ବ୍ୟାଙ୍କକ୍,୨୮ା୪: ଥାଇଲାଣ୍ଡର ଜଣେ ଗର୍ଭବତୀ ମହିଳା ତାଙ୍କର ୧୨ ଜଣ ବନ୍ଧୁଙ୍କୁ ସାୟନାଇଡ୍ ଦେଇ ହତ୍ୟା କରିଥିବା ଅଭିଯୋଗ ହୋଇଛି। ମୃତକଙ୍କ ବୟସ ୩୩ରୁ ୪୪ ବର୍ଷ ମଧ୍ୟରେ ହୋଇଥିବାବେଳେ ସେମାନଙ୍କୁ ୨୦୨୦ ଡିସେମ୍ବରରୁ ୨୦୨୩ ଏପ୍ରିଲ ମଧ୍ୟରେ ହତ୍ୟା କରାଯାଇଛି। ତଦନ୍ତ ପରେ ପୋଲିସ ବ୍ୟାଙ୍କକ୍ରୁ ଅଭିଯୁକ୍ତ ମହିଳା ସରାରତ ରଙ୍ଗସିଉଥାପର୍ନ(୩୨)ଙ୍କୁ ମଙ୍ଗଳବାର ଗିରଫ କରିଛି। ଚଳିତ ମାସ ଆରମ୍ଭରେ ତାଙ୍କ ବନ୍ଧୁ ସିରିପର୍ନ ଖାନ୍ଓଙ୍ଗଙ୍କ ମୃତ୍ୟୁକୁ ନେଇ ମହିଳା ଜଣକ ସନ୍ଦେହ ଘେରକୁ ଆସିଥିଲେ। ଗତ ୧୪ ତାରିଖରେ ରଙ୍ଗସିଉଥାପର୍ନ ତାଙ୍କ ବନ୍ଧୁ ସିରିପର୍ନଙ୍କ ସହ ରାଟ୍ଚାବୁରି ପ୍ରଦେଶକୁ ଭ୍ରମଣରେ ଯାଇ ଏକ ନଦୀରେ ବୈଦ୍ଧ ଧର୍ମାବଲମ୍ବୀ ସୁରକ୍ଷା ରୀତିନୀତିରେ ସାମିଲ ହୋଇଥିଲେ। ଉକ୍ତ ନଦୀକୂଳରେ ସିରିପର୍ନଙ୍କର ମୂର୍ଚ୍ଛାଯିବା ସହ ତାଙ୍କର ମୃତ୍ୟୁ ଘଟିଥିଲା। ବ୍ୟବଚ୍ଛେଦ ରିପୋର୍ଟରୁ ତାଙ୍କ ଦେହରେ ସାୟନାଇଡ୍ ଥିବା ଜଣାପଡ଼ିଥିଲା। ସିରିପର୍ନଙ୍କ ଫୋନ୍, ଟଙ୍କା ଓ ବ୍ୟାଗ୍ ଗାଏବ୍ ହୋଇଯାଇଥିଲା। ରଙ୍ଗସିଉଥାପର୍ନ ତାଙ୍କ ବୟଫ୍ରେଣ୍ଡଙ୍କ ସହ ଅନ୍ୟ ୧୧ ଜଣଙ୍କୁ ଏହିଭଳି ସାୟନାଇଡ୍ ଦେଇ ହତ୍ୟା କରିଥିବା ପୋଲିସ ତଦନ୍ତରୁ ବିଶ୍ୱାସ କରାଯାଉଛି। ସମସ୍ତ ମୃତକଙ୍କ ଅର୍ଥ, ଗହଣା ଆଦି ଗାଏବ୍ ହୋଇଥିବାରୁ ରଙ୍ଗସିଉଥାପର୍ନ ଲୁଟ୍ ପାଇଁ ସେମାନଙ୍କୁ ହତ୍ୟା କରିଥିବା ବିଶ୍ୱାସ କରାଯାଉଛି। ତେବେ ଜଣେ ପୋଲିସ ଅଫିସରଙ୍କ ପୂର୍ବତନ ସ୍ତ୍ରୀ ରଙ୍ଗସିଉଥାପର୍ନ ଉକ୍ତ ଅଭିଯୋଗକୁ ଖଣ୍ଡନ କରିଛନ୍ତି। ଗର୍ଭବତୀ ମହିଳା ଜଣକ ପୋଲିସ ହାଜତରେ ଅଧିକ ସମୟ ରହିବା ପରେ ମାନସିକ ଅବସାଦରେ ରହିଥିଲେ ବୋଲି ତାଙ୍କ ଓକିଲ କହିଛନ୍ତି। ସମସ୍ତ ହତ୍ୟାକାଣ୍ଡ ରଙ୍ଗସିଉଥାପର୍ନଙ୍କ ଦ୍ୱାରା ହୋଇଥିବା ପ୍ରମାଣ ମିଳିଲେ, ତାଙ୍କୁ ସିରିଏଲ୍ କିଲର ଦର୍ଶାଯାଇପାରିବ ବୋଲି ପୋଲିସ ମେଜର-ଜେନେରାଲ ମୋଣ୍ଟ୍ରି ଥେସ୍ଖା କହିଛନ୍ତି।