ଉତ୍ତର କୋରିଆର ଏକଛତ୍ରବାଦୀ ଶାସକ କିମ ଜୋଙ୍ଗ ଉନ୍ ତାଙ୍କ ଦେଶରେ ନୂତନ ନିୟମ ଲାଗୁ କରିଛନ୍ତି। ତେବେ ଏଠାରେ ଏପରି ଅନେକ ନିୟମ ଅଛି, ଯାହା ଆଶ୍ଚର୍ଯ୍ୟଜନକ। ବର୍ତ୍ତମାନ ଲାଗୁ ହୋଇଥିବା ନିୟମ କରୋନା ସମ୍ବନ୍ଧୀୟ। ଉତ୍ତର କୋରିଆର ଲୋକମାନେ ଆଉ ମାସ୍କ ପିନ୍ଧୁ ନାହାଁନ୍ତି, ଏ ନେଇ ସେମାନଙ୍କୁ କଠୋର ଦଣ୍ଡ ଦିଆଯିବ। ତେବେ ଏଠାରେ ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି, କିଛି ଦିନ ପୂର୍ବରୁ କିମ ଜୋଙ୍ଗ ଉତ୍ତର କୋରିଆରେ କରୋନା ପଜିଟିଭ୍ ନ ଥିବା ଘୋଷଣା କରିଥିଲେ।
କିମଙ୍କ ନୂତନ ନିୟମ ଅନୁଯାୟୀ, ମାସ୍କ ନ ପିନ୍ଧଥିବା ନାଗରିକମାନଙ୍କୁ ୩ ମାସ ପର୍ଯ୍ୟନ୍ତ କଠିନ ପରିଶ୍ରମ କରିବାକୁ ଦିଆଯାଇ ଦଣ୍ଡିତ କରାଯିବ। ରେଡିଓ ଫ୍ରି ଏସିଆ ରିପୋର୍ଟ ଅନୁଯାୟୀ, ଯେଉଁମାନେ ମାସ୍କ ନ ପିନ୍ଧିଥିବେ ସେମାନଙ୍କୁ ଧରିବା ପାଇଁ ଛାତ୍ରମାନଙ୍କ ଏକ ‘ଫେସ ମାସ୍କ ପାଟ୍ରୋଲ’ ଦଳ ଗଠନ କରାଯିବ। ଏଥିପାଇଁ ଛାତ୍ରଙ୍କ ନିଯୁକ୍ତି ଶୀଘ୍ର ହେବ।
ଉତ୍ତର କୋରିଆରେ କରୋନା ପଜିଟିଭ୍ ରହିଥିବା ବେଳେ ସଂଖ୍ୟା କେତେ ଅଛି ସେ ସମ୍ବନ୍ଧରେ କୌଣସି ସୂଚନା ନାହିଁ। ମାତ୍ର ଏହାକୁ ରୋକିବା ପାଇଁ ସେଠାରେ ଅନେକ ପଦକ୍ଷେପ ନିଆଯାଇଛି। ଉଦାହରଣ ସ୍ବରୂପ, ଲୋକଙ୍କୁ ଗୋଟିଏ ସ୍ଥାନରେ ଏକାଠି ହେବାକୁ ବାରଣ କରାଯାଇଛି ଏବଂ ମାସ୍କ ପିନ୍ଧିବା ବାଧ୍ୟତା ମୂଳକ କରାଯାଇଛି। ଏହା ବ୍ୟତୀତ ସୀମାରେ କାମ କରୁଥିବା ଲୋକଙ୍କୁ ଅଲଗା ରହିବାକୁ ପରାମର୍ଶ ଦିଆଯାଇଛି।
ତେବେ ଏହି ମାସ ଆରମ୍ଭରେ କିମ ଦାବି କରିଥିଲେ ଯେ, ତାଙ୍କ ଦେଶ କରୋନା ମୁକାବିଲା କରିବାରେ ସଫଳ ହୋଇଛି। ଜାନୁୟାରୀ ଶେଷ ସୁଦ୍ଧା, ଯେତେବେଳେ କରୋନା ବିସ୍ତାର ହେବାକୁ ଲାଗିଲା, ଉତ୍ତର କୋରିଆ ଏହାର ସଂକ୍ରମଣକୁ ରୋକିବା ପାଇଁ ଶୀଘ୍ର ପଦକ୍ଷେପ ନେଇଥିଲା। ସେ ଦେଶର ସମସ୍ତ ସୀମାକୁ ସିଲ୍ କରିଥିଲେ। କିଛି ଦିନ ପୂର୍ବେ ବିଶ୍ୱ ସ୍ବାସ୍ଥ୍ୟ ସଂଗଠନ ଏହା ମଧ୍ୟ କହିଥିଲାଯେ, ଉତ୍ତର କୋରିଆରେ ଏପର୍ଯ୍ୟନ୍ତ କେବଳ ୯୨୨ ଜଣଙ୍କୁ କରୋନା ପରୀକ୍ଷା କରାଯାଇଛି, ସେଥିମଧ୍ୟରୁ କୌଣସି ମାମଲା ପଜିଟିଭ୍ ଚିହ୍ନଟ ହୋଇ ନାହିଁ।