ସଇଁତଳା,୨୪ା୫(ଡି.ଏନ.ଏ.): ବଲାଙ୍ଗୀର ଜିଲା ସଇଁତଳା ଥାନା ଟିକ୍ରାପଡ଼ା ଫାଣ୍ଡି ଅଧୀନ ଦେଓଗାଁରେ ବୁଦ୍ଧଦେବ ନାଗ(୨୯)ଙ୍କୁ ପଥରରେ ଛେଚି ହତ୍ୟା କରାଯାଇଥିବା ଘଟଣାରେ ପୋଲିସ ବୁଧବାର ୨ଜଣଙ୍କୁ ଗିରଫ କରିଛି। ସେମାନେ ହେଲେ ଦେବାଶିଷ ବେଣ୍ଟକାର ଓ ନକୁଳ ନାଗ। ଉଭୟଙ୍କୁ ସଇଁତଳା କୋର୍ଟକୁ ଚାଲାଣ କରାଯାଇଥିଲା। ଜାମିନ ନାମଞ୍ଜୁର ହେବାରୁ ଉଭୟଙ୍କୁ ଟିଟିଲାଗଡ଼ ଜେଲକୁ ପଠାଇ ଦିଆଯାଇଛି।
ଟିକ୍ରାପଡ଼ା ଫାଣ୍ଡି ଦେଓଗାଁର ଗୋଷ୍ଠୀ କେନ୍ଦ୍ର ନିକଟରେ ଗତ ୨୩ ତାରିଖ ସକାଳେ ବୁଦ୍ଧଦେବଙ୍କ ରକ୍ତ ଜୁଡୁବୁଡୁ ଅବସ୍ଥାରେ ମୃତଦେହ ଠାବ ହୋଇଥିଲା। ମୁଣ୍ଡରେ ଗଭୀର ଆଘାତ ଲାଗିଥିବାବେଳେ ମୃତଦେହ ନିକଟରେ ରକ୍ତ ଲଗା ପଥର ପଡ଼ିଥିଲା। ପୋଲିସ ସୂତ୍ରରୁ ପ୍ରକାଶ ବୁଦ୍ଧଦେବ ପ୍ରଥମେ ଏକ ଟେଣ୍ଟ ହାଉସର ଗାଡ଼ି ଚଳାଉଥିଲେ। ଗତ କିଛିଦିନ ହେଲା ଗ୍ରାମରେ କାଠମିସ୍ତ୍ରୀ କାମ କରୁଥିବା ଦେବାଶିଷ ବେଣ୍ଟକାରଙ୍କ ପାଖରେ କାମ କରୁଥିଲେ। ଘଟଣାଦିନ ସନ୍ଧ୍ୟାରେ ବୁ୍ଦ୍ଧଦେବ, ସମ୍ପର୍କୀୟ ପୁତୁରା ନକୁଳ ନାଗ ଓ ଦେବାଶିଷ ଏକ ବାଇକରେ ଦେଓଗାଁଠାରେ ଥିବା ମଦଭାଟିକୁ ଆସି ମଦ ପିଇଥିଲେ । ଗ୍ରାମର ଗୋଷ୍ଠୀ କେନ୍ଦ୍ରଠାରେ ବୁଦ୍ଧଦେବ ଦେବାଶିଷଙ୍କ କାମର ପାଉଣା ମାଗିଥିଲେ। ଏଥିରେ ୩ଜଣଙ୍କ ମଧ୍ୟରେ ବଚସା ହୋଇଥିଲା । ଦେବାଶିଷ ଓ ନକୁଳଙ୍କ ପଥର ମାଡ଼ରେ ବୁଦ୍ଧଦେବଙ୍କ ମୁଣ୍ଡ ଫାଟିଯାଇ ପ୍ରବଳ ରକ୍ତସ୍ରାବ ହୋଇ ମୃତ୍ୟୁ ଘଟିିଥିବା ପୋଲିସ କହିଛି ।
