ଫତେହପୁର, ୧୯।୮: ଅଧରାତିରେ ବିବାହିତ ପ୍ରେମିକାକୁ ଭେଟିବାକୁ ଯାଇଥିବା ଜଣେ ଯୁବକଙ୍କୁ ହତ୍ୟା କରାଯାଇଛି। ଏହାପରେ ଯୁବକଙ୍କ ମା’ଙ୍କ ଅଭିଯୋଗକ୍ରମେ ପୋଲିସ ପ୍ରେମିକା, ତାଙ୍କ ଶ୍ୱଶୁର ଓ ଏବଂ ୪ ଜଣ ଲୋକଙ୍କୁ ଗିରଫ କରିଛି।
ଘଟଣା ଉତ୍ତର ପ୍ରଦେଶ ଫତେହପୁର ଜିଲାରେ ଘଟିଛି। ଜିଲାର ସଲେମପୁର ଗ୍ରାମରେ ରହୁଥିବା ମୋନୁ କୁମାରଙ୍କ ୨୩ ବର୍ଷୀୟ ପୁଅ ରୋହିତ୍ ସୋମବାର ରାତି ୧୦ଟାରେ ବାଗେଲା ଗ୍ରାମରେ ଥିବା ତାଙ୍କ ବିବାହିତ ପ୍ରେମିକା ଲକ୍ଷ୍ମୀଙ୍କୁ ଭେଟିବାକୁ ଯାଇଥିଲେ। ସେତେବେଳେ ଲକ୍ଷ୍ମୀଙ୍କ ସ୍ବାମୀ କୌଣସି କାମରେ ଦିଲ୍ଲୀ ଯାଇଥିବାବେଳେ ଘରେ ତାଙ୍କ ଶ୍ୱଶୁର, ଶାଶୁ ଓ ଅନ୍ୟମାନେ ଥିଲେ। ଏହି ସମୟରେ ରୋହିତ୍ ଲୁଚି ଲୁଚି ଲକ୍ଷ୍ମୀଙ୍କ ରୁମ୍କୁ ଯାଇଥିଲେ। ରୋହିତ୍ ଘରେ ପଶିବା ପରେ ଲକ୍ଷ୍ମୀ ଭିତର ପଟୁ କବାଟ ଦେଇ ଦେଇଥିଲେ। ତେବେ ଏହି କଥା ଲକ୍ଷ୍ମୀଙ୍କ ଶ୍ୱଶୁର ଚନ୍ଦ୍ରପାଲ କୌଣସିମତେ ଜାଣିପାରିଥିଲେ। ସେ ତାଙ୍କର ଭାଇ ସୂରଜପାଲ ଓ ଅନ୍ୟ କିଛି ଯୁବକଙ୍କୁ ସାଥୀରେ ନେଇ ଲକ୍ଷ୍ମୀଙ୍କ କବାଟ ବାଡ଼େଇଥିଲେ। ବହୁ ସମୟ ପରେ ସେମାନେ କବାଟ ଭାଙ୍ଗି ଭିତରକୁ ପଶିଥିଲେ। ଲକ୍ଷ୍ମୀ କୌଣସି ପ୍ରକାର ଖସି ପଳାଇ ଯାଇଥିବାବେଳେ ରୋହିତ୍ ଧରାପଡ଼ି ଯାଇଥିଲେ। ସମସ୍ତେ ମିଶି ରୋହିତ୍ଙ୍କୁ ନିର୍ଦ୍ଧୁମ ପିଟିବା ସହିତ ତାଙ୍କ ବେକରେ ରଶି ବାନ୍ଧି ଫ୍ୟାନରେ ଝୁଲାଇ ଦେଇଥିଲେ। ଏହି ଘଟଣା ଜଣାପଡ଼ିବା ପରେ ରୋହିତ୍ଙ୍କ ମା’ଙ୍କ ଅଭିଯୋଗକ୍ରମେ ପୋଲିସ ଲକ୍ଷ୍ମୀ, ତାଙ୍କ ଶ୍ୱଶୁର, ଶାଶୁଙ୍କ ସମେତ ୪ ଜଣଙ୍କୁ ଗିରଫ କରିଛି।