ଦାରିଙ୍ଗବାଡ଼ି/ବ୍ରାହ୍ମଣୀଗାଁ,୨୫ା୮(ଅରୁଣ ସାହୁ/ମନୋରଞ୍ଜନ ରଣା): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ବ୍ରାହ୍ମଣୀଗାଁ ଥାନା କାଟିଙ୍ଗିଆ ପଞ୍ଚାୟତ ଖାରିଗୁଡ଼ାରେ ଜଣେ ଗାଈ ଚରାଳିଙ୍କୁ କେହି ଦୁର୍ବୃତ୍ତ ଗୁଳିକରି ହତ୍ୟା କରିଥିବା ଗୁରୁବାର ବିଳମ୍ବିତ ରାତିରେ ଥାନାରେ ଅଭିଯୋଗ ହୋଇଛି। ହତ୍ୟାର ଶିକାର ହୋଇଥିବା ବ୍ୟକ୍ତି ହେଲେ ଖାରିଗୁଡ଼ାର ମାଦି ପଡ୍ରା (୫୫)। କାଲି ରାତି ହୋଇଯାଇଥିବାରୁ ଆଜି ବ୍ରାହ୍ମଣୀ ଗାଁ ପୋଲିସ ତଦନ୍ତ ଆରମ୍ଭ କରିଛି। ଅଭିଯୋଗରେ ମୃତ ମାଦି ପଡ୍ରାଙ୍କ ପୁଅ ଧର୍ମେନ୍ଦ୍ର ପଡ୍ରା କହିଛନ୍ତି ଯେ, ପ୍ରତିଦିନ ଭଳି ତାଙ୍କ ବାପା ଗାଈ ଚରାଇବା ପାଇଁ ଗୁରୁବାର ପୂର୍ବାହ୍ନରେ ବାହାରିଥିଲେ ହେଲେ ଅପରାହ୍ନ ୪ ଟାରେ କେବଳ ଗାଈ ଗୋଠ ଗ୍ରାମରେ ପହଞ୍ଚିଥିବା ବେଳେ ତାଙ୍କ ବାପା ପହଞ୍ଚି ନ ଥିଲେ। ସେ ଓ ତାଙ୍କ ମା’ ସିକମାଙ୍ଗା ଦୁହେଁ ବାପାଙ୍କୁ ଖୋଜିବାକୁ ବାହାରିଥିଲେ। ଏହି ସମୟରେ ଏକ ପଦାରରେ ତାଙ୍କ ବାପାଙ୍କୁ କେହି ଗୁଳି କରି ହତ୍ୟା କରିଥିବା ଜାଣିବାକୁ ପାଇଥିଲେ। ଏନେଇ ସେମାନେ ଗାଁକୁ ଆସି ସମସ୍ତଙ୍କୁ ଜଣାଇଥିଲେ ବୋଲି ଅଭିଯୋଗପତ୍ରରେ ଉଲ୍ଲେଖ କରିଛନ୍ତି। ଏଥିସହ ତାଙ୍କ ବାପାଙ୍କୁ ପୂର୍ବ ଶତ୍ରୁତାରୁ ଜଣେ ହତ୍ୟା କରିବାକୁ ଧମକ ଦେଇଥିବା ମଧ୍ୟ ମୃତ ମାଦିଙ୍କ ପୁଅ ଧର୍ମେନ୍ଦ୍ର ପୋଲିସଙ୍କୁ ଜଣାଇଛନ୍ତି। ଖବର ଲେଖାହେବା ସୁଦ୍ଧା ଘଟଣାରେ ପୋଲିସ କାହାରିକୁ ଗିରଫ କରି ନ ଥିବା ଜଣାପଡ଼ିଛି।