ମହାକାଳପଡ଼ା,୧୪ା୧୦ (ଡି.ଏନ୍.ଏ.): ସ୍ତ୍ରୀଙ୍କ ପରକୀୟା ପ୍ରୀତିକୁ ସନ୍ଦେହ କରିବାରୁ ସ୍ବାମୀଙ୍କୁ ହତ୍ୟା କରାଯାଇଥିବା ନେଇ ଥାନାରେ ଅଭିଯୋଗ ହୋଇଛି। ମୃତ ସ୍ବାମୀଙ୍କ ପରିବାର ଲୋକଙ୍କୁ ନ୍ୟାୟ ଦାବିରେ ମହିଳାମାନେ ଘର ସମ୍ମୁଖରେ ମୃତଦେହ ରଖି ଗୁରୁବାର ରାସ୍ତାରୋକୋ କରିଛନ୍ତି। ଏଭଳି ଘଟଣା ଘଟିଛି କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଧୀନ ଜମ୍ବୁ ସାମୁଦ୍ରିକ ଥାନା ଅଞ୍ଚଳରେ। ଜମ୍ବୁ ଗଁାର ରାମକୃଷ୍ଣ ମଣ୍ଡଳ ମନି କରଙ୍କ ଝିଅ ଝିଙ୍କିଙ୍କୁ ୨୦୧୬ରେ ପ୍ରେମ ବିବାହ କରିଥିଲେ। ଏମାନଙ୍କର ଦୁଇଟି ପିଲା ଅଛନ୍ତି। ତେବେ ଝିଙ୍କି ଫୋନରେ ଅନ୍ୟ ଜଣେ ପୁରୁଷ ବନ୍ଧୁଙ୍କ ସହ ବହୁ ସମୟରେ କଥା ହେଉଥିଲେ। ସ୍ତ୍ରୀଙ୍କ ଏପରି ବ୍ୟବହାରକୁ ନେଇ ସ୍ବାମୀଙ୍କ ସନ୍ଦେହ ସୃଷ୍ଟି ହୋଇଥିଲା। ଏହାକୁ ନେଇ ସ୍ତ୍ରୀ-ସ୍ବାମୀଙ୍କ ମଧ୍ୟରେ ମନାନ୍ତର ଯୋଗୁ ଅନେକ ସମୟରେ ବିବାଦ ଲାଗି ରହୁଥିଲା। ଦୁଇଦିନ ପୂର୍ବରୁ ସ୍ବାମୀ ରାମକୃଷ୍ଣଙ୍କୁ ଶ୍ୱଶୁରଘର ଲୋକମାନେ ମାରି ପାଟିରେ ବିଷ ପିଆଇ ଦେଇ ଆତ୍ମହତ୍ୟାର ରୂପ ଦେବାକୁ ଷଡ଼ଯନ୍ତ୍ର କରିଥିବା ନେଇ ମୃତକଙ୍କ ବାପା ସୌମେନ୍ଦ୍ର ଜମ୍ବୁ ସାମୁଦ୍ରିକ ଥାନାରେ ଲିଖିତ ଅଭିଯୋଗ କରିଛନ୍ତି। ବୋହୂଙ୍କ ଭାଇମାନେ ମୋ ପୁଅକୁ ହତ୍ୟା କରି କେଉଁ ଆଡ଼େ ଫେରାର ଅଛନ୍ତି ବୋଲି ଲିଖିତ ଅଭିଯୋଗରେ ଉଲ୍ଲେଖ ରହିଛି। ରାମକୃଷ୍ଣଙ୍କ ଘରକୁ ନ ଜଣାଇ ମୃତଦେହ ବ୍ୟବଚ୍ଛେଦ ପାଇଁ କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସାଳୟକୁ ବୋହୂଙ୍କ ପରିବାର ଲୋକ ନେଇଥିବା ବାପା ସୌମେନ୍ଦ୍ର ଅଭିଯୋଗରେ ଦର୍ଶାଇଛନ୍ତି। ଏହି ଘଟଣାରେ ଆଇଆଇସି ପରେଶ କୁମାର ମହାନ୍ତିଙ୍କୁ ପଚାରିବାରେ ଅଭିଯୋଗ ମିଳିଛି। ବ୍ୟବଚ୍ଛେଦ ରିପୋର୍ଟ ଆସିବା ପରେ ଆଇନ ଅନୁସାରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି। ଅପରପକ୍ଷରେ ବୁଧବାର ଅପରାହ୍ନରେ ମୃତଦେହ ବ୍ୟବଚ୍ଛେଦ କରାଯାଇଛି। ଗୁରୁବାର ମୃତଦେହକୁ ରାମକୃଷ୍ଣଙ୍କ ଘର ସମ୍ମୁଖରେ ରଖି ନ୍ୟାୟ ଦାବିରେ ସ୍ଥାନୀୟ ମହିଳା ଓ ଲୋକମାନେ ରାସ୍ତା ଅବରୋଧ କରିଛନ୍ତି। ଅଦ୍ୟାବଧି ମୃତଦେହ ଘର ସମ୍ମୁଖରେ ପଡ଼ି ରହିଛି। ରିପୋର୍ଟ ଲେଖା ହେଲା ବେଳକୁ ମହିଳାମାନେ ନ୍ୟାୟ ଦାବିରେ ଅଡ଼ି ବସିଥିବା ଜଣାପଡିଛି।