ନୂଆଦିଲ୍ଲୀ: ଦୟାମନୋଭାବ ଦ୍ୱାରା ମଣିଷର ସୁନ୍ଦରତା ବୃଦ୍ଧି ପାଇଥାଏ। ନିକଟରେ ବୈଜ୍ଞାନିକଙ୍କ ଦ୍ୱାରା କରାଯାଇଥିବା ଏକ ଅଧ୍ୟୟନରୁ ଜଣାପଡ଼ିଛି। ସୁନ୍ଦର ଦେଖାଯିବା ପାଇଁ ଅନେକ ଲୋକ ବିଭିନ୍ନ ପ୍ରକାର ପ୍ରଣାଳୀକୁ ଆପଣାଇଥାନ୍ତି। କେହି କେହି ଦାମୀ ମେକ୍ଅପ୍ ଲଗାନ୍ତି ତ ଆଉ କେତେଜଣ ବ୍ୟୁଟି ପାର୍ଲରରେ ହଜାର ହଜାର ଟଙ୍କା ଖର୍ଚ୍ଚ କରନ୍ତି। କେମିକାଲ ପ୍ରଡକ୍ଟ ବ୍ୟବହାର କରିବା ଦ୍ୱାରା ଚର୍ମ ଖରାପ ହେବା ସହ ବହୁ ରୋଗ ହେବାର ଅଶଙ୍କା ରହିଛି। କିନ୍ତୁ ଯଦି ଜଣେ ବ୍ୟକ୍ତି ଅନ୍ୟମାନଙ୍କୁ ଦୟାପରବଶ ହୋଇ ନମ୍ର ବ୍ୟବହାର କରନ୍ତି ସେହି ବ୍ୟକ୍ତିଙ୍କ ସୁନ୍ଦରତା ସକାରାତ୍ମକ ଭାବେ ବୃଦ୍ଧି ପାଏ ଏବଂ ଏହି ସୌନ୍ଦର୍ଯ୍ୟତା ଚିର ସମୟ ପାଇଁ ରହିଥାଏ ବୋଲି ଅଧ୍ୟୟନରୁ ଜଣାପଡ଼ିଛି।
ମନୋବିଜ୍ଞାନୀଙ୍କ ମତରେ ପ୍ରତ୍ୟେକଙ୍କ ପାଇଁ ମେଡିଟେଶନ୍ କରିବା ମଧ୍ୟ ଜରୁରୀ। କାରଣ ଏହାଦ୍ୱାରା ମନୁଷ୍ୟର ମସ୍ତିଷ୍କ ସ୍ଥିର ରହିଥାଏ। ସେହିପରି ନିୟମିତ ବ୍ୟାୟାମକୁ ମଧ୍ୟ ଏଡ଼ାଇ ଦିଆଯାଇ ନ ପାରେ। ଅନ୍ୟ ପ୍ରତି ଦୟାଭାବ ପ୍ରଦର୍ଶନ କରିବା ସାଙ୍ଗକୁ ସବୁବେଳେ ଅନ୍ୟର ମଙ୍ଗଳ କାମନା କରିବା ଆବଶ୍ୟକ। ପ୍ରତ୍ୟେକ ଦିନ କିଛି ସମୟ ଧ୍ୟାନରେ ବସିବା ଅଭ୍ୟାସ ନିଜଠାରେ ପରୋପକାର ମନୋଭାବକୁ ଦୃଢ଼ କରିବାରେ ସାହାଯ୍ୟ କରେ। ନିୟମିତ ଧ୍ୟାନ କରିବା ଦ୍ୱାରା ଏହାର ସକାରାତ୍ମକ ପ୍ରଭାବ ମଣିଷର ଡିଏନ୍ଏ ଉପରେ ପଡ଼ିଥାଏ, ଯାହାଫଳରେ ଏହା ଦୀର୍ଘ ସମୟ ପର୍ଯ୍ୟନ୍ତ ମନୁଷ୍ୟଠାରେ ରହିଥାଏ। ଦୟାମନୋଭାବ ଖାଲି ଯେ ମନୁଷ୍ୟର ସୁନ୍ଦରତା ବୃଦ୍ଧି କରିଥାଏ ତା’ ନୁହେଁ, ଏହା ଦ୍ୱାରା ସବୁବେଳେ ମନ ପ୍ରଫୁଲ ରହିଥାଏ।