ବ୍ରହ୍ମପୁର,୧୨ା୧୦(ସୁବାସ ଚନ୍ଦ୍ର ପାଢ଼ୀ): ବ୍ରହ୍ମପୁର ଜିଲା ପୋଲିସ ଅଧୀନ ଗୋଷାଣି ନୂଆଗାଁ ଥାନା ଅନ୍ତର୍ଗତ ବିଜିପୁର ନୀଳକଣ୍ଠନଗରରେ ଶିଶୁ ମଙ୍ଗଳ କମିଟି(ସିଡବ୍ଲୁସି) ସଦସ୍ୟା ସୌଦାମିନୀ ରଥଙ୍କୁ ନିର୍ମମ ଭାବେ ହତ୍ୟା କରାଯାଇଛି। ଚୋରି ଧରାପଡିଯିବା ଭୟରେ କାର୍ ଡ୍ରାଇଭର କଟୁରୀରେ ପିଟି ତାଙ୍କୁ ହତ୍ୟା କରିଥିବା ଜଣାପଡିଛି। ଅଭିଯୁକ୍ତ କାର୍ ଡ୍ରାଇଭର ସୀମାଞ୍ଚଳ ସାହୁଙ୍କୁ ପୋଲିସ ଗିରଫ କରିଛି। ଗୁରୁବାର ପୋଲିସ ଅଭିଯୁକ୍ତଙ୍କୁ ଘରକୁ ଆଣି କ୍ରାଇମ୍ ସିନ୍ ରିକ୍ରିଏସନ କରିିଛି। ସୀମାଞ୍ଚଳଙ୍କ ସ୍କୁଟି ସହ ତାଙ୍କ ପକେଟରୁ ସୌଦାମିନୀଙ୍କ ମୋବାଇଲ ଫୋନ ଓ ଘରୁ କଟୁରୀ ଜବତ କରାଯାଇଛି। ପୋଲିସ ସାଇଣ୍ଟିଫିକ ଟିମ୍ ସହାୟତାରେ ଘଟଣାର ତଦନ୍ତ ଆରମ୍ଭ କରିଛି।
ପ୍ରକାଶ ଯେ, ସୌଦାମିନୀ ସ୍ବେଚ୍ଛାସେବୀ ସଙ୍ଗଠନ ‘ଅରୁଣା’ର ସମ୍ପାଦିକା ଥିବା ବେଳେ ଗତ ଜୁଲାଇ ୧୨ ତାରିଖରେ ସିଡବ୍ଲ୍ୟୁସି ସଦସ୍ୟା ଭାବେ ନିଯୁକ୍ତି ପାଇଥିଲେ। ତାଙ୍କର ଏକମାତ୍ର ପୁଅ ଓ ବୋହୂ ବେଙ୍ଗାଲୁରୁରେ ରୁହନ୍ତି। ସୌଦାମିନୀ ଏକା ରହୁଥିଲେ। ଗତ ୧୦ତାରିଖରେ ସେ ୩ ଦିନିଆ ପ୍ରଶିକ୍ଷଣ ଶିବିରରେ ଯୋଗ ଦେବାକୁ ଘରେ ତାଲା ପକାଇ ଭୁବନେଶ୍ୱର ଆସିବା ବେଳେ ଗୁରୁବାର ଫେରିବେ ବୋଲି କାର ଡ୍ରାଇଭର ସୀମାଞ୍ଚଳଙ୍କୁ କହିଥିଲେ। କୌଣସି କାରଣବଶତଃ ସୌଦାମିନୀ ବୁଧବାର ରାତି ପ୍ରାୟ ସାଢେ ୧୦ଟାରେ ବ୍ରହ୍ମପୁର ଫେରି ଆସିଥିଲେ। ଘର ଭିତରେ ହଠାତ୍ ସୀମାଞ୍ଚଳଙ୍କୁ ଦେଖି ତାଙ୍କର ସନ୍ଦେହ ହୋଇଥିଲା। ସୌଦାମିନୀ ତାଙ୍କର ଜଣେ ସମ୍ପର୍କୀୟଙ୍କୁ ଫୋନରେ ଘଟଣା ସମ୍ପର୍କରେ କହିଥିଲେ। ସୀମାଞ୍ଚଳ ଧରାପଡିଯିବା ଭୟରେ ଏକ କଟୁରୀରେ ତାଙ୍କ ମୁଣ୍ଡକୁ ବାରମ୍ବାର ଆଘାତ କରି ଚମ୍ପଟ୍ ମାରିଥିଲେ। ଗୁରୁତର ଅବସ୍ଥାରେ ସୌଦାମିନୀ କାର ଡ୍ରାଇଭର ମୋତେ ମାରିଦେଲା ବୋଲି ସମ୍ପର୍କୀୟଙ୍କୁ ଚିତ୍କାର କରି ଜଣାଇଥିଲେ। ସମ୍ପର୍କୀୟମାନେ ଘରେ ପହଞ୍ଚି ସୌଦାମିନୀଙ୍କ ରକ୍ତ ଜୁଡୁବୁଡ଼ୁ ଅବସ୍ଥାରେ ମୃତଦେହ ପଡିଥିବା ଦେଖି ଘଟଣା ସମ୍ପର୍କରେ ପୁଅ ପ୍ରବୀଣ ଓ ପୋଲିସକୁ ଜଣାଇଥିଲେ। ପୋଲିସ ପହଞ୍ଚି ମୃତଦେହ ଜବତ କରିବା ସହ ରାତିସାରା ଜଗି ରହିଥିଲା। ଗୁରୁବାର ସକାଳେ ପୁଅ ଓ ବୋହୁ ଆସିି ପହଞ୍ଚିବା ପରେ ମାଜିଷ୍ଟ୍ରେଟଙ୍କ ଉପସ୍ଥିତିରେ ମୃତଦେହ ପଞ୍ଚନାମା ସହ ବ୍ୟବଚ୍ଛେଦ ପାଇଁ ପଠାଇଥିଲା। ବ୍ରହ୍ମପୁର ଟାଉନ ଏସଡ଼ିପିଓ ରାଜୀବ ଲୋଚନ ପଣ୍ଡା କହିଛନ୍ତି, କାର୍ ଡ୍ରାଇଭର ସୀମାଞ୍ଚଳ ଚୋରି କରିବା ଉଦ୍ଦେଶ୍ୟରେ ସୌଦାମିନୀଙ୍କ ଘରେ ପଶିଥିଲେ। ଧରାପଡ଼ିଯିବା ଭୟରେ ସେ ହତ୍ୟା କରିଛନ୍ତି। ସୌଦାମିନୀଙ୍କ ଭଉଣୀ ପୁଷ୍ପାଞ୍ଜଳୀ ଆଚାର୍ଯ୍ୟ ଘଟଣା ସମ୍ପର୍କରେ ଥାନାରେ ଅଭିଯୋଗ କରିଛନ୍ତି। ଏନେଇ ପୋଲିସ ଏକ ହତ୍ୟା ମାମଲା(ନଂ.୩୧୦/୨୩) ରୁଜୁ କରି ଘଟଣାର ତଦନ୍ତ ଜାରି ରଖିଥିବା ଏସ୍ଡିପିଓ ପ୍ରକାଶ କରିଛନ୍ତି।