ନୟାଗଡ ଅଫିସ,୧୫।୨: ନୟାଗଡ଼ ଜିଲା ଶରଣକୁଳ ଥାନା ସସ୍ମିତା ମହାପାତ୍ରଙ୍କୁ ହତ୍ୟା ପାଇଁ ତାଙ୍କ ସ୍ବାମୀ ଅକ୍ଷୟ ମହାପାତ୍ର ଓରଫ ଅଖିଳ (୩୯) ୫ଜଣ ସୁପାରିକିଲରଙ୍କ ସହାୟତା ନେଇଥିବାବେଳେ ପୋଲିସ ହତ୍ୟାର ରହସ୍ୟ ପର୍ଦ୍ଦାଫାଶ କରିଛି। ପ୍ରେମିକାଙ୍କୁ ବିବାହ ଲାଳସାରେ ଅକ୍ଷୟ ତାଙ୍କ ଜୀବନସାଥୀଙ୍କୁ କେବଳ ପର କରିଦେଇନାହାନ୍ତି, ବରଂ ତାଙ୍କ ଜୀବନ ନେଇଛନ୍ତି। ଏଥିରେ ତାଙ୍କ ପ୍ରେମିକା ସହାୟତା କରିଥିଲେ ବୋଲି ଅକ୍ଷୟ ସ୍ବୀକାର କରିଥିବା ପୋଲିସ କହିଛି। ଶନିବାର ଗିରଫ ହୋଇଥିବା ୪ ସୁପାରି କିଲର ଗୋଲଗାଁର ଜିତେନ୍ଦ୍ର ସ୍ବାଇଁ(୨୦), ତୋଫାନ ମଣ୍ଡଳ(୨୨), ଭାଗୀରଥି ମହାରଣା(୪୦) ଓ ଶରଣକୁଳ ସୁଆରସାହିର ମନୋଜ ପ୍ରଧାନ(୨୨) ଏବଂ ୨ ଦିନିଆ ରିମାଣ୍ଡରେ ଥିବା ମୁଖ୍ୟ ଅଭିଯୁକ୍ତ ଅକ୍ଷୟଙ୍କୁ ପୋଲିସ ରବିବାର ଘଟଣାସ୍ଥଳକୁ ନେଇ ସିନ୍ ରିକ୍ରିଏଟ୍ କରିଛି। ଏହି ସମୟରେ ହତ୍ୟାରେ ବ୍ୟବହୃତ ଓଢ଼ଣିକୁ ସ୍ଥାନୀୟ ଏକ ନଦୀକୂଳରୁ ପୋଲିସ ଜବତ କରିଛି। ଏହାସହ ୪ ସୁପାରିକିଲରଙ୍କୁ କୋର୍ଟ ଚାଲାଣ କରିଛି। ଜାମିନ ନାମଞ୍ଜୁର ପରେ ସେମାନଙ୍କୁ ନୟାଗଡ଼ ସବ୍ଜେଲକୁ ପଠାଇ ଦିଆଯାଇଛି। ଅନ୍ୟପକ୍ଷରେ ଅକ୍ଷୟଙ୍କୁ ଅଧିକ ପଚରାଉଚରା କରାଯାଉଛି। ସୋମବାର ମେଡିକାଲ ଟେଷ୍ଟ ପରେ ତାଙ୍କୁ କୋର୍ଟରେ ହାଜର କରାଯିବ। ଆଉ ଜଣେ ସୁପାରିକିଲର ଶରଣକୁଳର ଅମଜାତ୍ ଖାଁ ଫେରାର ହୋଇଯାଇଛନ୍ତି।
ଶରଣକୁଳଠାରେ ଖବରଦାତା ସମ୍ମିଳନୀରେ ନୟାଗଡ଼ ଏସ୍ପି ସିଦ୍ଧାର୍ଥ କାଟାରିଆ କହିଛନ୍ତି ଯେ, କଟକ ସଦର ଥାନା ଝିଙ୍କିରିଆ ଗାଁର ସୁଶାନ୍ତ ଦେବତାଙ୍କ ଝିଅ ସସ୍ମିତା ୨୦୧୭ରେ ଶରଣକୁଳର ଅକ୍ଷୟଙ୍କୁ ବିବାହ କରିଥିଲେ। ଅକ୍ଷୟ ବିବାହ ପୂର୍ବରୁ ନିଜ ଗାଁର ଜଣେ ଯୁବତୀ ରୀନା ମହାପାତ୍ରଙ୍କୁ ଭଲ ପାଉଥିଲେ। ବିବାହ ପରେ ଉଭୟଙ୍କ ସମ୍ପର୍କ ଥିବା ଜାଣିବା ପରେ ସସ୍ମିତା ତାହାକୁ ବିରୋଧ କରିଥିଲେ। ତେଣୁ ସସ୍ମିତାଙ୍କୁ ପ୍ରେମ ବାଟରୁ ହଟାଇବା ପାଇଁ ଅକ୍ଷୟ ୫ ଲକ୍ଷ ଟଙ୍କା ଯୌତୁକ ଆଣିବାକୁ ଚାପ ପ୍ରୟୋଗ କରିଥିଲେ। ଟଙ୍କା ଦେଇ ନ ପାରିଲେ ପଳାଇଯିବାକୁ ବାରମ୍ବାର କହୁଥିଲେ। ଏପରି କି ଶାରୀରିକ ଓ ମାନସିକ ନିର୍ଯାତନା ଦେଇ ଆସୁଥିଲେ। ଏହାସାଙ୍ଗକୁ ପ୍ରେମିକା ସହ ମିଶି ସସ୍ମିତାଙ୍କୁ ମାରିବା ପାଇଁ ବାରମ୍ବାର ଷଡ଼ଯନ୍ତ୍ର କରିଆସୁଥିଲେ। ପ୍ରଥମେ ଅକ୍ଷୟ ଗାଁ ନିିକଟ ଝରଣାକୁ ନେଇ ସସ୍ମିତାଙ୍କୁ ଠେଲି ମାରିବାକୁ ଉଦ୍ୟମ କରିଥିଲେ। ହେଲେ ସେଥିରେ ସଫଳ ହୋଇ ନ ଥିଲେ। ଏହାପରେ ୨୦୨୦ ଡିସେମ୍ବର ୧୫ରେ ମର୍ନିଂ ୱାକ୍ରେ ଯାଉଥିବା ସମୟରେ ଗାଡ଼ି ମଡ଼ାଇ ସସ୍ମିତାଙ୍କୁୁ ମାରିବାକୁ ଅକ୍ଷୟ ଯୋଜନା କରିଥିଲେ। ଏଥିପାଇଁ ଶରଣକୁଳର ମନୋଜ ପ୍ରଧାନ ଓ ଅମଜାତ୍ ଖାଁକୁ ୫୦ ହଜାର ଟଙ୍କାର ସୁପାରି ଦେଇଥିଲେ। ଏହା ମଧ୍ୟ ବିଫଳ ହୋଇଥିଲା। ପୁଣି ଗତ ଜାନୁୟାରୀ ୨୦ରେ ଗୋଲଗାଁର ଜିତେନ୍ଦ୍ର ଏବଂ ଭାଗୀରଥିଙ୍କୁ ଅଢେଇ ଲକ୍ଷ ଟଙ୍କାର ସୁପାରି ଡିଲ୍ କରି ଅକ୍ଷୟ ୨୦ହଜାର ଟଙ୍କା ଆଡ୍ଭାନ୍ସ ଦେଇଥିଲେ। ୨୨ ତାରିଖରେ ହତ୍ୟା ଉଦ୍ୟମ ବିଫଳ ହୋଇଥିଲା। ଏହାପରେ ଜାନୁୟାରୀ ୨୯ ରାତିରେ ସସ୍ମିତା ଶୋଇ ପଡ଼ିବା ପରେ ହତ୍ୟା ପାଇଁ ପ୍ରସ୍ତୁତି ଆରମ୍ଭ ହୋଇଥିଲା। ଖଟରେ ଶୋଇ ରହିଥିବା ସସ୍ମିତାଙ୍କୁ ଗୋଲଗଁାର ୩ ସୁପାରିକିଲର ଜିତେନ୍ଦ୍ର, ତୋଫାନ, ଭାଗୀରଥି ଧରିଥିଲେ। ଅକ୍ଷୟ ଏକ ଓଢ଼ଣିରେ ୫ ମିନିଟ୍ ଯାଏ ତଣ୍ଟି ଚିପି ଧରିଥିଲେ। ଫଳରେ ସସ୍ମିତାଙ୍କ ମୃତ୍ୟୁ ଘଟିଥିଲା। ଏହି ସମୟରେ ସସ୍ମିତାଙ୍କ ପାଖରେ ଶୋଇଥିବା ତାଙ୍କ ୨ବର୍ଷର ଶିଶୁକନ୍ୟା ଉଠି ପଡ଼ିଥିଲେ ମଧ୍ୟ ଅକ୍ଷୟଙ୍କୁ କିଛି ଫରକ ପଡ଼ି ନ ଥିଲା। ଏହାପରେ ମୃତଦେହକୁ ତଳମହଲାକୁ ଆଣି ଢିଙ୍କିଶାଳରେ ବାଉଁଶ ଭାଡିରେ ଝୁଲାଇ ଦେଇଥିଲେ। ସବୁ କିଛି ପ୍ରମାଣ ନଷ୍ଟ ପରେ ସ୍ତ୍ରୀ ଆମତ୍ହତ୍ୟା କରିଥିିବା ନେଇ ଥାନାରେ ଅଭିଯୋଗ କରିଥିଲେ ଅକ୍ଷୟ। ପ୍ରାଥମିକ ତଦନ୍ତ ପରେ ପୋଲିସ ପ୍ରଥମେ ଅକ୍ଷୟ ଏବଂ ପରେ ପ୍ରେମିକା ରୀନାଙ୍କୁୁ ଗିରଫ କରି କୋର୍ଟ ଚାଲାଣ କରିଥିଲା। ତଦନ୍ତ ବେଳେ ଏହି ହତ୍ୟାକାଣ୍ଡରେ ସୁପାରି ଦିଆଯାଇଥିବା ପୋଲିସ ଜାଣିବାକୁ ପାଇଥିଲା। ଖବରଦାତା ସମ୍ମିଳନୀରେ ଆଇଆଇସି ବିମଳ ମଲିକ ଓ ତଦନ୍ତକାରୀ ଅଫିସର ବିରଞ୍ଚି ନାରାୟଣ ଅମାତ ମଧ୍ୟ ହତ୍ୟାକାଣ୍ଡ ନେଇ ସୂଚନା ଦେଇଥିଲେ।