ଝାରବନ୍ଧ,୨।୭(ଦେବେନ୍ଦ୍ର ସାହୁ): ବରଗଡ଼ ଜିଲା ଝାରବନ୍ଧ ଥାନା ଭଣ୍ଡାରପୁରୀ ପଞ୍ଚାୟତ ଅଧୀନ ଜାମପାଲି ଗ୍ରାମରେ ଏକ ହତ୍ୟାକାଣ୍ଡ ଘଟିଛି। ଗ୍ରାମର ଶିବ ପ୍ରସାଦ ସାହୁ(୭୦) ତାଙ୍କ ସ୍ତ୍ରୀ ଶ୍ରୀୟା(୬୫)ଙ୍କୁ କୋଦାଳରେ ହାଣି ହତ୍ୟା କରିଛନ୍ତି। ରବିବାର ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଦ୍ମପୁର ଉପଖଣ୍ଡ ଡାକ୍ତରଖାନାକୁ ପଠାଇଛି। ଏହି ଘଟଣାରେ ମୃତା ମହିଳାଙ୍କ ସ୍ବାମୀ ଶିବ ପ୍ରସାଦଙ୍କୁ ପୋଲିସ ଗିରଫ କରିଛି। ଏହା ସହିତ ତାଙ୍କ ପାଖରୁ ହତ୍ୟାକାଣ୍ଡରେ ବ୍ୟବହୃତ କୋଦାଳକୁ ପୋଲିସ ଜବତ କରିଛି। ଏ ନେଇ ଝାରବନ୍ଧ ଥାନାରେ ଏକ ହତ୍ୟା ମାମଲା (ନଂ.୯୭/୨୩) ରୁଜୁ ହୋଇଛି।
ପୋଲିସ ସୂଚନା ମୁତାବକ, ଶିବ ପ୍ରସାଦ ଏବଂ ଶ୍ରୀୟାଙ୍କ ମଧ୍ୟରେ କୌଣସି କାରଣରୁ ବଚସା ହୋଇଥିଲା। ପରିବାରର ଅନ୍ୟ ସଦସ୍ୟମାନେ ବୁଝାଶୁଝା କରିବା ପରେ ଶ୍ରୀୟା ଶୋଇବା ଘରକୁ ଯାଇ ଶୋଇ ପଡ଼ିଥିଲେ। ମାତ୍ର ବିଳମ୍ବିତ ରାତିରେ ଶିବ ପ୍ରସାଦ ତାଙ୍କୁ ମାଡ଼ପିଟ୍ କରିବା ସହ ଏକ କୋଦାଳରେ ହାଣି ହତ୍ୟା କରିଥିଲେ। ମାଡ଼ପିଟ୍ ଶବ୍ଦ ଶୁଣି ପୁଅ ଟଙ୍କଧର ପହଞ୍ଚିଥିବା ବେଳେ ଆକ୍ରମଣରେ ମା’ଙ୍କ ମୃତ୍ୟୁ ହୋଇସାରିଥିଲା ବୋଲି ସେ କହିଛନ୍ତି। ରବିବାର ସକାଳେ ଟଙ୍କଧରଙ୍କଠାରୁ ସୂଚନା ପାଇ ଝାରବନ୍ଧ ଥାନା ପୋଲିସ ସାଇଣ୍ଟିଫିକ୍ ଟିମ୍ ସହ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା।