀ ରୋଗ ଉପରେ ମତ ରଖିଥିଲେ। ରକ୍ତଚାପ ଓ ମଧୁମେହକୁ ନିୟନ୍ତ୍ରଣ କରିବା, ପର୍ଯ୍ୟାପ୍ତ ପରିମାଣର ପାଣି ପିଇବା, ଧୂମପାନରୁ ଦୂରେଇ ରହିବା, ଅନାବଶ୍ୟକ ଔଷଧ ସେବନରୁ ଦୂରେଇ ରହିବା ଦ୍ବାରା କିଡ୍ନୀ ରୋଗରୁ ରକ୍ଷା ପାଇପାରିବା ବୋଲି ସେମାନେ କହିଛନ୍ତି।