ବଲାଙ୍ଗୀର ଅଫିସ,୨୫।୨ (ଡି.ଏନ୍.ଏ.): ବଲାଙ୍ଗୀର ଜିଲା ତୁଷରା ଥାନା ବୀରାମୁଣ୍ଡା ପଞ୍ଚାୟତ ଅନ୍ତର୍ଗତ କର୍ଲାଖମନ ଗାଁ ନିକଟ ରାହୁଲ ନଦୀ କୂଳରୁ ବୁଧବାର ସନ୍ଧ୍ୟାରେ ଜଣେ ଯୁବକଙ୍କ ଅର୍ଦ୍ଧଦଗ୍ଧ ମୃତଦେହ ପଡିଥିଲା। ଘଟଣାସ୍ଥଳରେ ପହଞ୍ଚତ୍ ବଲାଙ୍ଗୀର ସଦର ଏସ୍ଡିପିଓ ତୋଫାନ୍ ବାଗ ଓ ତୁଷରା ଥାନା ପୋଲିସ ଟିମ୍ ଛାନ୍ବିନ୍ ଆରମ୍ଭ କରିଥିଲେ। ପୋଲିସ ତଦନ୍ତ ପରେ ମୃତଦେହ ବୌଦ୍ଧ ଜିଲା କଣ୍ଟାମାଳ ଥାନା ଅନ୍ତର୍ଗତ ଉଦେର ଗ୍ରାମର ସହକାରୀ ଶିକ୍ଷକ ବାସୁଦେବ ଭୋଇ(୩୦)ଙ୍କର ବୋଲି ଚିହ୍ନଟ ହୋଇଥିଲା। ଏହି ଘଟଣାରେ ବଲାଙ୍ଗୀର ପୋଲିସ ଜଣେ ଯୁବତୀଙ୍କୁ ଅଟକ ରଖି ପଚରାଉଚରା କରୁଛି। ପ୍ରେମ ସମ୍ପର୍କକୁ ନେଇ ଏହା ଏକ ହତ୍ୟାକାଣ୍ଡ ହୋଇଥାଇପାରେ ବୋଲି ପ୍ରାଥମିକ ତଦନ୍ତରୁ ଜଣାପଡିଛି।
ମିଳିଥିବା ସୂଚନା ମୁତାବକ ଗତ ୧୨ ତାରିଖରେ ବାସୁଦେବ ଉଦେର ଗାଁରୁ ସନ୍ଧିସରା ଗ୍ରାମରେ ଥିବା ତାଙ୍କ ପିଉସୀ ପୁଅ ଭାଇ ପାଖକୁ ଯାଉଥିବା କହିଥିଲେ। ସେଠାରୁ କୌଣସି କାମରେ କର୍ଲାଖମନ ଗାଁକୁ ଯାଇଥିବା ବେଳେ ସେହିଦିନ ଠାରୁ ସେ ନିଖୋଜ ଥିଲେ। ବାସୁଦେବ ଘରକୁ ନ ଫେରିବାରୁ ପରିବାର ଲୋକେ ବିଭିନ୍ନ ସ୍ଥାନରେ ଖୋଜାଖୋଜି କରିବା ସହ କର୍ଲାଖମନ ଗାଁକୁ ଯାଇଥିଲେ। ସେଠାରେ ବିଭିନ୍ନ ବ୍ୟକ୍ତିଙ୍କୁ ପଚରାଉଚରା କରିଥିଲେ ମଧ୍ୟ ତାଙ୍କର କୌଣସି ପତ୍ତା ମିଳି ନ ଥିଲା। ଏନେଇ ପରିବାର ଲୋକେ ତୁଷରା ଥାନା ଏବଂ କଣ୍ଟାମାଳ ଥାନାରେ ବାସୁଦେବଙ୍କ ନିଖୋଜ ଥିବା ନେଇ ଅଭିଯୋଗ କରିଥିଲେ। ହେଲେ ବାସୁଦେବଙ୍କ ସମ୍ପର୍କରେ ପତ୍ତାର ମିଳି ନ ଥିଲା।
ବୁଧବାର ରାହୁଲ ନଦୀକୂଳରେ ଜଣେ ଯୁବକଙ୍କ ଅର୍ଦ୍ଧଦଗ୍ଧ ମୃତଦେହ ପଡିଥିବା ଖବର ପାଇବା ପରେ ଉଦେର ଗାଁରୁ ବାସୁଦେବଙ୍କ ପରିବାର ଲୋକେ ଘଟଣାସ୍ଥଳରେ ପହଞ୍ଚତ୍ ମୃତଦେହ ବାସୁଦେବଙ୍କ ବୋଲି ଚିହ୍ନଟ କହିଥିଲେ। ଯୁବକଙ୍କୁ ଧାରୁଆ ଅସ୍ତ୍ରରେ ହତ୍ୟା କରିବା ପରେ ପରିଚୟ ଓ ପ୍ରମାଣ ନଷ୍ଟ ପାଇଁ ପୋଡି ଦିଆଯାଇଥିଲା। ଏହି ଘଟଣାର ଛାନବିନ୍ ଆରମ୍ଭ କରିବା ପରେ ପୋଲିସ ପ୍ରେମ ସମ୍ପର୍କକୁ ନେଇ ହତ୍ୟାକାଣ୍ଡ ହୋଇଥିବା ସୁରାକ ପାଇବା ପରେ ଜଣେ ଯୁବତୀଙ୍କୁ ଥାନାକୁ ଡାକି ପଚରାଉଚରା କରୁଛି। ଯୁବତୀଙ୍କ ସନ୍ଦେହଜନକ ଭୂମିକା ସମ୍ପର୍କରେ ଜଣାପଡିବା ପରେ ଅଧିକ ପଚରାଉଚରା ପାଇଁ ତାଙ୍କୁ ଅଟକ ରଖାଯାଇଛି। ଯୁବତୀଙ୍କ ସହ ତାଙ୍କ ମା’ ବାପା ମଧ୍ୟ ତୁଷରା ଥାନାକୁ ଆସିଛନ୍ତି। ମାର୍ଚ୍ଚ ୯ ତାରିଖରେ ମୃତ ବାସୁଦେବଙ୍କ ବିବାହ ସ୍ଥିର ହୋଇଥିଲା। ଏଭଳି ସମୟରେ ସେ କେଉଁ କାରଣରୁ କର୍ଲାଖମନ ଗାଁକୁ ଆସିଥିଲେ ତାହା ଜଣାପଡିନାହିଁ। ଖବୁ ଶୀଘ୍ର ଘଟଣା ସମ୍ପର୍କରେ ପୋଲିସ ପକ୍ଷରୁ ଖବରଦାତା ସମ୍ମିଳନୀ କରାଯାଇ ଘଟଣାର ପର୍ଦ୍ଦାଫାଶ କରାଯିବ ବୋଲି ଜଣାପଡିଛି।
