ସୁନାବେଡ଼ା, ୧।୩(ସ୍ବ.ପ୍ର.): ବହୁଦିନ ଧରି ହାଲ୍ ଟାଉନଶିପର ବିଭିନ୍ନ ନିଛାଟିଆ ଅଞ୍ଚଳ ଏବେ ଅସାମାଜିକ ବ୍ୟକ୍ତିଙ୍କ ଆଡ୍ଡାସ୍ଥଳ ପାଲଟିଛି। ଏନେଇ ବିଭିନ୍ନ ସମୟରେ ଗଣମାଧ୍ୟମରେ ଖବର ପ୍ରକାଶ ପାଇ ସମ୍ପୃକ୍ତ ଅଞ୍ଚଳଗୁଡ଼ିକରେ ପୋଲିସ ପାଟ୍ରୋଲିଂ ଦାବି ହୋଇଥିଲେ ମଧ୍ୟ ଏହାର କୌଣସି ପ୍ରଭାବ ଉଭୟ ପୋଲିସ ଓ ହାଲ୍ ସୁରକ୍ଷା ବାହିନୀ ଉପରେ ପଡ଼ିନାହିଁ। ଟାଉନଶିପ ଅଞ୍ଚଳର ଜଗନ୍ନାଥ ମାର୍କେଟକୁ ସଂଯୋଗ କରୁଥିବା ଫିଲ୍ମ ହଲ୍ ପଛ ରାସ୍ତା ନିର୍ଜନ ରାସ୍ତା ରୂପେ ପରିଚିତ। ସନ୍ଧ୍ୟା ହେଲେ ଏହା ଅସାମାଜିକ ବ୍ୟକ୍ତିଙ୍କ ଆଡ୍ଡାସ୍ଥଳୀ ପାଲଟିଯାଏ। ସେହିପରି ସି ଜୋନ୍ସ୍ଥିତ ଶିଶୁ ଉଦ୍ୟାନ ଓ ରାସ୍ତା ମଧ୍ୟ ଏମାନଙ୍କ କବଳକୁ ଚାଲିଯାଏ। ଫଳରେ ଏହି ରାସ୍ତା ଦେଇ ରାତିରେ ଯାତାୟାତ କରିବା ବିପଜ୍ଜନକ ହୋଇପଡିଛି। ରାସ୍ତାର ଗୋଟିଏ ପାର୍ଶ୍ୱ ଏଡିଏଭି ହାଇସ୍କୁଲକୁ ସଂଯୋଗ କରୁଥିବା ବେଳେ ଅନ୍ୟ ପାର୍ଶ୍ୱଟି ଭିଏସ୍ ବିଦ୍ୟାଳୟକୁ ସଂଯୋଗ କରୁଛି। ଏହି ରାସ୍ତାରେ ଥିବା ଶିଶୁ ଉଦ୍ୟାନ ଅପର ପାଶର୍ବରେ ସଂଗୀତ କଳା ବିଦ୍ୟାଳୟ ସହ ଏକ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ରହିଛି। ଉକ୍ତ ରାସ୍ତାର ମାତ୍ର ୫ଶହ ମିଟର ଦୂରରେ ଏକ ଫାଣ୍ଡି ରହିଛି। ହେଲେ ପୋଲିସ ନିର୍ବିକାର ରହିଥାଏ। ଫଳରେ ଏହି ରାସ୍ତା ଓ ଶିଶୁ ଉଦ୍ୟାନ ବିଭିନ୍ନ ଆବର୍ଜନାରେ ପରିପୂର୍ଣ୍ଣ ହୋଇ ରହିଥାଏ। ବିଭିନ୍ନ ସ୍ଥାନରେ ଖାଲି ମଦ ବୋତଲ ପଡ଼ିଥିବା ଦେଖିବାକୁ ମିଳେ। ହାଲ୍ ପ୍ରଶାସନ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରି ସ୍ଥାନୀୟ ଅଞ୍ଚଳର ଛୋଟ ପିଲାଙ୍କ ଆମୋଦ ପ୍ରମୋଦ ଲାଗି ଶିଶୁ ଉଦ୍ୟାନ କରି ଏହାର ରକ୍ଷଣାବେକ୍ଷଣ ପ୍ରତି ନଜର ନ ଦେବା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏଥିପ୍ରତି ଉଭୟ ପ୍ରଶାସନ ଦୃଷ୍ଟିଦେବାକୁ ସାଧାରଣରେ ଦାବି ହେଉଛି। ଏ ସମ୍ପର୍କରେ ସୁନାବେଡା ଆଇଆଇସି ଉଲ୍ଲସ ଚନ୍ଦ୍ର ରାଉତଙ୍କୁ ପଚାରିବାରୁ ସେ କହିଲେ,ସମ୍ପୃକ୍ତ ରାସ୍ତା ଗୁଡିକରେ ଏଣିକି ପାଟ୍ରୋଲିଂ ଉପରେ ଗୁରୁତ୍ୱାରୋପ କରାଯିବ।