ଦଶମନ୍ତପୁର,୧୨।୪(ଡି.ଏନ୍.ଏ.): କୋରାପୁଟ ଜିଲା ଦଶମନ୍ତପୁର ବ୍ଲକ ଡୁମୱାଗୁଡ଼ା ପଞ୍ଚାୟତ ଅଧୀନ ବଡ଼ବାଗ୍ରୀ ଗ୍ରାମରେ ଏକ ଅଭାବନୀୟ ଘଟଣା ଘଟିଛି। ମାଛ ଭାଗବଣ୍ଟାରେ ସାନଭାଇ ରାଜି ନ ହୋଇ ବଟକରାରେ ଛେଚି ସମ୍ପର୍କୀୟ ବଡ଼ଭାଇଙ୍କୁ ହତ୍ୟା କରିଛନ୍ତି। ମୃତକ ହେଲେ ବିରିଙ୍ଗା ମୁଦୁଲି (୬୦)। ପୋଲିସ ମୃତଦେହ ଜବତ କରି ତଦନ୍ତ ଆରମ୍ଭ କରିଛି। ଅଭିଯୁକ୍ତ ସାନଭାଇ ଧନେଶ୍ୱର ମୁଦୁଲି ଫେରାର୍ ଅଛନ୍ତି। ବଡ଼ବାଗ୍ରୀ ଗ୍ରାମର ବିରିଙ୍ଗା ଓ ତାଙ୍କ ଦାଦାଙ୍କ ପୁଅ ଦୁଇ ସାନଭାଇ ଧନେଶ୍ୱର ମୁଦୁଲି ଓ ହରିଶ୍ଚନ୍ଦ୍ର ମୁଦୁଲି ମିଶି ନାତରଝୋଲା ନିକଟରେ ମାଛଚାଷ କରନ୍ତି। ସୋମବାର ୩ ଭାଇ ମିଶି ପୋଖରୀରୁ ମାଛଧରି ଭାଗ ବାଣ୍ଟିବାକୁ ବସିଥିଲେ। ବଡ଼ଭାଇ ବିରିଙ୍ଗା କେଜି ହିସାବରେ ମାଛ ଭାଗ ବାଣ୍ଟିନେବା ବୋଲି କହିଥିଲେ। ଧନେଶ୍ୱର ଏଥିରେ ରାଜି ନ ହୋଇ ରୋକ୍ଠୋକ ମନା କରି ଦେଇଥିଲେ। ଏହାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା। ପରେ ଏହା ଉଗ୍ରରୂପ ନେଇଥିଲା। ଧନେଶ୍ୱର ଉତ୍ତ୍ୟକ୍ତ ହୋଇ ଧରିଥିବା ବଟକରାରେ ବିରିଙ୍ଗାଙ୍କ ମୁଣ୍ଡକୁ ଛେଚି ଚାଲିଥିଲେ। ହରିଶ୍ଚନ୍ଦ୍ର ସେଠାରେ ଥିଲେ ମଧ୍ୟ ତାଙ୍କୁ ଅଟକାଇ ପାରି ନ ଥିଲେ। ଏହା ଜାଣିବା ପରେ ବିରିଙ୍ଗାଙ୍କ ବଡ଼ଝିଅ ସୁରେଶ ଗ୍ରାମର କେତେଜଣଙ୍କ ସହ ମିଶି ବାପାଙ୍କୁ ଉଦ୍ଧାର କରି ଘରକୁ ଆଣିଥିଲେ। ତେବେ କିଛି ସମୟ ମଧ୍ୟରେ ବାପାଙ୍କ ମତ୍ୟୁ ଘଟିଥିବା ସୁରେଶ ମଙ୍ଗଳବାର ଦଶମନ୍ତପୁର ଥାନାରେ ଏତଲା ଦେଇଥିଲେ। ପୋଲିସ ଟିମ୍ ସହ ଥାନା ଅଧିକାରୀ ଚନ୍ଦ୍ରଭାନୁ ମହାନ୍ତି ଏବଂ ସାଇଣ୍ଟିଫିକ୍ ଟିମ ପହଞ୍ଚି ତଦନ୍ତ କରିଛନ୍ତି। ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ଏ ନେଇ ଏକ ହତ୍ୟା ମାମଲା ରୁଜୁ ହୋଇଛି। ସୂଚନାଯୋଗ୍ୟ, ବିରିଙ୍ଗା ତାଙ୍କ ପରିବାରର ଜଣେ ମାତ୍ର ରୋଜଗାରକ୍ଷମ ବ୍ୟକ୍ତି ଥିଲେ। ବଡଝିଅ ସୁରେଶ ବିବାହିତା। ଘରେ ସାନଝିଅ ଘେନାଇ ଓ ସ୍ତ୍ରୀ ସୁନ୍ଦରୀ ଏବେ ଅସହାୟ ହୋଇପଡ଼ିଛନ୍ତି।
